ସରଳ ଜୀବନ, ନିର୍ମଳ ଭାବମୂର୍ତ୍ତି । ୨୫ ବର୍ଷର ରାଜନୈତିକ କ୍ୟାରିୟରରେ ଅପରାଜେୟ ନବୀନ । ଜନ୍ମଦିନରେ ପଢନ୍ତୁ, କେମିତି ରହିଛି ନବୀନଙ୍କ ରାଜନୈତିକ କ୍ୟାରିୟର?
୭୭ ବର୍ଷରେ ପାଦ ଦେଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
କନକ ବ୍ୟୁରୋ: ନବୀନ ପଟ୍ଟନାୟକ । ଧଳାକୁର୍ତ୍ତା ପାଇଜାମା, ହାୱାଇ ଚପଲ ଆଉ ନିର୍ମଳ ଭାବମୂର୍ତ୍ତି । ନବୀନ ଏମିତି ଜଣେ ନେତା, ଯାହାଙ୍କୁ ରାଜନୀତିରେ କେବେ କଳଙ୍କ ଛୁଇଁନି, କି ତାଙ୍କ ନିର୍ମଳ ଭାବମୂର୍ତ୍ତି କେବେ ବି କ୍ଷୁର୍ଣ୍ଣ ହେଇନି । ନିର୍ବାଚନ ପରେ ନିର୍ବାର୍ଚନ ଯାଇଛି, ବିଜୟ ପରେ ବିଜୟ ମିଳିଛି । ଗଲା ଦୁଇ ଦଶନ୍ଧୀ ଧରି କ୍ଷମତାର କେନ୍ଦ୍ରବିନ୍ଦୁରେ ଥିବା ନବୀନ , ଆଜି କେବଳ ଜଣେ ସାଧାରଣ ନେତା ନୁହଁନ୍ତି ଦେଶର ରାଜନୀତିରେ ନବୀନ ଏକ ବ୍ରାଣ୍ଡ ହେଇସାରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
୭୭ ବର୍ଷୀୟ ନବୀନଙ୍କ ଜୀବନ ମୁଖ୍ୟମନ୍ତ୍ରୀ ହେବା ପୂର୍ବରୁ ଯେମିତି ସାଧାରଣ ଥିଲା, ମୁଖ୍ୟମନ୍ତ୍ରୀ ପରେ ବି ତାଙ୍କ ଜୀବନ ସେମିତି ନିରାଡମ୍ବର ରହିଛି । ପ୍ରତିଟି ମୂହୁର୍ତ୍ତରେ ସେ ଓଡିଶା ଆଉ ଓଡିଶାବାସୀଙ୍କ ହୃଦୟ ଜିତିଛନ୍ତି, ଆଉ ପ୍ରତିଟି ଓଡିଆଙ୍କୁ ନବୀନଙ୍କୁ ଦେଇଛନ୍ତି ଅକୁଣ୍ଠ ଭଲପାଇବା । ଯାହାର ପ୍ରମାଣପତ୍ର ହେଉଛି ଶାସନ କ୍ଷମତାରେ ନବୀନଙ୍କ ୨ ଦଶନ୍ଧିର ଯାତ୍ରା ।
ରାଜନୀତିରେ ଲମ୍ବା ରେସର ଘୋଡା ଭାବେ ଉଭା ହେଇଥିବା ନବୀନଙ୍କ ରାଜନୀତିରେ ପ୍ରବେଶ, ଯେମିତି ଆକସ୍ମିକ ଥିଲା, ସେମିତି ଥିଲା ଅପ୍ରତ୍ୟାଶ୍ରିତ । ସେତେବେଳର ରାଜନୈତିକ ଦୃଶ୍ୟପଟ୍ଟରେ ନବୀନ ଥିଲେ ପୂରାପୂରି ଅଜଣା । ନା ନେତା, ନା ଜନତା, କେହି ବି କେବେ କଳ୍ପନା କରିନଥିଲେ ଯେ, ରାଜ୍ୟ ରାଜନୀତିରେ ଅପରିଚିତ ଥିବା ନବୀନ, ଦିନେ ଦେଶର ରାଜନୈତିକ ଇତିହାସରେ ସବୁଠୁ ବଡ ଅଧ୍ୟାୟ ଲେଖିବାକୁ ଯାଉଛିନ୍ତି ।
