ଜବର ଦଖଲରେ ଅଛି ୧୯ ହଜାର ୪୫୦ ଏକର ଜମି । ବିଧାନସଭାରେ ହିସାବ ଦେଲେ ରାଜସ୍ୱମନ୍ତ୍ରୀ ।
ବିଧାନସଭାରେ ରାଜସ୍ୱମନ୍ତ୍ରୀଙ୍କୁ ପ୍ରଶ୍ନ କରିଥିଲେ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ।
କନକ ବ୍ୟୁରୋ: ଚାଲିଛି ଷୋଡ଼ଶ ବିଧାନସଭାର ଅଧିବେଶନ । ସରକାରଙ୍କୁ ପ୍ରଶ୍ନ ପରେ ପ୍ରଶ୍ନ କରି ଚାଲିଛନ୍ତି ବିରୋଧୀ । ତେବେ ରାଜ୍ୟ ସରକାରଙ୍କ ଅଧିନରେ କେତେ ଜମି ରହିଛି ଏବଂ କେତେ ଜମି ବ୍ୟବସାୟିକ ସଂସ୍ଥା ଓ ଶିଳ୍ପ ସଂସ୍ଥାଙ୍କ ଜବର ଦଖଲରେ ରହିଛି ସେନେଇ ବିଧାନସଭାରେ ବିଭାଗୀୟ ମନ୍ତ୍ରୀଙ୍କୁ ପ୍ରଶ୍ନ କରିଛନ୍ତି ତାରା ପ୍ରସାଦ ବାହିନୀପତି । ଆଉ ଏନେଇ ପୁଙ୍ଖାନୁପୁଙ୍ଖ ଉତ୍ତର ରଖିଛନ୍ତି ରାଜସ୍ୱ ମନ୍ତ୍ରୀ ସୁଦାମ ମାର୍ଣ୍ଡି ।
Kanak News is now on WhatsApp
Join and get latest news updates delivered to you via WhatsApp
ରାଜସ୍ୱ ମନ୍ତ୍ରୀଙ୍କ ଜିଲ୍ଲାୱାରୀ ବିବରଣୀ ତଥ୍ୟ ମୁତାବକ, ରାଜ୍ୟର ୨୪ଟି ଜିଲ୍ଲାରେ ମୋଟ୍ ୧୯ ହଜାର ୪୫୦ ଏକର ଜମି ବ୍ୟବସାୟିକ ସଂସ୍ଥା ଓ ଶିଳ୍ପ ସଂସ୍ଥାଙ୍କ ଜବର ଦଖଲରେ ରହିଛି । ଯେଉଁଥିରେ ଗଞ୍ଜାମ ଜିଲ୍ଲାରେ ସର୍ବାଧିକ ୨ହଜାର ୮୭୭ ଏକର ବିଭିନ୍ନ ଶିଳ୍ପ ସଂସ୍ଥାଙ୍କ ଜବର ଦଖଲରେ ରହିଛି । ଅନ୍ୟପଟେ ନୂଆପଡ଼ାରେ ସର୍ବନିମ୍ନ ୪୭ ଡେସିମିଲ୍ ଜମି ଜବର ଦଖଲରେ ରହିଥିବା ମନ୍ତ୍ରୀଙ୍କ ଜିଲ୍ଲାୱାରୀ ରିପୋର୍ଟରେ ଉଲ୍ଲେଖ ରହିଛି ।
ଅନ୍ୟପଟେ ବିଧାନସଭାରେ ବିଭାଗୀୟ ମନ୍ତ୍ରୀ ରଖିଥିବା ଉତ୍ତରରେ ଉଲ୍ଲେଖ କି, ରାଜ୍ୟର ୨୪ଟି ଜିଲ୍ଲାରେ ମୋଟ୍ ୧ କୋଟି ୧୩ ଲକ୍ଷ ୨୭ ହଜାର ୫୧୨ ଏକର ଜମି ରାଜସ୍ୱ ବିଭାଗ ଅଧିନରେ ରହିଛି । ଯେଉଁଥିରେ ସମ୍ବଲପୁର ଜିଲ୍ଲାରେ ସର୍ବାଧିକ ୧୬ ଲକ୍ଷ ୩୦ ହଜାର ୨୯୨ ଏକର ଜମି ବିଭାଗ ଅଧିନରେ ରହିଛି । ସେହିଭଳି ଝାରସୁଗୁଡ଼ାରେ ସର୍ବନିମ୍ନ ୧୪ ହଜାର ୧୯୯ ଏକର ଜମି ରାଜସ୍ୱ ବିଭାଗ ଅଧିନରେ ସୁରକ୍ଷିତ ରହିଛି । ତେବେ ରାଜ୍ୟକୁ ଜବରଦଖଲ ମୁକ୍ତ କରିବାକୁ ସରକାର ଘୋଷଣା କରିଥିଲେ କି? ଏବାବଦରେ କି ପକ୍ଷେପ ନେଇଛନ୍ତି ରାଜ୍ୟ ସରକାର ଓ ବିଭାଗୀୟ ମନ୍ତ୍ରୀ ପ୍ରଶ୍ନ ଏଭଳି ବାଣରେ ଘାଇଲା କରିଛନ୍ତି କଂଗ୍ରେସ ବିଧାୟକ ତାରା ବାହିନୀପତି ।