ମୋବାଇଲ ନେଇଗଲା ଜୀବନ । ଚାର୍ଜରେ ବସିଥିବା ବେଳେ କଲ ରିସିଭ୍ କରିବା ହେଲା ଛାତ୍ରଙ୍କ ପାଇଁ କାଳ
କନକ ବ୍ୟୁରୋ : ମୋବାଇଲରେ କଥା ହେବା ହେଲା କାଳ । ବିଦ୍ୟୁତ୍ ଅଘାତରେ ଚାଲିଗଲା କଲେଜ ଛାତ୍ରଙ୍କ ଜୀବନ । କଲେଜ ପଢ଼ି ବଡ଼ ମଣିଷ ହେବାକୁ ସଂଘର୍ଷ କରୁଥିବା ଜଣେ ଆଦିବାସୀ ଯୁବକଙ୍କ ଜୀବନ ଚାଲିଯାଇଛି । ମୋବାଇଲରେ କଥା ହେବା ସମୟରେ ବିଦ୍ୟୁତ୍ ଆଘାତ ଲାଗିବାରୁ ଗିରକାନପାଲୀ ଅଂଚଳର କାମା ମାଢ଼ିଙ୍କ ମୃତ୍ୟୁ ହୋଇଛି । କାମା ମାଢ଼ି କାଲିମେଳା ତାରିଣୀ ମନ୍ଦିର ସାହିରେ ଥିବା ନିଜ ନାନି ଘରେ ରହି କାଲିମେଳା କଲେଜରେ +୩ ପ୍ରଥମ ବର୍ଷରେ ପାଠ ପଢ଼ୁଥିଲେ ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ରାତିରେ କାମା ମାଢ଼ି ମାଟି କାନ୍ଥରେ ଲାଗିଥିବା ଏକ ବିଦ୍ୟୁତ୍ ବୋର୍ଡ଼ରେ ମୋବାଇଲ ଚାର୍ଜ କରି ନିଜ ଭଣଜାକୁ ଖାଇବାକୁ ଦେଉଥିଲେ । ଠିକ୍ ଏତିକି ବେଳେ ଏକ କଲ ଆସିଥିଲା । କାମା କଲ ରିସିଭ କରିବା ସମୟରେ ହଠାତ୍ ମୋବାଇଲରେ ବିଦ୍ୟୁତ୍ ଚାର୍ଜ ହୋଇଯାଇଥିଲା । ଫଳରେ କାମା କଥା ହେଉଥିବା ସମୟରେ ବିଦ୍ୟୁତ ଝଟକା ଖାଇ ତଳେ ପଡ଼ିଯାଇଥିଲେ । ତଳେ ଥିବା ପାଣି ହାଣ୍ଡିରେ ପଡ଼ିଯିବାରୁ ଘର ସାରା ବିଦ୍ୟୁତ୍ ଚାର୍ଜ ହୋଇଯାଇଥିଲା । ଏହା ଦେଖି ପାଖରେ ଥିବା ୫ବର୍ଷର ଭଣଜା ପାଟି କରିଥିଲା ।
ଏହା ଶୁଣିପାରି ସାହି ପଡ଼ିଶା ଲୋକ କାମା ମାଢ଼ିଙ୍କୁ କାଲିମେଳା ମେଡ଼ିକାଲ ଆଣିଥିଲେ, ଡାକ୍ତରଖାନାରେ ପହଂଚିବା ବେଳକୁ ତାଙ୍କ ମୃତ୍ୟୁ ହୋଇସାରିଥିଲା । ମୃତ ଛାତ୍ରର ବାମ ହାତ ପାପୁଲି ପୋଡ଼ି ଯାଇଥିବା ବେଳେ ଛାତିରେ ମଧ୍ୟ ଆଘାତ ଲାଗିଛି । ଖବର ପାଇ ଆଜି କାଲିମେଳା ପୁଲିସ ଘଟଣାସ୍ଥଳକୁ ଯାଇ ତଦନ୍ତ କରିବା ସହ ଶବ ବ୍ୟବଛେଦ କରାଇଛି । ଟିକେ ଅସାବଧାନତା ଯୋଗୁଁ ଜଣେ କଲେଜ ଛାତ୍ରର ଜୀବନ ଚାଲି ଯାଇଛି । ପୁଅକୁ ନେଇ ବାପା ମା’ ଦେଖିଥିବା ସ୍ୱପ୍ନ ବିଦ୍ୟୁତ୍ ଆଘାତରେ ପୋଡି ପାଉଁଶ ହୋଇଯାଇଛି ।