କନକ ବ୍ୟୁରୋ: ବେଶ ରୋଚକ ହେଉଛି କର୍ଣ୍ଣାଟକ ନିର୍ବାଚନର ପ୍ରାକ-ମାହୋଲ । ଘନଘନ ପ୍ରଚାର ସାଙ୍ଗକୁ ବିବାଦୀ ବୟାନବାଜୀ ।ଭୋଟ ପାଇଁ ଚାଲିଛି ଦଳରମାନଙ୍କର କସରତ । ବିଶେଷ କରି ଦୁଇ ପ୍ରମୁଖ ପ୍ରତିନ୍ଦନ୍ଦୀ ବିଜେପି-କଂଗ୍ରେସ ମଧ୍ୟରେ ଟକ୍କର କେତେ ଯେ ବଡ ଧରଣର ହେବ ସେକଥା ପ୍ରଚାର ମଇଦାନରେ ସ୍ପଷ୍ଟ ଦେଖିବାକୁ ମିଳିଛି । ଏହା ଭିତରେ ସୋମବାର ନିର୍ବାଚନୀ ଇସ୍ତାହାର ଜାରି କରିଛି ବିଜେପି । ସବୁବର୍ଗଙ୍କୁ ଦୃଷ୍ଟିରେ ରଖିବା ସହ ଜାତିଗତ କାର୍ଡ ମଧ୍ୟ ଖେଳିଛି । ଏଥିସହ ମହିଳା ସଂଶକ୍ତିକରଣ ଓ ଯୁବ ବିକାଶ ଉପରେ ମଧ୍ୟ ଗୁରୁତ୍ୱ ଦେଇଛି ବିଜେପି ।
Kanak News is now on WhatsApp
Join and get latest news updates delivered to you via WhatsApp
କଳେବଳେ କୌଶଳେ କର୍ଣ୍ଣାଟକ ଶାସର କ୍ଷମତା ପୁଣି ଥରେ ନିଜ ହାତକୁ ଆଣିବା ପାଇଁ ଜୋରଦାର କସରତ କରୁଛି ବିଜେପି । ମେ ୧୦ରେ ବିଧାନସଭା ନିର୍ବାଚନ ପାଇଁ ପଡିବ ଭୋଟ । ଏହା ପୂର୍ବରୁ ଭୋଟରଙ୍କୁ ଆକୃଷ୍ଟ କରିବା ପାଇଁ ପ୍ରତିଶ୍ରୁତିର ବର୍ଷା କରିଛି ବିଜେପି । ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ବିଜେପି ନିର୍ବାଚନୀ ଇସ୍ତାହାର ପ୍ରଜାଧ୍ୱନୀ ଘୋଷଣା କରିଛନ୍ତି । ଏଥରକ ନିର୍ବାଚନୀ ଇସ୍ତାହାରରେ ମହିଳା ସଂଶକ୍ତିକରଣ, ଯୁବଙ୍କ ପାଇଁ କଲ୍ୟାଣକାରୀ ଯୋଜନା ଉପରେ ଗୁରୁତ୍ୱ ଦେଇଛି ଦଳ । ଏଥିସହ ପାଇଁ ଲିଙ୍ଗାୟତଙ୍କ ପାଇଁ କିଛି ବଡ ଘୋଷଣା କରିଛି ଦଳ । ନଜର ପକାନ୍ତୁ ବିଜେପିର ନିର୍ବାଚନୀ ଇସ୍ତାହାରର ଉପରେ:
କର୍ଣ୍ଣାଟକ ପାଇଁ ବିଜେପିର ପ୍ରତିଶ୍ରୁତି ବର୍ଷା
• ରାଜ୍ୟରେ ଲାଗୁ ହେବ ୟୁନିଫର୍ମ ସିଭିଲ କୋର୍ଡ
• ବିପିଏଲ ପରିବାରକୁ ବର୍ଷକୁ ମିଳିବ ୩ଟି ମାଗଣା ଗ୍ୟାସ ସିଲିଣ୍ଡର
• ପ୍ରତ୍ୟେକ ୱାର୍ଡରେ ଖୋଲାଯିବ ଅଟଳ ଆହାର କେନ୍ଦ୍ର
• ବିପିଏଲ ପରିବାରକୁ ପ୍ରତିଦିନ ମିଳିବ ଅଧା ଲିଟର କ୍ଷୀର
