ଅମିତ ଶାହାଙ୍କ ଦମ୍ଭୋକ୍ତି । କହିଲେ, ଆଗକୁ ବିଜେପି ଓଡିଶା ଦଖଲ କରିବାକୁ ଯାଉଛି
କନକ ବ୍ୟୁରୋ: ଦୁଇ ଦିନିଆ ଓଡିଶା ଗସ୍ତରେ ଆସି କେନ୍ଦ୍ର ଗୃହମନ୍ତ୍ରୀ ଅମିତ ଶାହା ବିଭିନ୍ନ କାର୍ଯ୍ୟକ୍ରମରେ ଯୋଗ ଦେଇଛନ୍ତି । ତେବେ ଅପରାହ୍ନରେ ହୋଟେଲ ମେ ଫେୟାରରେ ଆୟୋଜିତ ମୋଦି ଆଟ୍ ୨୦ ବୁକ ରିଡିଂ କାର୍ଯ୍ୟକ୍ରମରେ ଯୋଗଦେଇ, ଓଡିଶାରେ ବିଜେପି ସରକାର ଗଢିବ ବୋଲି ଦମ୍ଭ ଦେଖାଇଛନ୍ତି ଅମିତ ଶାହ ।
Kanak News is now on WhatsApp
Join and get latest news updates delivered to you via WhatsApp
ମୋଦି ଆଟ ୨୦ ଡ୍ରିମ୍ସ ମିଟ୍ ଡେଲିଭରି ଓଡିଶା ଚାପ୍ଟରର ଲୋକାର୍ପଣ କରି କେନ୍ଦ୍ର ଗୃହମନ୍ତ୍ରୀ କହିଛନ୍ତି ସାରାଦେଶରେ ଧାରଣା ରହିଥିଲା ଯେ, ବିଜେପି କେବଳ ହିନ୍ଦୀ ଭାଷାଭାଷି ଅଞ୍ଚଳରେ ନିର୍ବାଚନ ଜିତିବାକୁ ସମର୍ଥ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏହାକୁ ଭୁଲ ପ୍ରମାଣିତ କରି ଦେଖାଇଛି ବିଜେପି । ଉତ୍ତର ପୂର୍ବ ଭାରତରେ ଏବେ ବିଜେପିର ସରକାର ରହିଛି । ମହାରାଷ୍ଟ୍ର ଓ ଗୁଜରାଟ ମଧ୍ୟ ହିନ୍ଦୀ ଭାଷାଭାଷି କ୍ଷେତ୍ର ନୁହେଁ । ଏମିତିକି ଅଭେଦ୍ୟ ଗଡ କୁହାଯାଉଥିବା ଦକ୍ଷିଣ ଭାରତର କର୍ଣ୍ଣାଟକ ମଧ୍ୟ ଭାରତୀୟ ଜନତା ପାର୍ଟି ଦଖଲକୁ ଆସିଛି । ତେଣୁ ଆଗକୁ ବିଜେପି ଓଡିଶା ଦଖଲ କରିବାକୁ ଯାଉଛି ବୋଲି କହିଛନ୍ତି ଅମିତ ଶାହା ।
ବିଜେପି ଚାଣକ୍ୟଙ୍କ ଏହି ଦମ୍ଭୋକ୍ତି ରାଜ୍ୟ ରାଜନୀତିରେ ବଡ କମ୍ପନ ସୃଷ୍ଟି କରିଛି । କାରଣ ଦିନ ତମାମ ବିଭିିନ୍ନ କାର୍ଯ୍ୟକ୍ରମରେ ଯୋଗ ଦେଲାବେଳେ ବେଶ ଶାନ୍ତି ଓ ନରମ ଆଭିମୁଖ୍ୟ ରଖିଥିଲେ କେନ୍ଦ୍ର ଗୃହମନ୍ତ୍ରୀ । ସ୍ୱାଭାବିକ ଭାବେ ବେଶ ଆକ୍ରମଣାତ୍ମକ ରାଜନେତା ଭାବେ ଜଣାଶୁଣା ବିଜେପିର ଦ୍ୱିତୀୟ କ୍ଷମତାଶାଳୀ ନେତା ରାଜ୍ୟ ସରକାରଙ୍କ ବିରୋଧରେ ସେଭଳି କୌଣସି ଶାଣିତ ଟପ୍ପଣୀ କରିନଥିଲେ । ହେଲେ ଦଳୀୟ ନେତାଙ୍କ ସହ ବୈଠକ ପରେ ମେ ଫେୟାର କାର୍ଯ୍ୟକ୍ରମରେ ସରକାର ଗଢିବାର ଶାଣିତ ବାଣ ମାରିଥିଲେ । ଏଥିରେ ଉତ୍ସାହିତ ହୋଇ ଦଳୀୟ ନେତା ମଧ୍ୟ ରାଜ୍ୟରେ ଆଗୁଆ ନିର୍ବାଚନ ହେବ ବୋଲି ମତ ରଖିଛନ୍ତି ।