ବ୍ୟୟବହୁଳ ନିର୍ବାଚନ ପ୍ରଚାର ଭିତରେ ରାଜ୍ୟ ବିକାଶର ବିକଳ ଚିତ୍ର । ଫାଇଲିନ୍ ବାତ୍ୟାରୁ ଭାଙ୍ଗିଲାଣି ଘର, ଏପର୍ଯ୍ୟନ୍ତ ମିଳୁନି ସହାୟତା । ଗଛ ମୂଳରେ କଟୁଛି ବୃଦ୍ଧ ଦମ୍ପତିଙ୍କ ଜୀବନ
କନକ ବ୍ୟୁରୋ : ନିର୍ବାଚନ ପାଇଁ ସମସ୍ତେ ପ୍ରସ୍ତୁତ । ଭୋଟ ହାତେଇବା ପାଇଁ ଗାଁ ମୁହାଁ ନେତା । ପ୍ରଚାର କରି ବିଭିନ୍ନ ପ୍ରକାର ପ୍ରତିଶୃତି ଦେଉଛନ୍ତି । ନିର୍ବାଚନ ଖବର ସଂଗ୍ରହ କରୁକରୁ କନକ ନ୍ୟୁଜ କ୍ୟାମେରାରେ କଏଦ ହୋଇଥିଲା ଏକ ରୋଚକ ଦୃଶ୍ୟ । ଘର ଖଣ୍ଡିଏ ନଥିବାରୁ ଗଛ ମୁଳରେ ଦୟନୀୟ ଜୀବନ ବିତାଉଛନ୍ତି ବୃଦ୍ଧ ଦମ୍ପତ୍ତି । ବାଲେଶ୍ୱର ସଦର ବ୍ଲକ କୁରାଡିଆ ପଞ୍ଚାୟତ ପରମାନନ୍ଦପୁର ଗାଁର ବାଲକ ପାତ୍ର ଓ ତାଙ୍କ ପତ୍ନୀ ସୁମତୀ ପାତ୍ର । ୨୦୧୩ରେ ଫାଇଲିନ ବାତ୍ୟାରେ ତାଙ୍କ ଘର ଭାଙ୍ଗି ଯାଇଥିଲା । ସେହି ଦିନ ଠାରୁ ଘର ଖଣ୍ଡିଏ ପାଇଁ ନେତା ମନ୍ତ୍ରୀଙ୍କ ଠାରୁ ଆରମ୍ଭ କରି ବିଡିଓ ଏବଂ ଜିଲ୍ଲାପାଳଙ୍କ ନିକଟରେ ଗୁହାରି କରିଥିଲେ ମଧ୍ୟ କେହି ଶୁଣୁ ନଥିବା ତ୍ୟନ୍ତ କୋହ ଭରା କଣ୍ଠରେ କହିଛନ୍ତି ବୃଦ୍ଧ ଜଣଙ୍କ ।
Kanak News is now on WhatsApp
Join and get latest news updates delivered to you via WhatsApp
ବାଲେଶ୍ୱର ବିଜେଡି ସାଂସଦ ପ୍ରାର୍ଥୀ ଲେଖାଶ୍ରୀ ସାମନ୍ତସିଂହାର ଏବଂ ସଦର ବିଧାୟକ ତଥା ବିଧାୟକ ପ୍ରାର୍ଥୀ ସ୍ୱରୁପ ଦାସ କୁରାଡିଆ ପଂଚାୟତର ପରମାନନ୍ଦପୁର ଗାଁରେ ନିର୍ବାଚନ ପ୍ରଚାର କରୁଥିବା ବେଳେ ବାବଲଙ୍କ ଗଛମୂଳ ଘର ଉପରେ କ୍ୟାମେରା ପଡିଥିଲା । ଯେଉଁଠି ନିର୍ବାଚନୀ ସଭା ହେଉଥିଲା ସେହିଠାରେ ବାଲକଙ୍କ ପରିବାର ଗଛ ମୁଳରେ ରୋଷେଇ କରୁଥିଲେ । ସଭାରେ ଉଭୟ ସାଂସଦ ପ୍ରାର୍ଥୀ ଏବଂ ବିଧାୟକ ପ୍ରାର୍ଥୀ ସରକାରଙ୍କ ବିକାଶର କଥା କହୁଥିବା ବେଳେ ଏହି ବୃଦ୍ଧଦମ୍ପତିଙ୍କ ବାସ ସବୁ ବିକାଶମୂଳକ ଯୋଜନାକୁ ଯେମିତି ଅଟହାସ୍ୟ କରୁଛି ।
ନିର୍ବାଚନୀ ସଭାରେ ଉପସ୍ଥିତ ସାଂସଦ ପ୍ରାର୍ଥୀ ଲେଖାଶ୍ରୀ ସାମନ୍ତସିଂହାର ଏବଂ ବିଧାୟକ ପ୍ରାର୍ଥୀ ତଥା ବର୍ତ୍ତମାନର ବିଧାୟକ ସ୍ୱରୁପ କୁମାର ଦାସ କହିଛନ୍ତି ତଦନ୍ତ କରି ଘର ଯୋଗଇ ଦିଆଯିବ ।