କନକ ବ୍ୟୁରୋ: ନାଗପୁର ଟେଷ୍ଟର ପ୍ରଥମ ଇଂନିସରେ ଅଗ୍ରଣୀ ହାସଲ କରିଛି ଟିମ୍ ଇଣ୍ଡିଆ । ରୋହିତ ଶର୍ମା ପ୍ରଥମ ଇଂନିସରେ ଶତକ ହାସଲ କରିଥିବାବେଳେ, ରବୀନ୍ଦ୍ର ଜାଡେଜା ଓ ଅକ୍ଷର ପଟେଲ ମଧ୍ୟ ଅର୍ଦ୍ଧଶତକ ହାସଲ କରିଛନ୍ତି । ତେବେ ଅଷ୍ଟ୍ରେଲିଆ ପକ୍ଷରୁ ଅଫ୍ ସ୍ପିନର ଟଡ୍ ମର୍ଫି ଭାରତୀୟ ବ୍ୟାଟ୍ସମ୍ୟାନମାନଙ୍କୁ ଅସୁବିଧାରେ ପକାଇବା ସହ ୫ ୱିକେଟ୍ ସଫଳତା ପାଇଛନ୍ତି । ବିରାଟ କୋହଲି, ଚିତେଶ୍ୱର ପୂଜାରା, କେ ଏଲ ରାହୁଲ, ଆର ଅଶ୍ୱିନୀଙ୍କ ସହ କେଏସ୍ ଭରତଙ୍କର ମଧ୍ୟ ୱିକେଟ୍ ନେଇଛନ୍ତି ମର୍ଫି । ତେବେ ଅଷ୍ଟ୍ରେଲିଆର ଦ୍ୱିତୀୟ ବୋଲର ହିସାବରେ ଡେବ୍ୟୁ ମ୍ୟାଚରେ ସେ ଏହି ସଫଳତା ପାଇଛନ୍ତି । ତେବେ ଏହି ଖେଳାଳି ଜଣକ କିଏ ଆପଣ ଜାଣିଛନ୍ତି କି?
Kanak News is now on WhatsApp
Join and get latest news updates delivered to you via WhatsApp
୨୨ ବର୍ଷୀୟ ଏହି ପ୍ରତିଭାବାନ କ୍ରିକେଟର ନାଗପୁର ଟେଷ୍ଟରେ ନିଜ କ୍ୟାରିୟର ଆରମ୍ଭ କରିଛନ୍ତି । ଟଡ୍ ମର୍ଫିଙ୍କୁ ନାଥନ୍ ଲାୟନଙ୍କ ଉତ୍ତରାଧିକାରୀ ବି କେହି କେହି କହୁଛନ୍ତି । ଅଷ୍ଟ୍ରେଲିଆର ଅନୁଭବୀ ସ୍ପିନର ଜାମ୍ପାଙ୍କ ଅନୁପସ୍ଥିତିରେ ଦଳରେ ସାମିଲ ହୋଇଛନ୍ତି ଟଡ୍ ମର୍ଫି । ଦଳର ମ୍ୟାନେଜମେଣ୍ଟ ତାଙ୍କ ଉପରେ ଭରସା ରଖିଥିବାବେଳେ, ଏହି ଭରସାକୁ ମଧ୍ୟ ଭାଙ୍ଗିନାହାଁନ୍ତି ମର୍ଫି ।
ଘରୋଇ କ୍ରିକେଟରେ ମର୍ଫିଙ୍କ ପ୍ରଦର୍ଶନ ବେଶ ଦମଦାର ଥିଲା । ଗତ ଘରୋଇ ସିଜିନରେ ସେ ଚମକ୍ରାର ପ୍ରଦର୍ଶନ କରିବା ସହିତ ଦଳରେ ସୁଯୋଗ ପାଇଥିଲେ । ଆଉ ଟିମ୍ ଇଣ୍ଡିଆ ବିପକ୍ଷରେ ସୁଯୋଗ ପାଇବା ମାତ୍ରକେ ସେ ତାଙ୍କର ଜଲୱା ଦେଖାଇଛନ୍ତି । ଟଡ୍ ମର୍ଫି ସେଫିଲ୍ଡ ସିଲ୍ଡ ଲିଗର ୭ଟି ମ୍ୟାଚରୁ ୨୯ଟି ସଫଳତା ପାଇଥିଲେ । ଏହି ସମୟରେ ତାଙ୍କର ଆଭରେଜ୍ ଥିଲା ୨୫.୨୦ । ତେବେ ଅଷ୍ଟ୍ରେଲିଆର ବିଗ ବାସ୍ ଲିଗରେ ସେ ସିଡନୀ ସିକ୍ସର ପକ୍ଷରୁ ମଧ୍ୟ କ୍ରିକେଟ୍ ଖେଳିଛନ୍ତି ।
ସୂଚନାଯୋଗ୍ୟ ଯେ, ୧୯୮୮ ମସିହା ପରେ ପ୍ରଥମ ଥର ପାଇଁ ଅଷ୍ଟ୍ରେଲିଆ ନିଜ ଚୂଡାନ୍ତ ଏକାଦଶରେ ଦୁଇ ଜଣ ଅଫ୍ ସ୍ପିନରଙ୍କୁ ସାମିଲ କରିଥିଲା । ନାଥନ୍ ଲିୟନଙ୍କ ସହ ଟଡ୍ ମର୍ଫି ମଧ୍ୟ ଚୂଡାନ୍ତ ଏକାଦଶରେ ସ୍ଥାନ ପାଇଥିଲେ । ଏହା ପୂର୍ବରୁ ପ୍ରାୟ ୩୫ ବର୍ଷ ତଳେ ପାକିସ୍ତାନ ବିପକ୍ଷରେ ଅଷ୍ଟ୍ରେଲିଆ ପିଟର ଟେଲର ଓ ଟିମଙ୍କୁ ଦୁଇ ଜଣ ଅଫ୍ ସ୍ପିନର ଭାବେ ଦଳରେ ସାମିଲ କରିଥିଲା ।