ସାରା ଦେଶରେ ଧର୍ମସଭା କଲା ବିଶ୍ୱହିନ୍ଦୁ ପରିଷଦ : ରାମ ମନ୍ଦିର ନିର୍ମାଣ ପାଇଁ ସଂସଦରେ ଅଧ୍ୟାଦେଶ ଆଣିବାକୁ ଦୋହରାଇଲା ଦାବି
କନକ ବ୍ୟୁରୋ : ଅଯୋଧ୍ୟାରେ ରାମ ମନ୍ଦିର ନିର୍ମାଣ ଦାବିରେ ଦିଲ୍ଲୀରେ ସାଧୁସନ୍ଥଙ୍କ ଧର୍ମସଭା । ହଜାର ହଜାର ସାଧୁସନ୍ଥ ଓ ରାମ ଭକ୍ତ, ମନ୍ଦିର ନିର୍ମାଣ ଦାବିରେ ଆଜି ସାରା ଦେଶରେ ରଣହୁଙ୍କାର ଦେଇଛନ୍ତି । ଓଡିଶାରେ ମଧ୍ୟ ବିଶ୍ୱହିନ୍ଦୁ ପରିଷଦ କରିଛି ହିନ୍ଦୁ ସମ୍ମିଳନୀ । ମଙ୍ଗଳବାରଠାରୁ ଆରମ୍ଭ ହେଉଛି ସଂସଦର ଶୀତ ଅଧିବେଶନ । ଆଉ ଏହି ଅଧିବେଶନରେ ହିଁ ରାମ ମନ୍ଦିର ନିର୍ମାଣ ନେଇ ଅଧ୍ୟାଦେଶ ଆଣିବାକୁ ସରକାର ଉପରେ ଚାପ ପକାଇଛି ବିଶ୍ୱ ହିନ୍ଦୁ ପରିଷଦ ।
Kanak News is now on WhatsApp
Join and get latest news updates delivered to you via WhatsApp
ରାମ ମନ୍ଦିର ନିର୍ମାଣ ଦାବିରେ ଅଯୋଧ୍ୟରେ ଯେଉଁ ