ଶେଷ ଯାତ୍ରାରେ ସନ୍ଦୀପ ହାତୀ । ଇଏ ଏକ ଏମିତି କାହାଣୀ, ଯାହା ସାରା ରାଜ୍ୟରେ ଚାଂଚଲ୍ୟ ଖେଳାଇଦେଇଛି । ଚାକିରୀରୁ ଛଟେଇ ହେବା ପରେ ସନ୍ଦୀପ ଦାବି କରୁଥିଲେ ତାଙ୍କୁ ପୁନଃନିଯୁକ୍ତି ଦିଆଯାଉ । କିନ୍ତୁ କେହି କର୍ଣ୍ଣପାତ କଲେ ନାହିଁ। ଆଉ ତାର ପରିଣାମ ଆପଣଙ୍କ ଆଗରେ । ରବିବାର ସକାଳେ ଜୀବନ ଯୁଦ୍ଧରେ ହାରିଗଲେ ସନ୍ଦୀପ ।
Kanak News is now on WhatsApp
Join and get latest news updates delivered to you via WhatsApp
ଗତ ଶୁକ୍ରବାର ଦିନ ହୋମଗାର୍ଡ ପଦବୀର ଛଟେଇ ପ୍ରତିବାଦରେ ନବୀନ ନିବାସ ଆଗରେ କିରୋସିନ୍ ଢ଼ାଳି ନିଆଁ ଲଗାଇ ଦେଲେ ସନ୍ଦୀପ । ତୁରନ୍ତ ତାଙ୍କୁ କ୍ୟାପିଟାଲ ହସ୍ପିଟାଲ ନିଆଗଲା । କିନ୍ତୁ ସେତେବେଳକୁ ତାଙ୍କ ଦେହର ୬୫ରୁ ୭୦ ପ୍ରତିଶତ ପୋଡ଼ି ଯାଇଥାଏ । ଏହା ପରେ ପରେ କଟକ ବଡ଼ ଡାକ୍ତରଖାନାକୁ ପଠାଇଦିଆଗଲା । କିନ୍ତୁ ସନ୍ଦୀପ ଆଉ ବଂଚିପାରିଲେ ନାହିଁ । ସବୁବେଳେ ଅବହେଳିତ ହୋଇ ପଡ଼ିରହିଥିବା ହୋମଗାର୍ଡ ସଂପ୍ରଦାୟ ପାଇଁ ସରକାରଙ୍କ ଦୃଷ୍ଟି ଆକର୍ଷଣ କରିବା ସନ୍ଦୀପଙ୍କ ଲକ୍ଷ୍ୟ ଥିଲା । ଏଣୁ ଏଭଳି ଏକ ଚରମ ପଦକ୍ଷେପ ନେଲେ ।
୨୦୧୩ ମସିହା, ମାର୍ଚ୍ଚ ମାସ । ବହୁ ସଂଖ୍ୟାରେ ହୋମଗାର୍ଡମାନେ ସାମାଜିକ ସୁରକ୍ଷା ଏବଂ ଦରମାବୃଦ୍ଧି ଦାବି କରି ବିରାଟ ଆନ୍ଦୋଳନ କଲେ । ଆଉ ଆନ୍ଦୋଳନ ସମୟରେ ପୁଲିସ ଓ ଆନ୍ଦୋଳନକାରୀ ମୁହାଁମୁହିଁ ହୋଇଗଲା । ଲାଠିଚାର୍ଚ୍ଚ ବି ହେଲା । କିନ୍ତୁ ପରବର୍ତୀ ସମୟରେ ଆନ୍ଦୋଳନକାରୀ ହୋମଗାର୍ଡଙ୍କୁ ଟାର୍ଗେଟ୍ କଲା ପୁଲିସ । ସିସିଟିଭିରେ ଖୋଜା ଖୋଜି ହୋମଗାର୍ଡଙ୍କୁ ଚିହ୍ନାଗଲା । ଆଉ ଆନ୍ଦୋଳନରେ ସାମିଲ ହୋଇଥିବା ସନ୍ଦୀପ ହାତୀଙ୍କୁ ବି ଛଟେଇ କରିଦିଆଗଲା ।
ଦିନକୁ ମାତ୍ର ୨୪୦ ଟଙ୍କାର ଭତା। ଆଉ କିଛି ସମାଜିକ ସୁରକ୍ଷା କିଛି ବି ମିଳେନାହିଁ । ଏଭଳି ଦୟନୀୟ ପରିସ୍ଥିତିରେ ଆନ୍ଦୋଳନ କରିବା କ’ଣ ଭୁଲ ? ଯେଉଁଥି ପାଇଁ ସନ୍ଦୀପ ହାତୀଙ୍କୁ ଏହି ଛୋଟିଆ ଚାକିରିରୁ ବି ଛଟେଇ କରିଦିଆଗଲା । ଗୁଜୁରାଣ ମେଂଟାଇବାକୁ ସନ୍ଦୀପ ଦାବି କରୁଥିଲେ, ପୁଣି ତାଙ୍କୁ ହୋମଗାର୍ଡ ଚାକିରିରେ ଅବସ୍ଥାପିତ କରାଯାଉ । କିନ୍ତୁ କେହି ଶୁଣିଲେ ନାହିଁ । ଆଉ ଇଏ ହେଉଛି ତାର ପରିଣାମ ।
ଦେଖନ୍ତୁ ଏହି ଭିଡିଓ –