୧୯୯୭ରେ ବିଜୁ ବାବୁଙ୍କ ଦେହାନ୍ତରେ ରାଜ୍ୟ ରାଜନୀତିରେ ଏକ ବଡ ଶୂନ୍ୟସ୍ଥାନ ସୃଷ୍ଟି ହୋଇଥିଲା । ଆଉ ଏତିକି ବେଳେ ରାଜନୀତିରେ ବିଦ୍ୟାରମ୍ଭ କରିଥିଲେ ନବୀନ । ଆଉ ଖୁବ୍ କମ ସମୟ ମଧ୍ୟରେ ଓଡ଼ିଶା ରାଜନୀତିର ଗୋଳମାଳିଆ ପାଠକୁ ବେଶ ଭଲ ଭାବରେ ବୁଝି ପାରିଥିଲେ ବିଜୁଙ୍କ ଦାୟଦ । କେହି ସ୍ୱପ୍ନରେ ସୁଦ୍ଧା ଭାବିନଥିଲେ ଯେ, ଦୁଇ ଦଶନ୍ଧି ପୂର୍ବରୁ ଓଡ଼ିଶାବାସୀଙ୍କ ପାଇଁ ଅପରିଚିତ ଥିବା ନବୀନ ପରବର୍ତ୍ତୀ ସମୟରେ କୋଟି ଓଡ଼ିଆଙ୍କ ନଜରରେ ଅଦ୍ୱିତୀୟ ନେତା ପାଲଟିଯିବେ ।
• ଜୁନ୍ ୧୯୯୭ରେ ଆସ୍କାରୁ ପ୍ରଥମ ଥର ସାଂସଦ
• ୧୯୯୭ ଡିସେମ୍ବର ମାସରେ ବିଜେଡି ଗଠନରେ ଗୁରୁତ୍ୱପୂର୍ଣ୍ଣ ଭୂମିକା
• ୧୯୯୮ ମସିହା ମାର୍ଚ୍ଚ ମାସରେ ନବୀନ ବାଜପେୟୀ ସରକାରରେ କେନ୍ଦ୍ରମନ୍ତ୍ରୀ
କିଛି ଏଭଳି ଭାବେ ଆରମ୍ଭ ହୋଇଥିଲା ନବୀନଙ୍କ ରାଜନୈତିକ କ୍ୟାରିୟରର ପ୍ରଥମ ଅଧ୍ୟାୟ । ଆଉ ୨୦୦୦ ମସିହାରେ ଓଡିଶାର ମୁଖ୍ୟମନ୍ତ୍ରୀ ହେବା ପୂର୍ବରୁ ନବୀନ ରାଜନୀତିର ବର୍ଣ୍ଣବୋଧ ଶିଖିସାରିଥିଲେ । ବାସ୍ ଏଇଠୁ ହିଁ ଆରମ୍ଭ ହେଇଥିଲା ଓଡିଶା ରାଜନୀତିରେ ନବୀନ ଯୁଗ । ୨୦୦୦, ୨୦୦୪,୨୦୦୯, ୨୦୧୪ ଆଉ ୨୦୧୯ । ସବୁଥର ସବୁ ନିର୍ବାଚନରେ ଓଡିଶାବାସୀ ନବୀନଙ୍କୁ ହିଁ ନିଜର ନେତା ବାଛିଛନ୍ତି । ଆଉ ନବୀନ ବି ଲୋକଙ୍କ ମନ ଜିଣି, ଯୋଜନା ପରେ ଯୋଜନା ଭେଟିଦେଇଛନ୍ତି ।
- ମହିଳାଙ୍କ ପାଇଁ ମିଶନ୍ ଶକ୍ତି
- କୃଷକଙ୍କ ପାଇଁ କାଳିଆ
- ଅସହାୟଙ୍କ ପାଇଁ ଆହାର
- ସୁସ୍ଥ ଓଡିଶା ଗଠନ ପାଇଁ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା
ନବୀନଙ୍କ ପ୍ରତିଟି ନିଷ୍ପତ୍ତି ତାଙ୍କୁ ଆହୁରି ଅଧିକ ଲୋକପ୍ରିୟ କରିଛି । ଲୋକଙ୍କ ଭରସା ଆଉ ବିଶ୍ୱାସକୁ ଆହୁରି ଅଧିକ ଦୃଢୀଭୂତ କରିଛି । ଯେଉଁଥିପାଇଁ ରାଜ୍ୟବାସୀ ପାଞ୍ଚ ପାଞ୍ଚ ଥର ନବୀନଙ୍କ ସପକ୍ଷରେ ଭରସାର ଭୋଟ୍ ଅଜାଡି ଦେଇଛନ୍ତି ।
