ସାଙ୍ଗ ନା ସଇତାନ ? ଫେଲ ମାରିଲା ହତ୍ୟା ଷଡଯନ୍ତ୍ର, ଗିରଫ ହେଲେ ୨ ବନ୍ଧୁ
କନକ ବ୍ୟୁରୋ: ଫେଲ ମାରିଲା ହତ୍ୟା ଷଡଯନ୍ତ୍ର । ବନ୍ଧୁକୁ ହତ୍ୟା କରିବା ପାଇଁ ଦୁଇବନ୍ଧୁଙ୍କ ଷଡଯନ୍ତ୍ର ଫସର ଫାଟିଲା । ନିଜ ସାଙ୍ଗର ଜୀବନ ନେବା ପାଇଁ ଇଞ୍ଜିନିୟରିଂ କଲେଜରେ ପଢୁଥିବା ଦୁଇବନ୍ଧୁଙ୍କ ମର୍ଡର ପ୍ଲାନରେ ପାଣି ପଡି ଯାଇଛି । ଆଉ ଦୁଇ ଷଡଯନ୍ତ୍ରକାରୀଙ୍କୁ ଗିରଫ କରିଛି ପୋଲିସ ।
Kanak News is now on WhatsApp
Join and get latest news updates delivered to you via WhatsApp
ତେବେ ଭୁବନେଶ୍ୱର ଇନଫୋସିଟି ଥାନା ଅଂଚଳ ଏକ ଘରୋଇ ଇଂଜିନିଅରିଂ କଲେଜରେ ଜଣେ ସାଙ୍ଗକୁ ହତ୍ୟା କରିବା ପାଇଁ ଦୁଇ ବନ୍ଧୁ ଷଡଯନ୍ତ୍ର ରଚିଥିଲେ । ଆରୟନ୍ ସିଂହ ଓରଫ ମୋଲୁ ଏବଂ ଉତ୍ସବ ସିଂହ ଓରଫ ବାବୁ ଦୁଇ ଛାତ୍ରଙ୍କୁ କେତେକ ସଂଗୀନ ଅଭିଯୋଗ ଆଧାରରେ କଲେଜ କର୍ତ୍ତୃପକ୍ଷ ବାହାର କରି ଦେଇଥିଲେ । ତେବେ ଉକ୍ତ ୨ ଜଣଙ୍କ ସହ ହଷ୍ଟେଲରେ ରହୁଥିବା ଜଣେ ସହପାଠୀଙ୍କ ଝଗଡା ହୋଇଥିଲା । ଏହାକୁ ନେଇ ବେଶ୍ କ୍ଷୁବ୍ଧ ଥିଲେ ଦୁଇ ସାଙ୍ଗ ମୋଲୁ ଓ ବାବୁ ।
ବାବୁର ଘର ବିହାର ହୋଇଥିବା ବେଳେ ସେ ଗାଁକୁ ଯାଇ ସେଠାରୁ ଏକ ଚୋରା ବନ୍ଧୁକ ଆଣିଥିଲା । ତେବେ ନିଜ ଭିତରେ ସୃଷ୍ଟି ହୋଇଥିବା ବିବାଦକୁ ସବୁଦିନ ପାଇଁ ତୁଟାଇବାକୁ ହଷ୍ଟେଲ ପହଂଚିଥିଲେ ମୋଲୁ ଓ ବାବୁ । ନିଜ ସାଙ୍ଗକୁ ହତ୍ୟା କରିବା ନେଇ ପୂର୍ବ ପ୍ରସ୍ତୁତି କରି ପହଂଚିଥିଲେ । ମାତ୍ର ଫେଲ ମାରିଥିଲା ପୂରା ଅପରେସନ । ହଷ୍ଟେଲ ନିକଟରେ ପୋଲିସ ପହଂଚି ଦୁଇ ଇଂଜିନିୟରିଂ ଛାତ୍ରଙ୍କୁ ଗିରଫ କରିଛି । ତାଙ୍କ ପାଖରୁ ପୋଲିସ ୩ଟି ଗୁଳି ସମେତ ଏକ ବନ୍ଧୁକ ଜବତ କରିଛି । ଇନ୍ଫୋସିଟି ଥାନାରେ ଏନେଇ ଧାରା ୫୦୬ ଆଇପିଏସ, ବେଆଇନ ଅସ୍ତ୍ରଶସ୍ତ୍ର ଆଇନ ୨୫ ଓ ୨୭ ଧାରାରେ ମାମଲା ରୁଜୁ ହୋଇଛି ।