ଖସୁଛି ବାୟୁର ମାନ : କ୍ଷତିକାରକ ଏବଂ ଅସ୍ୱାସ୍ଥ୍ୟକର ସ୍ତରରେ ରାଜଧାନୀର ୪ଟି ସ୍ଥାନର ବାୟୁ
କନକ ବ୍ୟୁରୋ : ଭୁବନେଶ୍ୱରେ ଖସୁଛି ବାୟୁର ମାନ । ପ୍ରଦୂଷିତ ହେଉଛି ପରିବେଶ । ଗାଡିମଟର ଅଧିକ ଚଳାଚଳ କରୁଥିବାରୁ ରାଜଧାନୀରେ ଏବେ ବାୟୁରମାନ କ୍ଷତିକାରକ ଏବଂ ଅସ୍ୱାସ୍ଥ୍ୟକର ସ୍ତରରେ ପହଞ୍ଚିଛି । ଭୁବନେଶ୍ୱରରେ ବାୟୁରମାନ ସବୁଠୁ ଖରାପ ରହିଛି ଇନଫୋସିଟି ଅଞ୍ଚଳରେ, ଏଠାରେ ବାୟରୁ ମାନ ୩୩୫ ଅଛି । ସେହିପରି ଲିଙ୍ଗରାଜ ମନ୍ଦିର ପାଖରେ ବାୟୁରମାନ ୨୫୬ରେ ରହିଛି । ଭୁବନେଶ୍ୱର ସ୍ମାର୍ଟ ସିଟି ଲିମିଟେଡ ପକ୍ଷରୁ ୧୦ଟି ସ୍ଥାନରେ ଏବେ ବାୟୁର ମାନ ନିରୀକ୍ଷଣ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସନ୍ଧ୍ୟା ୫ଟା ପରେ ରେକର୍ଡ କରାଯାଇଥିବା ତଥ୍ୟ ମୁତାବକ, ରିଜିଓନାଲ ପ୍ଲାଣ୍ଟ ପାଖରେ ବାୟୁର ମାନ ୨୩୪ ରହିଛି । ରମାଦେବୀ ବିଶ୍ୱବିଦ୍ୟାଳୟ ପାଖରେ ବାୟୁର ମାନ ୧୧୯ ରହିଛି । କଳିଙ୍ଗ ହସ୍ପିଟାଲ ପାଖରେ ବାୟୁର ମାନ ୬୭ ରହିଛି । ଏସବୁ ସ୍ଥାନରେ ବାୟୁର ମାନ ଖରାପ ହୋଇଯାଇଛି । କିନ୍ତୁ କିଟ୍ ଛକ ନିକଟରେ ବାୟୁର ମାନ ୫୦ ରହିଥିବା ବେଳେ ଖଣ୍ଡଗିରିରେ ୪୫, ମଂଚେଶ୍ୱରରେ ୩୫, ମାଷ୍ଟରକ୍ୟାଣ୍ଟିନରେ ୨୦ ରହିଛି । ଯାହା ବିପଦଜନକ ନୁହେଁ ।
ସୂଚନାମୁତାବକ, ଏୟାର କ୍ୱାଲିଟି ଇଡେକ୍ସ ୫୧ ରୁ ୧୦୦ ଭିତରେ ରହିଲେ ତାହା ୟୋଲୋ ମାର୍କ ଦର୍ଶାଇଥାଏ । ଯାହା ଏତେଟା କ୍ଷତିକାରକ ନୁହେଁ । କିନ୍ତୁ ଏୟାର କ୍ୱାଲିଟି ଇଡେକ୍ସ ୧୦୧ରୁ ୧୫୦ ମଧ୍ୟରେ ରହିଲେ ଏହା ଛୋଟ ପିଲା, ବୟସ୍କ ଲୋକଙ୍କ ଉପରେ ପ୍ରଭାବ ପକାଇଥାଏ । ବାୟୁର ମାନ ୧୫୧ରୁ ୨୦୦ ଭିତରେ ରହିଲେ ଏହା ଅସ୍ୱାସ୍ଥ୍ୟକର ପରିବେଶ ସୃଷ୍ଟି କରିଥାଏ ।
ବାୟୁର ମାନ ୨୦୧ରୁ ୩୦୦ ରହିଲେ ତାହା ଅତ୍ୟନ୍ତ ଖରାପ ଅସ୍ୱାସ୍ଥ୍ୟକର ପରିବେଶ ସୃଷ୍ଟି କରିଥାଏ । ୩୦୧ରୁ ୫୦୦ ଭିତରେ ରହିଲେ ଏହା କ୍ଷତିକାରକ ସାବ୍ୟସ୍ଥ ହୋଇଥାଏ । ଏଭଳି ବାୟୁ ସମସ୍ତଙ୍କ ପାଇଁ କ୍ଷତିକାରକ ସାଜିଥାଏ । ତେବେ କେବଳ ଭୁବନେଶ୍ୱର ନୁହେଁ ରାଜ୍ୟର ୭ ଟି ସ୍ଥାନରେ ବାୟୁର ମାନ ୧୦୦ ଉପରେ ରହିଥିବା ରାଜ୍ୟ ପ୍ରଦୂଷଣ ବୋର୍ଡ ଚିହ୍ନଟ କରିଛି ।