• ଚାଷୀଙ୍କ ପାଇଁ ୫ଲକ୍ଷ ପର୍ଯ୍ୟନ୍ତ ଋଣରେ ସୁଧ ଲାଗିବନି
• ଚାଷୀଙ୍କୁ ବିହନ ପାଇଁ ପ୍ରତିବର୍ଷ ଦଶ ହଜାର ମିଳିବ
• ଗରିବ ପରିବାରଙ୍କୁ ପ୍ରତିମାସରେ ମାଗଣା ୫କିଲୋ ଚାଉଳ ଓ ଗହମ ଦିଆଯିବ
• ଓନରସିପ୍ ଆକ୍ଟରେ ସଂଶୋଧନ କରାଯିବ
• ସାମାଜିକ ନ୍ୟାୟ ନିଧୀ ସ୍କିମ ଲାଗୁ ହେବ
• ଅନୁସୂଚିତ ଜାତିର ମହିଳାଙ୍କୁ ଲକ୍ଷେ ଟଙ୍କା ଏଫଡି ସୁବିଧା ଦିଆଯିବ
• ୧୦ଲକ୍ଷ ବାସହୀନଙ୍କୁ ଘର ମିଳିବ
• ବରିଷ୍ଠନାଗରିଙ୍କ ମାଗଣା ବାର୍ଷିକ ସ୍ୱାସ୍ଥ୍ୟ ପରିକ୍ଷା ସୁବିଧା ପ୍ରଦାନ କରାଯିବ
• ପର୍ଯ୍ୟଟନ କ୍ଷେତ୍ରର ବିକାଶ ପାଇଁ ୧୫ହଜାର କୋଟିର ବଜେଟ ରହିଛି
କର୍ଣ୍ଣାଟକ ପାଇଁ କେତେବେଳେ ସମୀକରଣ ବଦଳୁଛି ତ ପୁଣି କେବେ ଟିକେଟ ବଂଟନକୁ ନେଇ ବାଦ ବିବାଦ ବଢିବାରେ ଲାଗିଛି । ଏଥିସହ ଦଳ ଡିଆଁ ପର୍ବରେ କେବେ ବିଜେପିକୁ ଝଟକା ଲାଗୁଛି ତ ପୁଣି କେବେ କଂଗ୍ରେସ ଦୋହଲିଯାଉଛି । ଏବେ ବିଜେପି ନିର୍ବାଚନୀ ଇସ୍ତାହାର ଜାରି କରିବା ପରେ ଆଗକୁ ଅପେକ୍ଷା କଂଗ୍ରେସକୁ । ଦଳ ବିଜେପିକୁ ଟକ୍କର ଦେବା ପାଇଁ ନିଜ ନିର୍ବାଚନୀ ଇସ୍ତାହାରରେ କଣ ସବୁ ରଖିବ ଏହା ଉପରେ ନଜର ରହିବ ।
କର୍ଣ୍ଣାଟକ ରାଜନୀତିରେ ପ୍ରତି ୫ବର୍ଷରେ ସରକାର ପରିବର୍ତନ ଧାରା ରହିଛି । ତଥାପି ସମସ୍ତ ଚ୍ୟାଲେଂଜକୁ ଗ୍ରହଣ କରି ବିଜେପି ପୁଣି ଥରେ କର୍ଣ୍ଣାଟକକୁ ନିଜ ହାତମୁଠାକୁ ନେବା ପାଇଁ ପ୍ରତିଶ୍ରୁତିବର୍ଷା କରିଛି ।ଆଉ ଏହି ପ୍ରତିଶ୍ରୁତି ଭୋଟରଙ୍କୁ କେତେ ଆକୃଷ୍ଟ କରିବ ତାହା ଆଗାମୀ ନିର୍ବାଚନ ଫଳାଫଳରେ ଜଣାପଡିବ ।
୨୨୪ ବିଧାନସଭା ଆସନ ପାଇଁ ଦୁଇଟି ପ୍ରମୁଖ ଦଳ ବିଜେପି ଓ କଂଗ୍ରେସ ମଧ୍ୟରେ ଜୋରଦାର ଟକ୍କର ହେବା ସମ୍ଭାବନା ରହିଛି । ନିର୍ବାଚନୀ ପ୍ରଚାରରୁ ଜଣାପଡୁଛି ଏଥରକ ହେବ କଡ଼ା ଟକ୍କର । କର୍ଣ୍ଣାଟକ ଶାସନ ଗାଦୀରେ କିଏ ବସିବେ ସେକଥା ମେ ୧୩ରେ ସ୍ପଷ୍ଟ ହେବ । ବିଜେପି ପୁଣି ଥରେ ଫେରିବ ନା କଂଗ୍ରେସ ପାଇଁ କିଛି ଚମକ୍ରାର ହେବ ସେକଥା ନିର୍ବାଚନ ଫଳାଫଳରେ ଜଣାପଡିବ ।