ବାଲେଶ୍ୱରରୁ ବକ୍ସର, ବିଜୟନଗରମରୁ ଫତେଗଡ ସାହିବ । ଗୋଟିଏ ବର୍ଷ ଭିତରେ ଏହି ସବୁ ଟ୍ରେନ୍ ଦୁର୍ଘଟଣା ଦେଖିଲାଣି ଦେଶ…
କନକ ବ୍ୟୁରୋ: ପଶ୍ଚିମବଙ୍ଗର ନିଉ ଜଲପାଇଗୁଡିରେ ଭୟଙ୍କର ଟ୍ରେନ୍ ଦୁର୍ଘଟଣା । ଗୋଟିଏ ମାଲବାହୀ ଟ୍ରେନ୍ କାଞ୍ଚନଜଙ୍ଗା ଏକ୍ସପ୍ରେସକୁ ପଛପଟୁ ଧକ୍କା ଦେବାରୁ ଏହି ବଡ ଦୁର୍ଘଟଣା ଘଟିଛି । ଦୁର୍ଘଟଣାରେ କାଞ୍ଚନଜଙ୍ଗା ଏକ୍ସପ୍ରେସର କିଛି ବଗି ଲାଇନଚ୍ୟୁତ୍ ହେଇଛି । ତେବେ ୨୦୨୪ରେ ଦେଶ ଦେଖିଛି ଗୋଟିଏ ପରେ ଗୋଟିଏ ବଡ ଟ୍ରେନ୍ ଦୁର୍ଘଟଣା । ବାଲେଶ୍ୱର ବାହାନଗା ଟ୍ରେନ୍ ଦୁର୍ଘଟଣାଠୁ ଆରମ୍ଭ କରି ବିଜୟନଗରମ୍ ଆଦି ଜାଗାରେ ଟ୍ରେନ୍ ଦୁର୍ଘଟଣାରେ ସାଧାରଣ ଲୋକଙ୍କ ଜୀବନ ଯାଇଛି । ନଜର ପକାନ୍ତୁ, ଗତ କିଛି ବର୍ଷ ଭିତରେ ଘଟିଥିବା ସେମିତି କିଛି ଟ୍ରେନ୍ ଦୁର୍ଘଟଣା ଉପରେ…
Kanak News is now on WhatsApp
Join and get latest news updates delivered to you via WhatsApp
ବାଲେଶ୍ୱର
୨୦୨୩ ଜୁନ୍ ୨ ତାରିଖରେ ବାଲେଶ୍ୱରର ବାହାନଗାରେ ଘଟିଥିଲା ମର୍ମନ୍ତୁଦ ଟ୍ରେନ୍ ଦୁର୍ଘଟଣା । ଯେଉଁଥିରେ ୨୯୬ ଜଣ ଲୋକ ପ୍ରାଣ ହରାଇଥିଲେ । ଖାଲି ସେତିକି ନୁହେଁ ଏକ ହଜାରରୁ ଅଧିକ ଲୋକ ଏଥିରେ ଆହତ ହେବାର ମଧ୍ୟ ସୂଚନା ରହିଥିଲା । ତେବେ କରମଣ୍ଡଳ ଏକ୍ସପ୍ରେସର ଏହି ଦୁର୍ଘଟଣା ଆଜି ବି ଲୋକଙ୍କ ମନରୁ ଲିଭିନି ।
ବିଜୟନଗରମ୍
୨୦୨୩ ମସିହା ଅକ୍ଟୋବର ୨୯ ତାରିଖରେ ଆନ୍ଧ୍ରପ୍ରଦେଶରେ ଦୁଇଟି ପାସେଞ୍ଜର ଟ୍ରେନ୍ ଭିତରେ ଦୁର୍ଘଟଣା ଘଟିଥିଲା । ଏହି ଦୁର୍ଘଟଣାରେ ୧୪ ଜଣ ଯାତ୍ରୀ ପ୍ରାଣ ହରାଇଥିଲେ । ହାୱଡା-ଚେନ୍ନାଇ ଲାଇନ୍ ଉପରେ ରାୟଗଡା ପାସେଞ୍ଜର ଟ୍ରେନ୍ ବିଶାଖାପାଟଣା ପଲାସା ଟ୍ରେନକୁ ଧକ୍କା ଦେଇଥିଲା । ଏହି ଦୁର୍ଘଟଣାରେ ୫୦ରୁ ଅଧିକ ଲୋକ ଆହତ ହେଇଥିଲେ ।
ଜାମତାରା
ଝାଡଖଣ୍ଡ ଜାମତାରା ଏବଂ ବିଦ୍ୟାସାଗର ଷ୍ଟେସନ ଭିତରେ ଫେବ୍ରୁଆରୀ ୨୮ ତାରିଖରେ କିଛି ଲୋକଙ୍କ ଉପରେ ଟ୍ରେନ୍ ଚଢିଯାଇଥିଲା । ଏହି ଦୁର୍ଘଟଣାରେ ପ୍ରାୟ ୧୨ ଜଣ ଲୋକଙ୍କ ଉପରେ ଟ୍ରେନ୍ ଚଢିଯାଇଥିଲା । ଯାହା ଫଳରେ ଏଥିରେ ୨ ଜଣ ଲୋକ ପ୍ରାଣ ହରାଇଥିଲେ ।
ବକ୍ସର
୨୦୨୩ ମସିହା ଅକ୍ଟୋବର ୨୧ ତାରିଖରେ ନୂଆଦିଲ୍ଲୀରୁ କାମାଖ୍ୟା ଯାଉଥିଲା ନର୍ଥ ଏକ୍ସପ୍ରେସ୍ ବିହାରର ବକ୍ସର ଜଙ୍କସନରେ ଦୁର୍ଘଟଣାଗ୍ରସ୍ତ ହେଇଥିଲା । ଟ୍ରେନର ୨୪ଟି ଡବା ଲାଇନଚ୍ୟୁତ୍ ହେଇଯାଇଥିଲା । ଏହି ଦୁର୍ଘଟଣାରେ ୬୦ରୁ ୭୦ ଜଣ ଲୋକ ଆହତ ହେବା ସହ ୪ ଜଣଙ୍କର ମୃତ୍ୟୁ ହେଇଥିବା ନେଇ ବକ୍ସର ଜିଲ୍ଲା ପ୍ରଶାସନ ସୂଚନା ଦେଇଥିଲେ ।
ଫତେଗଡ ସାହିବ
ଚଳିତ ବର୍ଷ ଜୁନ୍ ୨ ତାରିଖରେ ପଞ୍ଜାବ ଫତେଗଡ ସାହିବରେ ମଧ୍ୟ ଗୋଟିଏ ଟ୍ରେନ୍ ଦୁର୍ଘଟଣା ଘଟିଥିଲା । ଏହି ଦୁର୍ଘଟଣାରେ ଦୁଇ ମାଲବାହୀ ଟ୍ରେନ୍ ପରସ୍ପରକୁ ଧକ୍କା ଦେଇଥିଲା । ଏହି ଦୁର୍ଘଟଣାରେ ଦୁଇ ଟ୍ରେନ୍ ଡ୍ରାଇଭର ଆହତ ହେଇଥିଲେ । ଯାହାପରେ ତାଙ୍କୁ ଫତେଗଡ ସାହିବ ସିଭିଲ୍ ହସ୍ପିଟାଲରେ ଭର୍ତ୍ତି କରାଯାଇଥିଲା ।