ଭାରତୀୟ କ୍ରିକେଟ ବୋର୍ଡକୁ ପ୍ରଂଶସା କଲେ ସ୍ମିଥ, ଅଷ୍ଟ୍ରେଲିଆ ଓ ଇଂଲଣ୍ଡକୁ ପରୋକ୍ଷରେ ମାରିଲେ ସମାଲୋଚନାର ତୀର ।
କନକ ବ୍ୟୁରୋ : ଭାରତୀୟ କ୍ରିକେଟ ବୋର୍ଡକୁ ଧନ୍ୟବାଦ ଜଣାଇଲେ ସ୍ମିଥ । ପରୋକ୍ଷରେ ଇଂଲଣ୍ଡ ଓ ଅଷ୍ଟ୍ରେଲିଆକୁ ନିଶାନା ମଧ୍ୟ କଲେ । ଭାରତ-ଦକ୍ଷିଣ ଆଫ୍ରିକା ସିରିଜ ଶେଷ ହେବା ପରେ ଟ୍ୱିଟ୍ କରି କିଛି ଏମିତି ଇଙ୍ଗିତ କରିଛନ୍ତି ଦକ୍ଷିଣ ଆଫ୍ରିକା ବୋର୍ଡର ନିର୍ଦ୍ଦେଶକ ଗ୍ରେମ ସ୍ମିଥ୍ । ଦକ୍ଷିଣ ଆଫ୍ରିକାର ସିରିଜ ଆୟୋଜନର କ୍ଷମତା ଉପରେ ଭରସା କରିଥିବାରୁ ବିସିସିଆଇ ଓ ଭାରତୀୟ ଖେଳାଳୀଙ୍କୁ ଧନ୍ୟବାଦ ଜଣାଇଛନ୍ତି ସ୍ମିଥ୍ । କରୋନାର ନୂଆ ଭାରିଆଣ୍ଟ ଓମିକ୍ରନ ଦକ୍ଷିଣ ଆଫ୍ରିକାରେ ଚିହ୍ନଟ ହେବା ସତ୍ତେ୍ୱ ମଧ୍ୟ ସିରିଜ ବାତିଲ କରିନଥିଲା ବିସିସିଆଇ । ଏପରିକି ଓମିକ୍ରନର ପ୍ରଭାବ କଣ ରହିବ ସେ ବାବଦରେ ସଠିକ ତଥ୍ୟ ମିଳିନଥିଲେ ମଧ୍ୟ ଭାରତ ଖେଳିବାକୁ ପଛଘୁଞ୍ଚା ଦେଇନଥିଲା । ଯେଉଁଥିପାଇଁ ଦକ୍ଷିଣ ଆଫ୍ରିକା-ଭାରତ ମଧ୍ୟରେ ୩ଟି ଟେଷ୍ଟ ଓ ୩ ଦିନିକିଆ ମ୍ୟାଚ୍ ଖେଳାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଆଉ ଏହାପରେ ଗ୍ରେମ ସ୍ମିଥ ଟ୍ୱିଟ୍ କରି କହିଥିଲେ, ବିସିସିଆଇ, ଜୟ ଶାହା, ସୌରଭ ଗାଙ୍ଗୁଲି, ଭାରତୀୟ ଖେଳାଳୀ ଓ ଟିମ୍ ମ୍ୟାନେଜମେଣ୍ଟକୁ ଧନ୍ୟବାଦ । ଯେଉଁମାନେ ଦକ୍ଷିଣ ଆଫ୍ରିକାର ଆୟୋଜନ କ୍ଷମତା ଉପରେ ଭରସା କରିଲେ । ଅନିଶ୍ଚିନ୍ତତାର ମାହୋଲ ଭିତରେ ପ୍ରତିବଦ୍ଧତାର ଉଦାହରଣ ସାଜିଲା ଭାରତ, ଆଉ ଭାରତର ଏଭଳି ପ୍ରତିବଦ୍ଧତାକୁ ଅନ୍ୟମାନେ ଅନୁକରଣ କରିପାରନ୍ତି । ଆଉ ଏଭଳି କହି ପରୋକ୍ଷରେ ଅଷ୍ଟ୍ରେଲିଆ ଓ ଇଂଲଣ୍ଡକୁ ତୀର ମାରିଛନ୍ତି ସ୍ମିଥ୍ । ଅଷ୍ଟ୍ରେଲିଆ ଗତବର୍ଷ କରୋନା ମହାମାରୀ କାରଣରୁ ଦକ୍ଷିଣ ଆଫ୍ରିକା ବିପକ୍ଷରେ ଖେଳିବାକୁ ଥିବା ଟେଷ୍ଟ ସିରିଜକୁ ସ୍ଥଗିତ ରଖିଥିଲା । ସେହିଭଳି ୨୦୨୦ରେ ବାୟୋ ବବଲରେ କରୋନା ସଂକ୍ରମଣ ମାମଲା ଆସିବା ପରେ ଇଂଲଣ୍ଡ ସିରିଜ ମଝିରୁ ଫେରି ଯାଇଥିଲା । କିନ୍ତୁ କରୋନା ଭଳି କଷ୍ଟକର ସମୟରେ ଦକ୍ଷିଣ ଆଫ୍ରିକା ଉପରେ ଭରସା କରିଥିବାରୁ ଭାରତକୁ ଧନ୍ୟବାଦ ଜଣାଇଛନ୍ତି ସ୍ମିଥ୍ ।
Big thank you @BCCI @JayShah @SGanguly99 and the Indian players and management for the faith you showed in SA cricket’s ability to pull off a safe and successful tour. Your commitment at an uncertain time has set the example that a lot can follow.
— Graeme Smith (@GraemeSmith49) January 23, 2022
ଏହି ସିରିଜ ଦକ୍ଷିଣ ଆଫ୍ରିକା ପାଇଁ ବେଶ ଗୁରୁତ୍ୱପୂର୍ଣ୍ଣ ଥିଲା । ଦକ୍ଷିଣ ଆଫ୍ରିକା କେବଳ ସିରିଜ ବିଜୟୀ ହୋଇନାହିଁ ବରଂ ଏହି ସିରିଜରେ ପ୍ରସାରଣକାରୀ ସଂସ୍ଥା ଠାରୁ ମିଳିଥିବା ଅର୍ଥ ଦକ୍ଷିଣ ଆଫ୍ରିକା କ୍ରିକେଟ ବୋର୍ଡର ସ୍ଥିତିରେ ସୁଧାର ଆଣିବ । ଦକ୍ଷିଣ ଆଫ୍ରିକା ଗସ୍ତରେ ଭାରତ ଉଭୟ ଟେଷ୍ଟ ଓ ଦିନିକିଆ ସିରିଜ ପରାଜିତ ହୋଇଥିଲା ।