ଭୋଜି ଖାଇ ଫେରିବା ବେଳେ ବାଟରେ ଜଗିଥିଲା ମୃତ୍ୟୁର କୂଅ । ଛତିଶଗଡ଼ କାଙ୍କେର ରାସ୍ତା କଡ଼ରେ ଘଟିଲା ଅଘଟଣ
କୂଅ ଭିତରୁ କାର୍ ସହ ୪ ମୃତ ଦେହ ଉଦ୍ଧାର
କନକ ବ୍ୟୁରୋ: ବିବାହ ଭୋଜି ପାଇଁ ଯାଇଥିଲେ, ଶବ ହୋଇ ଫେରିଲେ । ଉମରକୋଟରୁ ପରିବାର ସହ ଛତିଶଗଡ କାଙ୍କେର ଜିଲ୍ଲାରେ ଏକ ବାହାଘରକୁ ଯାଇଥିଲେ ସପନ ସରକାର । ସାଥୀରେ ପତ୍ନୀ ରୀତା ସରକାର, ତାଙ୍କ ପଡ଼ୋଶୀ ହଜାରି ଢାଲି ଓ ରୀତାଙ୍କ ଭାଇ ବିଶୁ ଅଧିକାରୀ ବି ଯାଇଥିଲେ । ହେଲେ ଫେରିବା ରାସ୍ତାରେ ଜଗିଥିଲା ମୃତ୍ୟୁର କୂଅ । କାଙ୍କେର ରାସ୍ତାରେ ଥିବା ଏକ ପରିତ୍ୟକ୍ତ କୂଅରୁ କାର ସମେତ ୪ଜଣଙ୍କ ମୃତଦେହ ଜବତ କରିଛି ପୋଲିସ ।
Kanak News is now on WhatsApp
Join and get latest news updates delivered to you via WhatsApp
ଛତିଶଗଡ଼ର କାଙ୍କେର ରାସ୍ତା କଡ଼ରେ ଥିବା ଏକ ପରିତ୍ୟକ୍ତ କୂଅ ଭିତରୁ ବାହାରିଥିଲା କାର, ଆଉ ସେଥିରେ ଥିଲା ୪ ଜଣଙ୍କ ମୃତଦେହ । ମାତ୍ର କିଛି ସମୟ ପୂର୍ବରୁ ବିବାହ ଉତ୍ସବରେ ମସଗୁଲ ଥିଲେ ଉମରକୋଟର ସପନ ସରକାର ଓ ତାଙ୍କ ସଂପର୍କୀୟ । କିନ୍ତୁ କାହାରିକୁ ଜଣାନଥିଲା ଯେ ଆଗକୁ ଏକ ବଡ଼ ଅଘଟଣ ସେମାନଙ୍କୁ ଅପେକ୍ଷା କରି ରହିଛି । ଅପହରଣ ଅଭିଯୋଗର ତଦନ୍ତ କରିବା ବେଳେ କୂଅ ଭିତରୁ ୪ ଜଣଙ୍କ ମୃତଦେହ ଉଦ୍ଧାର କରିଛି ଛତିଶଗଡ଼ ପୁଲିସ ।
ନବରଙ୍ଗପୁର ଜିଲ୍ଲା ରାଇଘର ତହସିଲ ଅଫିସର ସୁପରଭାଇଜର ସପନ ସରକାର, ତାଙ୍କ ପତ୍ନୀ ରୀତା ସରକାର, ତାଙ୍କ ପଡ଼ୋଶୀ ହଜାରି ଢାଲି ଓ ରୀତାଙ୍କ ଭାଇ ବିଶୁ ଅଧିକାରୀ । ସୀମାନ୍ତ କୋଣ୍ଡାଗାଁରେ ବିଶୁ ଅଧିକାରୀଙ୍କ ଘର । ରୀତାଙ୍କ ବଡ଼ ଭଉଣୀର ପୁଅ ବାହାଘରରେ ଯୋଗ ଦେବା ପାଇଁ ଏମାନେ ଛତିଶଗଡ଼ର କାଙ୍କେର ଯାଇଥିଲେ । କିନ୍ତୁ ଫେରିବା ବାଟରେ ସେମାନଙ୍କୁ ଅପେକ୍ଷା କରିଥିଲା ମୃତ୍ୟୁ ।
- ଡିସେମ୍ବର ୧୦ ତାରିଖ
- ସମୟ: ରାତି ୧୦ଟା ୩୦
- ସ୍ଥାନ: କାଙ୍କେର ରାସ୍ତା, ଛତିଶଗଡ଼
ବାହାଘର ଭୋଜି ଖାଇ ପତ୍ନୀ ଓ ଶଳାଙ୍କ ସହ ଫେରୁଥିଲେ ସପନ ସରକାର । କୋଣ୍ଡାଗାଁରେ ରାତିରେ ରହିଥାନ୍ତେ, ପରଦିନ ସକାଳେ ଉମରକୋଟ ଫେରିଥାନ୍ତେ । ଫେରିବାର କିଛି ସମୟ ପରେ ସପନ କିମ୍ବା ଅନ୍ୟ କାହା ସହ ଯୋଗାଯୋଗ କରି ପାରିନଥିଲେ ପରିବାର ଲୋକ । ୧୧ ତାରିଖ ସକାଳ ପର୍ଯ୍ୟନ୍ତ ସେମାନଙ୍କର କିଛି ଖୋଜ ଖବର ମିଳିନଥିଲା । ଏହା ପରେ କାଙ୍କେର କତୁଆଲି ଥାନାରେ ନିଖୋଜ ନେଇ ଏତଲା ଦେଇଥିଲେ ପରିବାର ଲୋକ ।
କାଙ୍କେରରୁ ଅଳ୍ପ ବାଟ ଅତିକ୍ରମ ପରେ ଏକ ପେଟ୍ରୋଲ ପମ୍ପରେ ତେଲ ପକେଇଥିଲେ ସପନ, ଯାହାର ଏକ ସିସିଟିଭି ଫୁଟେଜ ସେହି ପେଟ୍ରୋଲ ପମ୍ପରୁ ମିଳିଥିଲା । ତେଲ ପକାଇ ମାତ୍ର ୫ କିଲୋମିଟର ଆସିବା ପରେ ସେମାନଙ୍କ ଫୋନ୍ ସୁଇଚ୍ ଅଫ ହୋଇ ଯାଇଥିଲା । ଅପହରଣ ଅଭିଯୋଗ ଆସିବା ପରେ ପୋଲିସ ତଦନ୍ତ କରି ଏକ ପରିତ୍ୟକ୍ତ କୂଅରୁ କାର ସହ ମୃତଦେହ ଉଦ୍ଧାର କରିଛି । କାର ଚକା ଫାଟିଯିବାରୁ ଭାରସ୍ୟାମ ହରାଇ କୂଅ ଭିତରେ ପଡି ଯାଇଥିବା ସନ୍ଦେହ କରାଯାଉଛି । ପ୍ରାଥମିକ ତଦନ୍ତରୁ ଏହା ଏକ ସଡ଼କ ଦୁର୍ଘଟଣା ବୋଲି ସନ୍ଦେହ କରାଯାଉଛି । କିନ୍ତୁ ଶବ ବ୍ୟବଚ୍ଛେଦ ରିପୋର୍ଟ ପରେ ପୂରା ଘଟଣା ସାମ୍ନାକୁ ଆସିବ ବୋଲି କୁହାଯାଉଛି ।