କନକ ବ୍ୟୁରୋ: ଅବଧି ଶେଷ ହେବା ପରେ ବି ହୋଇପାରିଲାନି ଚେକଡ୍ୟାମ ନିର୍ମାଣ । ବାଦ ବିବାଦ ଯୋଗୁ ଆଗେଇ ପାରୁନି କାର୍ଯ୍ୟ । ନିମାପଡ଼ା ବ୍ଲକ ଧନୁଆ ପଞ୍ଚାୟତର ଶୁନଗୋରଡ଼ି ଗାଁ ନିକଟରେ“ଧନୁଆ” ନଦୀ ଉପରେ ପ୍ରକଳ୍ପ ନିର୍ମାଣ ପାଇଁ ୩କୋଟି ଟଙ୍କାର ଅନୁଦାନ ମିଳିବା ପରେ ୨୦୨୧ ମସିହା ଡ଼ିସେମ୍ବର ମାସରେ ଗଣ ଶିକ୍ଷାମନ୍ତ୍ରୀ ସମୀର ଦାଶ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିଥିଲେ । ପ୍ରକଳ୍ପ ସରିବାର ଅବଧି ଥିଲା ଜୁନ ୨୦୨୨ । କାର୍ଯ୍ୟ ମଧ୍ୟ ଆରମ୍ଭ ହୋଇସାରିଛି । ହେଲେ ସ୍ଥାନ ନିରୂପଣକୁ ନେଇ ପ୍ରକଳ୍ପ ସପକ୍ଷବାଦୀ ଏବଂ ବିପକ୍ଷବାଦୀ ମୁହାଁମୁହିଁ ହେବା ଫଳରେ କାର୍ଯ୍ୟ ଅଧାପନ୍ତରିଆ ଅବସ୍ଥାରେ ରହିଛି । ଫଳରେ ନିଦ୍ଧାରିତ ସମୟରେ କାର୍ଯ୍ୟ ଶେଷ ହୋଇପାରିନାହିଁ ।
Kanak News is now on WhatsApp
Join and get latest news updates delivered to you via WhatsApp
ନିମାପଡ଼ା ଅଞ୍ଚଳ ଦେଇ ପ୍ରବାହିତ ହୋଇଥିବା ଧନୁଆ ନଦୀରେ ବନ୍ୟା ଆସିବା ଫଳରେ ଚାଷୀମାନେ ବ୍ୟାପକ କ୍ଷତିଗ୍ରସ୍ତ ହୋଇଥାଆନ୍ତି । ବିଶେଷକରି ଧାନ, ପାନ ଏବଂ ପନିପରିବା ଫସଲ ସବୁ ନଷ୍ଟ ହୋଇଥାଏ । ବନ୍ୟାରେ ଖରିଫ ଧାନ ଏବଂ ପନିପରିବା ଫସଲ ନଷ୍ଟ ହେଉଥିବାରୁ ରବିଋତୁରେ ଧାନ, ଡାଲିଜତୀୟ ଏବଂ ପନିପରିବା ଚାଷ ପାଇଁ ଚାଷୀ ଆଗ୍ରହ ପ୍ରକାଶ କରିଥାଏ । ଖରାଦିନେ ପାଣିର ଅଭାବ ଯୋଗୁଁ ଚାଷ କାର୍ଯ୍ୟ ସଂପୂର୍ଣ୍ଣଭାବେ ପ୍ରଭାବିତ ହୋଇଥାଏ । ଚାଷୀମାଙ୍କ ମେରୁଦଣ୍ଡ ଭାଙ୍ଗିଯାଏ । ପ୍ରତିକୂଳ ପରିସ୍ଥିତିର ସମାଧାନ ନିମନ୍ତେ ଧନୁଆ ନଦୀ ଉପରେ ଚେକଡ୍ୟାମ ନିର୍ମାଣ ପାଇଁ ଚାଷୀକୂଳ ଦାବି କରିଆସୁଥିଲେ । ଦାବିକୁ ସମ୍ମାନ ଜଣାଇ ସରକାର ମଧ୍ୟ ଅନୁଦାନ ଯୋଗାଇ ଦେଇଥିଲେ । ଏହି ପ୍ରକଳ୍ପ ଦ୍ୱାରା ନିମାପଡ଼ା ଏବଂ ବାଲିପାଟଣା ବ୍ଲକର ପ୍ରାୟ ୧୦ରୁ ଅଧିକ ଗାଁର ପ୍ରାୟ ୧୦ ହଜାର ହେକ୍ଟର ଜମିକୁ ଜଳସେଚନ କରାଯାଇପାରନ୍ତା । ପ୍ରକଳ୍ପ କାର୍ଯ୍ୟ ଏବେ ଅଧାପନ୍ତରିଆ ଅବସ୍ଥାରେ ପଡ଼ିରହିଛି । କେବେ ସଂପୂର୍ଣ୍ଣ ହେବ ଉତ୍ତର କାହା ପାଖରେ ନାହିଁ ।