ଦରଦାମ ବୃଦ୍ଧିକୁ ନେଇ ଦେଶବ୍ୟାପୀ କଂଗ୍ରେସର ବିକ୍ଷୋଭ: ଗିରଫ ହେଲେ ରାହୁଲ ଗାନ୍ଧୀ, କଳା ପୋଷାକ ପିନ୍ଧି ରାସ୍ତାକୁ ଓହ୍ଲାଇଲେ ସାଂସଦ
କନକ ବ୍ୟୁରୋ: ଦରବୃଦ୍ଧିକୁ ନେଇ ସାରା ଦେଶରେ ବିକ୍ଷୋଭ ପ୍ରଦର୍ଶନ କରିଛି କଂଗ୍ରେସ । ଏହା ମଧ୍ୟରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ସମେତ ଏକାଧିକ ନେତାଙ୍କୁ ଗିରଫ କରିଛି ଦିଲ୍ଲୀ ପୋଲିସ । କଂଗ୍ରେସର ଅନେକ ସାଂସଦ କଳା ପୋଷାକ ପିନ୍ଧି ରାଜରାସ୍ତାକୁ ଓହ୍ଲାଇଛନ୍ତି । ରାହୁଲ ଗାନ୍ଧୀ ସାଂସଦଙ୍କ ସହ ସଂସଦ ଭବନଠାରୁ ରାଷ୍ଟ୍ରପତି ଭବନଯାଏଁ ଏକ ମାର୍ଚ୍ଚରେ ଯାଉଥିଲେ । କିନ୍ତୁ ପୂର୍ବରୁ ପୋଲିସ ଏହି ଇଲାକାରେ ନିସିଦ୍ଧ କରିବା ସହ ୧୪୪ ଧାରା ଲାଗୁ କରିଥିଲା । ତେଣୁ ମାର୍ଚ୍ଚରେ ଯାଉଥିବାରୁ ରାହୁଲ ଗାନ୍ଧୀଙ୍କୁ ହେପାଜତରେ ନେଇଛି ଦିଲ୍ଲୀ ପୋଲିସ ।
Kanak News is now on WhatsApp
Join and get latest news updates delivered to you via WhatsApp
ବରିଷ୍ଠ କଂଗ୍ରେସ ନେତା ପି. ଚିଦାମ୍ବରମ୍ କହିଛନ୍ତି ଯେ, ଦେଶର ମହଙ୍ଗା ମାଡ ସହ ଅଗ୍ନିପଥ ଯୋଜନାକୁ ବିରୋଧ କରି କଂଗ୍ରେସ ଏହି ବିରୋଧ ପ୍ରଦର୍ଶନ କରୁଛି । ରାଜନୈତିକ ଦଳ ହିସାବରେ ଗୁରୁତ୍ୱପୂର୍ଣ୍ଣ କର୍ତ୍ତବ୍ୟ ହେଉଛି ଲୋକଙ୍କ ପକ୍ଷରୁ ସରକାରଙ୍କ ବିରୋଧରେ ସ୍ୱର ଉଠାଇବା । ହେଲେ ସରକାର ସତ୍ୟର ସ୍ୱରକୁ ଦମନ କରୁଛନ୍ତି ବୋଲି ଚିଦାମ୍ବରମ୍ କହିଛନ୍ତି ।
ବର୍ଷା ସତ୍ତେ୍ୱ ଦିଲ୍ଲୀ ,ବିହାର, ତେଲେଙ୍ଗାନା, ରାଜସ୍ଥାନ ସମେତ ଦେଶର ବିଭିନ୍ନ ରାଜ୍ୟରେ କଂଗ୍ରେସର କର୍ମକର୍ତ୍ତାମାନେ ରାଜରାସ୍ତାରେ ବିରୋଧ ପ୍ରଦର୍ଶନ କରୁଛନ୍ତି । ହେଲେ ପରିସ୍ଥିତିକୁ ନିୟନ୍ତ୍ରଣ କରିବାକୁ ପୋଲିସ ତୟାର ରହିଛି । କଂଗ୍ରେସ କାର୍ଯ୍ୟାଳୟ ପାଖରେ ବ୍ୟାପକ ପୋଲିସ ମୁତୟନ କରାଯିବା ସହ ନେତାମାନଙ୍କୁ ଗିରଫ କରିନେବା ଉଦ୍ଦେଶ୍ୟରେ ବସ୍ ଗୁଡିକୁ ସଜାଗ ରଖାଯାଇଛି ।