୯ରୁ ୧୩ ବର୍ଷର ଝିଅଙ୍କୁ କ୍ୟାନସର ଟିକା ଦେବା ପାଇଁ ଯୋଜନା: ଖୁବଶୀଘ୍ର ୧୦ଟି ଆକାଂକ୍ଷୀ ଜିଲ୍ଲାରେ କାର୍ଯ୍ୟକାରୀ କରିବ ଜାତୀୟ ସ୍ୱାସ୍ଥ୍ୟ ମିଶନ
କନକ ବ୍ୟୁରୋ: ୯ରୁ ୧୩ ବର୍ଷର ଝିଅଙ୍କୁ ଦିଆଯିବ ପ୍ରତିଷେଧକ କ୍ୟାନସର ଟିକା । ୧୦ଟି ଆକାଂକ୍ଷୀ ଜିଲ୍ଲାର ହାଇସ୍କୁଲରେ ୯ରୁ ୧୩ ବର୍ଷ ବୟସର ବାଳିକାମାନଙ୍କୁ ମାଗଣାରେ ହ୍ୟୁମାନ ପାପିଲୋମା ଭାଇରସ୍ (ଏଚପିଭି) ଟିକା ଦେବା ପାଇଁ ଯୋଜନା କରୁଛନ୍ତି ରାଜ୍ୟ ସରକାର । ଜାତୀୟ ସ୍ୱାସ୍ଥ୍ୟ ମିଶନ ୨୦୨୨-୨୦୨୪ ଆଧାରରେ ଏହି ସମୂହ ଟିକାକରଣରେ ୧୦ କୋଟି ଟଙ୍କା ଅନୁମୋଦନ ହୋଇଥିବା ସୂଚନା ଦେଇଛନ୍ତି ମିଶନର ନିର୍ଦ୍ଦେଶିକା ଶାଲିନୀ ପଣ୍ଡିତ । ସର୍ଭାଇକାଲ କ୍ୟାନସରରୁ ସୁରକ୍ଷା ଦେବ ଏହି ଟିକା । ବର୍ତମାନ ତିନୋଟି ବ୍ରାଣ୍ଡରେ ଉପଲବ୍ଧ ଏହି ଟିକାର ଡୋଜ୍ ପିଛା ଖର୍ଚ୍ଚ ୬୦୦ରୁ ୧ହଜାର ଟଙ୍କା । ଡାକ୍ତରମାନେ ଏହି ଟିକାର ଦୁଇଟି ଡୋଜ୍ ନେବାକୁ ପରାମର୍ଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମଟି ୧୫ତମ ଜନ୍ମଦିନ ପୂର୍ବରୁ ଏବଂ ଦ୍ୱିତୀୟଟି ପ୍ରଥମ ଡୋଜର ୬ରୁ ୧୨ ମାସ ପରେ ଦିଆଯିବ । ଏନଏଚଏମ୍ ଅନୁମୋଦନ ପାଇବା ପରେ ତୁରନ୍ତ ଟିକାକରଣ ଅଭିଯାନ ଆରମ୍ଭ କରିବାକୁ ଲକ୍ଷ୍ୟ ରଖାଯାଇଛି । ଦୁଇବର୍ଷ ଭିତରେ ୧୦ଟି ଜିଲ୍ଲା ଯଥା ବଲାଙ୍ଗିର, ଢେଙ୍କାନାଳ, ଗଜପତି, କନ୍ଧମାଳ, କଳାହାଣ୍ଡି, ନୂଆପଡ଼ା, ନବରଙ୍ଗପୁର, ରାୟଗଡ଼ା, ମାଲକାନଗିରି ଓ କୋରାପୁଟରେ ଟିକା ଦିଆଯିବାକୁ ଲକ୍ଷ୍ୟ ରଖାଯାଇଛି । ଏହି ଭ୍ୟାକସିନ୍ କ୍ୟାନସରରୁ ୭୦ ପ୍ରତିଶତ ପର୍ଯ୍ୟନ୍ତ ସୁରକ୍ଷା ଦେଇଥାଏ ବୋଲି ଡାକ୍ତରମାନେ କହିଛନ୍ତି । ଗତମାସରେ ଗର୍ଭାଶୟ କ୍ୟାନସରର ସ୍ୱଦେଶୀ ଟିକା ବଜାରକୁ ଆଣିବା ପାଇଁ ସିରମ ଇନଷ୍ଟିଚ୍ୟୁଟ୍ ଅଫ ଇଣ୍ଡିଆକୁ ବୈଧାନିକ ଅନୁମତି ମିଳିବା ପରେ ଏବେ ଏହି ଟିକାକୁ ନେଇ ଚର୍ଚ୍ଚା ଜୋର ଧରିଛି । ଏହି ଟିକା ମଧ୍ୟ ଶସ୍ତା ହେବ ବୋଲି ଆଶା କରାଯାଉଛି ।