ନଭେମ୍ବର ମାସରେ ବିଧାନସଭା ନିର୍ବାଚନ! ଚର୍ଚ୍ଚା ବଢ଼ାଇଲା ମନମୋହନଙ୍କ ଭବିଷ୍ୟବାଣୀ
କନକ ବ୍ୟୁରୋ: କଣ ରାଜ୍ୟରେ ହେବ ଆଗୁଆ ନିର୍ବାଚନ? ଏହାକୁ ନେଇ ଅନେକ ପ୍ରକାର କଳ୍ପନା-ଜଳ୍ପନା ଜାରି ରହିଛି । ହେଲେ ଏହାରି ଭିତରେ ରାଜ୍ୟ ବିଜେପି ସଭାପତିଙ୍କ ବୟାନ ଏକ ନୂଆ କଥା ସାମ୍ନାକୁ ଆଣିଛି । ମନମୋହନ ସାମଲ କହିଛନ୍ତି, ରାଜ୍ୟରେ ଆଗୁଆ ନିର୍ବାଚନ ହେବ । ଆଉ ଏ ନିର୍ବାଚନ ଚଳିତବର୍ଷ ନଭେମ୍ବର ମାସରେ ହେବ ବୋଲି ବଡ଼ ବୟାନ ଦେଇଛନ୍ତି । ତାଙ୍କର ଏଭଳି ଭବିଷ୍ୟବାଣୀକୁ ନେଇ ରାଜ୍ୟ ରାଜନୀତିରେ ଆରମ୍ଭ ହୋଇଯାଇଛି ଜବରଦସ୍ତ ବୟାନବାଜି । ବିଜେଡି କହିଛି ନିର୍ବାଚନ କେବେ ହେଲେ ଆମ ପାଇଁ ଆହ୍ୱାନ ନୁହେଁ । ଆଉ କଂଗ୍ରେସ କହିଛି, ଆଗୁଆ ନିର୍ବାଚନ ପାଇଁ ଦିଲ୍ଲୀରେ ବିଜେପି- ବିଜେଡି ଭିତରେ ଡିଲ୍ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟରେ ଆଗୁଆ ବିଧାନସଭା ନିର୍ବାଚନ ହେବା ନେଇ ଚର୍ଚ୍ଚା ଭିତରେ, ଆଉ ପାଦେ ଆଗକୁ ଯାଇ ବଡ ବୟାନ ଦେଇଛନ୍ତି ରାଜ୍ୟ ବିଜେପି ସଭାପତି ମନମୋହନ ସାମଲ । ଗୁରୁତ୍ୱପୂର୍ଣ୍ଣ କଥା ହେଉଛି ମନମୋହନ କେବଳ ଆଗୁଆ ନିର୍ବାଚନ ହେବ ବୋଲି ଆକଳନ କରି ନାହାନ୍ତି, ବରଂ ସିଧାସଳଖ କେଉଁ ମାସରେ ନିର୍ବାଚନ ହେବ ସେ ନେଇ ଭବିଷ୍ୟବାଣୀ କରିଛନ୍ତି । କହିଛନ୍ତି, ଆଉ ଅଢ଼େଇ ମାସ ଭିତରେ ଓଡି଼ଶା ବିଧାନସଭା ନିର୍ବାଚନ ହେବ । ଅକ୍ଟୋବର ଓ ନଭେମ୍ବର ଭିତରେ ଆଗ୍ରୁଆ ନିର୍ବାଚନ ହୋଇପାରେ ।
ଗତ କିଛି ଦିନ ତଳେ ମନମୋହନ ସାମଲ ଦିଲ୍ଲୀରେ କେନ୍ଦ୍ରର ଶୀର୍ଷ ନେତୃତ୍ୱଙ୍କୁ ଭେଟି ଫେରିଥିବାରୁ ତାଙ୍କର ଏହି ବୟାନ ବେଶ ଗୁରୁତ୍ୱବହନ କରୁଛି । ଚର୍ଚ୍ଚା ହେଉଛି, ଆଗୁଆ ନିର୍ବାଚନ ହେବା ନେଇ ମନମୋହନ କେନ୍ଦ୍ରରୁ ସୂଚନା ପାଇଥାଇପାରନ୍ତି ।
ରାଜ୍ୟରେ ଆଗୁଆ ନିର୍ବାଚନ ନେଇ ମନମୋହନ କହିବା ପରେ ପ୍ରତିକ୍ରିୟା ରଖିଛନ୍ତି ଉଭୟ ବିଜେଡି ଓ କଂଗ୍ରେସ । ବିଧାୟକ ପ୍ରତାପ ଜେନା କହିଛନ୍ତିି, ବିଜେଡି ପାଇଁ ନିର୍ବାଚନ କେବେ ବି ଆହ୍ୱାନ ନୁହେଁ । ବିଜେଡି ସବୁବେଳେ ଲୋକଙ୍କ ସହ ଅଛି, ଲୋକଙ୍କ ପାଇଁ କାମ କରୁଛି । ତେଣୁ ଓଡିଶାବାସୀଙ୍କ ଆର୍ଶୀବାଦ ମୁଖ୍ୟମନ୍ତ୍ରୀ ଓ ବିଜେଡି ସହ ଅଛି । ନିର୍ବାଚନ ପାଇଁ ବିଜେଡି ସବୁବେଳେ ପ୍ରସ୍ତୁତ । ତେବେ ମନମୋହନଙ୍କ ଭବିଷ୍ୟବାଣୀକୁ ନେଇ ତେରେଛା ବାଣ ମାରିଛନ୍ତି କଂଗ୍ରେସ ବିଧାୟକ ତାରା ବାହିନୀପତି । କହିଛନ୍ତି, ବିଜେଡି ବିଜେପି ମଧ୍ୟରେ ଦିଲ୍ଲୀରେ ଡିଲ୍ ହୋଇଛି । ତେଣୁ ସେମାନେ ଆଗୁଆ ନିର୍ବାଚନ କଥା କହୁଛନ୍ତି । ବିଜେପି ଯେଉଁଠି ଜିତିବା ପାଇଁ ଚାହିଁବ ବିଜେଡି ସେଠାରେ ଦୁର୍ବଳ ପ୍ରାର୍ଥୀ ଦେବ । ରାଜ୍ୟରେ ଆଗୁଆ ନିର୍ବାଚନ ହେବା ନେଇ କାହିଁକି ଜୋର ଧରିଛି ଚର୍ଚ୍ଚା..
କାହିଁକି ଆଗୁଆ ନିର୍ବାଚନ ଚର୍ଚ୍ଚା?
– ନିର୍ବାଚନ ମୋଡକୁ ଆସି ରାଜ୍ୟ ସରକାର ବଡ ବଡ ଘୋଷଣା କରିବା
– ବିଜେଡି ସୁପ୍ରିମୋ ଦଳୀୟ ନେତାଙ୍କୁ ଡାକି ଟିକେଟ୍ ପ୍ରସଙ୍ଗରେ ଚର୍ଚ୍ଚା କରିବା
– କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆଗୁଆ ନିର୍ବାଚନ କଥା କହିବା
– ମାଳ ମାଳ କେନ୍ଦ୍ରୀୟ ନେତା ଓଡି଼ଶାରେ ଡେରା ପକାଇବା
– ତିନି ପ୍ରମୁଖ ରାଜନୈତିକ ଦଳର ସାଂଗଠନିକ କାର୍ଯ୍ୟକ୍ରମ