ଆସନ୍ତା ଜାନୁୟାରୀ ୬ରେ ହେବ ଦିଲ୍ଲୀ ମେୟର ପାଇଁ ନିର୍ବାଚନ । କିଏ ହେବ ଦିଲ୍ଲୀ ମେୟର ତାକୁ ନେଇ ସସ୍ପେନ୍ସ
କନକ ବ୍ୟୁରୋ : ଆସନ୍ତା ଜାନୁୟାରୀ ୬ରେ ହେବ ଦିଲ୍ଲୀ ମେୟର ପାଇଁ ନିର୍ବାଚନ । ବହୁ କଳ୍ପନାଜଳ୍ପନା ପରେ ଏନେଇ ତାରିଖ ସ୍ଥିର କରାଯାଇଛି । ଏମସିଡି କମିଶନ ମେୟର ନିର୍ବାଚନ ନେଇ ଉପରାଜ୍ୟପାଳ ବିନୟ ସକସେନାଙ୍କୁ ପଠାଯାଇଥିବା ପ୍ରସ୍ତାବକୁ ସେ ମଞ୍ଜୁରି ଦେଇଛନ୍ତି । ଗତ ଡିସେମ୍ବର ୪ରେ ଦିଲ୍ଲୀ ମହାନଗର ନିଗମ ନିର୍ବାଚନ ହୋଇଥିବା ବେଳେ ୭ ଡିସେମ୍ବରରେ ଫଳାଫଳ ପ୍ରକାଶ ପାଇଥିଲା । ୧୫ ବର୍ଷର ବିଜେପି ଶାସନ ଡୋରୀକୁ ବଦଳାଇ ଏଥର ଆପକୁ ଭରସା କରିଛନ୍ତି ଦିଲ୍ଲୀ ସହରବାସୀ । କିନ୍ତୁ ଏହାରି ଭିତରେ ସପ୍ତାହ ବିତିଥିଲେ ବି କିଏ ହେବ ମେୟର ତାହା ଜଣାପଡିନାହିଁ ।
Kanak News is now on WhatsApp
Join and get latest news updates delivered to you via WhatsApp
୨୫୦ ଆସନ ବିଶିଷ୍ଠ ଦିଲ୍ଲୀ ମହାନଗର ନିଗମରେ ଚଳିତ ନିର୍ବାଚନରେ ୧୩୪ ଆସନ ଜିତି ବହୁମତ ହାସଲ କରିଛି ଆପ୍ । ବିଜେପିକୁ ମିଳିଛି ୧୦୪ଟି ଆସନ । ନବ ନିର୍ବାଚିତ କାଉଁସିଲରଙ୍କୁ ନେଇ ୬ ଜାନୁୟାରୀରେ ହେବାକୁ ଥିବା ପ୍ରଥମ ବୈଠକରେ ମେୟର ବଛାଯିବ । ନିୟମ ଅନୁଯାୟୀ ସଂଖ୍ୟା ଗରିଷ୍ଠତା ପାଇଥିବା ଦଳ ମେୟର ବାଛିବ । ହେଲେ ବିରୋଧୀ ଏହାକୁ ଚାଲେଞ୍ଜ କରିପାରିବେ । ଆଉ ଯଦି ବିରୋଧୀ ଚାଲେଞ୍ଜ କରନ୍ତି ତେବେ ମେୟର ପାଇଁ କାଉନସିଲର ମାନଙ୍କ ମଧ୍ୟରେ ନିର୍ବାଚନ ହେବ । ଯିଏ ଅଧିକ ସମର୍ଥନ ପାଇବ, ସେ ମେୟର ହେବ ।