ଘରୁ ମିଳିଲା ମହିଳା ସବ୍ ଇନ୍ସପେକ୍ଟରଙ୍କ ମୃତଦେହ । ବର୍ଷେ ହେବ ଛୁଟିରେ ଥିଲେ ଶୀତଲ
କନକ ବ୍ୟୁରୋ: ମୁମ୍ବାଇରେ ଜଣେ ମହିଳା ପୁଲିସ ଅଧିକାରୀଙ୍କ ମୃତଦେହ ତାଙ୍କ ଘରୁ ସନ୍ଦିଗ୍ଧ ଅବସ୍ଥାରେ ଉଦ୍ଧାର ହୋଇଛି । ମୃତ ମହିଳା ଇନ୍ସପେକ୍ଟର ହେଉଛନ୍ତି ଶୀତଲ ୟେଦକେ । ସେ ମୁମ୍ବାଇ ପୁଲିସରେ ସବ୍-ଇନ୍ସପେକ୍ଟର ଭାବେ କାର୍ଯ୍ୟରତ ଥିଲେ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ, ଶୀତଲ ପ୍ରାୟ ଦେଢ ବର୍ଷ ହେବ ଛୁଟିରେ ଥିଲେ। ବର୍ଷେରୁ ଅଧିକ ସମୟ ଛୁଟିରେ ରହିବା କାରଣରୁ ତାଙ୍କ ବିରୋଧରେ ବିଭାଗୀୟ କାର୍ୟ୍ୟାନୁଷ୍ଠାନ ଆରମ୍ଭ ହୋଇଥିଲା। ତେବେ ତାଙ୍କର ଏପରି ମୃତ୍ୟୁ ପଛର କାରଣ କ’ଣ ତାହା ରିପୋର୍ଟ ଲେଖାହେଲା ପର୍ୟ୍ୟନ୍ତ ସ୍ପଷ୍ଟ ହୋଇପାରି ନଥିଲା । ପୁଲିସ ମୃତ ମହିଳା ପୁଲିସ ଅଧିକାରୀଙ୍କ ମୃତ୍ୟୁର ଯାଞ୍ଚ ଆରମ୍ଭ କରି ଦେଇଛି। ଶୀତଲ ମୁମ୍ବାଇର କୁର୍ଲା ଉପନଗର ଅଞ୍ଚଳରେ ଏକୁଟିଆ ରହୁଥିଲେ । ସେ ଯେଉଁ ଘରେ ରହୁଥିଲେ ତାହାର କବାଟ କିଛି ଦିନ ହେବ ବନ୍ଦ ରହିଥିଲା। ଏଥିସହିତ ଉକ୍ତଘର ମଧ୍ୟରୁ ଦୁର୍ଗନ୍ଧ ବାହାରୁଥିଲା। ଏହାପରେ ସ୍ଥାନୀୟ ଲୋକେ ପୁଲିସ୍କୁ ଖବର ଦେଇଥିଲେ ।
ପୁଲିସ୍ ଘଟଣାସ୍ଥଳରେ ପହଞ୍ଚି କବାଟ ଭାଙ୍ଗି ଭିତରକୁ ପଶିଥିଲା। ଘର ଭିତରେ ଶୀତଲଙ୍କ ମୃତଦେହ ଚଟାଣରେ ପଡ଼ିଥିବା ପୁଲିସ ଦେଖିବାକୁ ପାଇଥିଲା। ଶୀତଲଙ୍କ ମୃତଦେହ ସମ୍ପୂର୍ଣ୍ଣ ପଚି ଯିବା ସହିତ ସେଥିରୁ ଗନ୍ଧ ବାହାରୁଥିଲା। ତେବେ ଶୀତଲ ଜୀବନ ହାରିଛନ୍ତି ନା ଆଉ କିଛି କାରଣରୁ ତାଙ୍କର ମୃତ୍ୟୁ ହୋଇଛି ସେଦିଗରେ ଯାଞ୍ଚ କରୁଛି ପୁଲିସ। ପୁଲିସ୍ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ବ୍ୟବଚ୍ଛେଦ ରିପୋର୍ଟ ଆସିଲେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ବରିଷ୍ଠ ପୁଲିସ୍ ଅଧିକାରୀ ସୂଚନା ଦେଇଛନ୍ତି।