ରାତି ସାରା ଚାଲିଲା ଭସାଣି : ବିଦାୟ ନେଲେ ମାଆ ଜଗତଜନନୀ; ଟ୍ୱିନ୍ ସିଟିରେ ଅସ୍ଥାୟୀ ପୋଖରୀରେ କରାଗଲା ମୃଣ୍ମୟୀ ମୂର୍ତ୍ତି ବିସର୍ଜନ
କନକ ବ୍ୟୁରୋ : ମେଲାଣି ନେଲେ ମା ଦୁର୍ଗା । ଦୂର୍ଗାପୂଜାର ଅନ୍ତିମ ପର୍ଯ୍ୟାୟ ଭସାଣ ଉତ୍ସବରେ ଫାଟି ପଡିଥିଲା କଟକ-ଭୁବନେଶ୍ୱର । ତୁହାତୁ ତୁହା ବର୍ଷା ଭିତରେ ଶେଷ ହୋଇଛି ମାଆ ଜଗତଜନବୀଙ୍କ ଶୋଭାଯାତ୍ରା । ପାରମ୍ପରିକ ବାଦ୍ୟର ତାଳେତାଳେ ମାଆଙ୍କ ମେଢ ଆଗରେ ନାଚିନାଚି ବିଦାୟ ଜଣାଇଛନ୍ତି ବିଭିନ୍ନ ପୂଜା କମିଟି ସଦସ୍ୟ । ଢୋଲ ବାଜା, ଘୋଡାନାଚ ଓ ଅତ୍ୟାଧୁନିକ ଡିଜେ ସାଉଣ୍ଡର ତାଳରେ ଝୁମିଛନ୍ତି ଯୁବଗୋଷ୍ଠୀ ।
Kanak News is now on WhatsApp
Join and get latest news updates delivered to you via WhatsApp
ଭୁବନେଶ୍ୱରରେ ଭସାଣି ପାଇଁ ମହାନଗର ନିଗମ ପକ୍ଷରୁ ନିର୍ମାଣ କରାଯାଇଥିବା ୪ଟି ଅସ୍ଥାୟୀ ପୋଖରୀରେ ମାଙ୍କ ମୂର୍ତ୍ତି ବିସର୍ଜନ କରାଯାଇଛି । କୁଆଖାଇ ନଦୀ ପଠାରେ ୨ଟି ଏବଂ ଟଙ୍କପାଣି ବାସୁଆ ଘାଇ ଓ ଦୟାନଦୀ କୂଳରେ ଗୋଟିଏ ଲେଖାଏଁ ପୋଖରୀ କରାଯାଇଥିଲା । ନଦୀ ପ୍ରଦୂଷଣକୁ ରୋକିବା ପାଇଁ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ନିର୍ଦ୍ଦେଶ ଅନୁସାରେ ଛୋଟବଡ ପ୍ରାୟ ୩୦୦ ମେଢର ବିସର୍ଜନ ବ୍ୟବସ୍ଥା କରାଯାଇଥିଲା । ୬ ଫୁଟ ଗଭୀର ଓ ୧୫ ଫୁଟ ଓସାର ରହିଥିଲା ପ୍ରତ୍ୟେକ ପୋଖରୀ । ବିଏମସି ପକ୍ଷରୁ ଯୋଗାଇ ଦିଆଯାଇଥିବା ଜେସିବି ସାହାଯ୍ୟରେ ଅସ୍ଥାୟୀ ପୋଖରୀରୁ ଅଳିଆକୁ କାଢି ସୈନିକ ସ୍କୁଲ ପାଖ ଟିସିଏସରେ ପକାଇବା ପାଇଁ ବନ୍ଦୋବସ୍ତ କରାଯାଇଛି ।
ତେବେ ରାତି ସାଢ଼େ ୧୦ଟା ପରେ କମିଶନରେଟ୍ ପୋଲିସ ପକ୍ଷରୁ ଡିଜେ ସାଉଣ୍ଡ ବଜାଯିବାକୁ ବନ୍ଦ କରାଯାଇଥିଲା । ସେହିପରି ଆକର୍ଷଣୀୟ ମେଢ ସାଙ୍ଗକୁ ଭସାଣିର ଚାକଚକ୍ୟରେ ଭୁବନେଶ୍ୱର ଆଗରେ ଥିଲେ ବି ପାରମ୍ପରିକତାକୁ ବଜାୟ ରଖିଥିଲା କଟକ ସହର । ବର୍ଷାରୁ ସୁରକ୍ଷା ଦେବାପାଇଁ ମାଆଙ୍କ ମେଢକୁ ପଲିଥିନ ଘୋଡାଇ କରାଯାଇଥିଲା ସହର ପରିକ୍ରମା । ବାଜା ବଜାଇ, ନାଚଗୀତରେ ମାଆଙ୍କୁ ମେଲାଣି ଦେଇଛନ୍ତି କଟକ ସହରବାସୀ । କଟକ ଦେବୀଗଡାରେ ଏଥିପାଇଁ ୩ଟି କୃତ୍ରିମ ପୋଖରୀ କରାଯାଇଛି ।
୬ଫୁଟ ଗଭୀର ଓ ୧୫ ଫୁଟ ଓସାର ବିରାଟ ଅସ୍ଥାୟୀ ପୋଖରୀରେ ମୋଟା ପଲିଥିନ ଦେଇ ପାଣି ଭର୍ତ୍ତି କରାଯାଏ । ପାଣିକୁ ପ୍ରଦୂଷିତ ନକରିବା ପାଇଁ ମୂର୍ତ୍ତିରୁ ଫୁଲ ଅନ୍ୟାନ୍ୟ ଜିନିଷ କାଢି ପାଣିରେ ପକାଇବାକୁ ନିୟମ ରହିଥିଲା । ପୁରା ବ୍ୟବସ୍ଥାକୁ ଅନୁଧ୍ୟାନ କରିବା ପାଇଁ ମହାନଗର ନିଗମ ଅଧିକାରୀଙ୍କୁ ନିୟୋଜିତ କରାଯାଇଛି । କଟକରେ ବିଭିନ୍ନ ମଣ୍ଡପରେ ପୂଜା ପାଉଥିବା ଦେଢଶହରୁ ଅଧିକ ମେଢକୁ ପର୍ଯ୍ୟାୟକ୍ରମେ କାଠଜୋଡିର ଦେବୀଗଡାରେ ବିସର୍ଜନ କରାଯାଉଛି ।