୨୪ ବର୍ଷ ପରେ କଂଗ୍ରେସ ପାଇଲା ଅଣଗାନ୍ଧୀ ସଭାପତି : ଅକ୍ଟୋବର ୨୬ରେ ନେବେ ଶପଥ; ଆଜି ସୋନିଆ ଗାନ୍ଧୀଙ୍କୁ ଭେଟି କରିବେ ଆଲୋଚନା
କନକ ବ୍ୟୁରୋ : ଦେଶର ସର୍ବପୁରାତନ ଦଳ କଂଗ୍ରେସକୁ ମିଳିଛି ନୂଆ ସେନାପତି । ଦୀର୍ଘ ୨୪ ବର୍ଷ ପରେ କଂଗ୍ରେସ ନେତୃତ୍ୱ ଅଣଗାନ୍ଧୀ ପରିବାର ହାତକୁ ଯାଇଛି । କଂଗ୍ରେସର ନୂଆ ସଭାପତି ଭାବେ ନିର୍ବାଚିତ ହୋଇଛନ୍ତି ବରିଷ୍ଠ ନେତା ମଲ୍ଲିକାର୍ଜୁନ ଖଡଗେ । କଂଗ୍ରେସ ସଭାପତି ନିର୍ବାଚନରେ ଶଶୀ ଥରୁରଙ୍କୁ ମାତ ଦେଇ ନିଜ ନାମରେ ଏହି ପଦ କରିପାରିଛନ୍ତି । ତେବେ ଆସନ୍ତା ଅକ୍ଟୋବର ୨୬ ତାରିଖରେ ଖଡଗେ ସଭାପତି ଭାବେ ଶପଥ ଗ୍ରହଣ କରିବାର କାର୍ଯ୍ୟକ୍ରମ ରହିଛି ।
Kanak News is now on WhatsApp
Join and get latest news updates delivered to you via WhatsApp
ଏହା ପୂର୍ବରୁ ଆଜି ଖଡଗେ ସୋନିଆ ଗାନ୍ଧୀଙ୍କୁ ଭେଟି ଦଳର ଆଗାମୀ କାର୍ଯ୍ୟପନ୍ଥା ଉପରେ ଆଲୋଚନା କରିବାର କାର୍ଯ୍ୟକ୍ରମ ରହିଛି । ଗତ ୧୭ ତାରିଖରେ କଂଗ୍ରେସ ସଭାପତି ପଦ ପାଇଁ ଭୋଟ ଗ୍ରହଣ ହୋଇଥିଲା । ଆଉ ଖଡଗେଙ୍କ ପଛରେ ଗାନ୍ଧୀ ପରିବାରର ହାତ ରହିଥିବାରୁ ସେ ଜିତିବା ଏକପ୍ରକାର ନିଶ୍ଚିତ ହୋଇସାରିଥିଲା । ଆଉ କଂଗ୍ରେସର ନୂଆ ସଭାପତି ହେବା ପରେ ଦଳରେ ରାହୁଲଙ୍କ ଭୂମିକା କଣ ରହିବ ? ଏନେଇ ସାମ୍ବାଦିକଙ୍କ ଏକ ପ୍ରଶ୍ନର ଉତର ଦେଇ ରାହୁଲ ଗାନ୍ଧୀ କହିଛନ୍ତି, କଂଗ୍ରେସର ତାଙ୍କର ଭୂମିକା କଣ ହେବ ଅଧ୍ୟକ୍ଷଙ୍କ ଦ୍ୱାରା ସ୍ଥିର ହେବ । ତେବେ ଖଡଗେଙ୍କ ଆଗରେ ବିଶାଳ ଚାଲେଞ୍ଜ ରହିଛି ।
ସେ ଏପରି ସମୟରେ ଦଳର ମଙ୍ଗ ଧରିଛନ୍ତି, ଯେତେବେଳେ ଦଳ ନିଜ ଅସ୍ତିତ୍ୱ ପାଇଁ ଲଢେଇ କରୁଛି । ଦଳକୁ ବିପର୍ଯ୍ୟୟରୁ ବାହାର କରିବା, ଲୋକଙ୍କ ନିକଟତର ହୋଇ ଆସ୍ଥା ଜିଣିବା, ଦଳର ପୁରୁଣା ଗୌରବ ଫେରାଇ ଆଣିବା ଭଳି ଗୁରୁ ଦାୟିତ୍ୱ ଏବେ ଖଡଗେଙ୍କ କାନ୍ଧରେ ପଡିଛି । ସାଧାରଣ ନିର୍ବାଚନକୁ ଦୁଇ ବର୍ଷରୁ କମ ସମୟ ଥିବାରୁ ଖଡଗେଙ୍କ ପାଇଁ ଆଗକୁ ଅଗ୍ନିପରୀକ୍ଷା ରହିଛି । ଏଥିସହ ନୂଆ ସଭାପତି ଭାବେ ଖଡଗେ ନିଜେ ନିଷ୍ପତ୍ତି ନେବେ ନା ଗାନ୍ଧୀ ପରିବାରର ରିମୋର୍ଟ କଂଟ୍ରୋଲରେ ପରିଚାଳିତ ହେବେ ତା ଉପରେ ସମସ୍ତଙ୍କ ନଜର ରହିଛି ।