ମନ୍ଦିର ସୌନ୍ଦର୍ଯ୍ୟକରଣ, ବିଶ୍ୱସ୍ତରୀୟ ମେଡିକାଲ ଗଠନ, ନୂଆ ନୂଆ ଷ୍ଟାଡିୟମ୍ ନିର୍ମାଣ । ନୂଆ ଓଡିଶା ଗଠନ ସହ ବିକଶିତ ଓଡିଶାର ସୂର୍ଯ୍ୟୋଦୟ ପାଇଁ ଦିନରାତି ପରିଶ୍ରମ କରିଚାଲିଛନ୍ତି ନବୀନ । ଯାହାକି ତାଙ୍କ ଏ ପରାଜୟ ବିହୀନ ରାଜନୈତିକ ଜୀବନର ସବୁଠୁ ବଡ ପୁଞ୍ଜି କହିଲେ ଅତ୍ୟୁକ୍ତି ହେବନି । ୨୫ ବର୍ଷରୁ ଅଧିକ ସମୟ ଧରି ରାଜନୀତିର ହୋ ହଲ୍ଲା ଭିତରେ ରହି ବି, ଆଜି ବି ନବୀନଙ୍କ ସ୍ୱଭାବ ଆଉ ବ୍ୟବହାର ପୂରାପୂରି ଶାନ୍ତ ଆଉ ସରଳ । ସ୍ମିତହାସ୍ୟ ସହ ପଦିଏ ପଦିଏ କଥା କହି କେବଳ ଓଡ଼ିଶାବାସୀଙ୍କ ମନ ଜିଣିନାହାନ୍ତି ବରଂ ବିରୋଧୀଙ୍କୁ ଚେକମେଟ ଦେବାରେ ସଫଳ ହୋଇଛନ୍ତି ନବୀନ ।
ଖୁବ୍ କମ କହୁଥିବା ନବୀନଙ୍କ କାମ ହିଁ କଥା କୁହେ । କରୋନା ସମୟରେ ନିଶ୍ୱାସ ଦେଇ ପୂରା ଦେଶର ବିଶ୍ୱାସ ଜିଣିଥିବା ନବୀନଙ୍କ ମହାମାରୀ ମୁକାବିଲାର ମଡେଲକୁ ପୂରା ବିଶ୍ୱ ପ୍ରଂଶସା କରିଛି । ଜିରୋ କାଜୁଆଲଟି ମନ୍ତ୍ରକୁ ଆଧାର କରି ବିପର୍ଯ୍ୟୟ ପରିଚାଳନାରେ ମହାରଥ ହାସଲ କରିଥିବା ନବୀନଙ୍କ ନେତୃତ୍ୱ ଓ ଶାସନ ଶୈଳୀକୁ ନେଇ ପୂରା ବିଶ୍ୱରେ ଚର୍ଚ୍ଚା ହୋଇଥାଏ । ସେହିଭଳି ହକି, ଫୁଟବଲ ବିଶ୍ୱକପ ଭଳି ବିଶ୍ୱସ୍ତରୀୟ କ୍ରୀଡାର ଆୟୋଜନ କରି ନବୀନ ଓଡ଼ିଶାକୁ କ୍ରୀଡା ରାଜଧାନୀର ପରିଚୟ ଦେଇଛନ୍ତି । ଶାସନ କ୍ଷମତା ନୁହେଁ ଜନସେବା ହିଁ ନବୀନଙ୍କ ଶାସନର ମୂଳମନ୍ତ୍ର । ଯାହାକୁ ଆୟୁଧ କରି ଓଡ଼ିଶାକୁ ରୂପାନ୍ତରଣ ରାସ୍ତାରେ ଆଗେଇ ନେଉଛନ୍ତି ଦୁଇ ଦଶନ୍ଧିର ଅପରାଜେୟ ନେତା ନବୀନ ପଟ୍ଟନାୟକ ।
ଓଡ଼ିଶାର ଏହି ଜନନେତା ଆଜି ୭୭ ବର୍ଷରେ ପାଦ ଦେଇଛନ୍ତି । ଆଜିର ଦିନରେ ହିଁ ଜ୍ଞାନଦେବୀଙ୍କ କୋଳକୁ ଆସିଥିଲେ କୁନି ନବୀନ । କିନ୍ତୁ ନବୀନ ଏବେ କେବଳ ଗୋଟିଏ ପରିବାରରେ ସୀମିତ ନୁହନ୍ତି ବରଂ ଓଡ଼ିଶାର ଘରେ ଘରେ ପରିଚିତ । କାରଣ ସାଢେ ୪ କୋଟି ଓଡ଼ିଶାବାସୀଙ୍କୁ ନିଜର ପରିବାର ଭାବେ ଗ୍ରହଣ କରିଛନ୍ତି ନବୀନ । ଯାହା ତାଙ୍କୁ ଜନପ୍ରିୟ ନେତାର ପରିଚୟ ଦେଇଛି । ନେତାରୁ ଜନନେତା, ମୁଖ୍ୟମନ୍ତ୍ରୀରୁ ଶ୍ରେଷ୍ଠ ମୁଖ୍ୟମନ୍ତ୍ରୀ, ଶାସକ ନୁହେଁ ସେବକ ଏହି ପରିଚୟ ନେଇ ଏବେ ଆଗକୁ ବଢୁଛନ୍ତି ନବୀନ ।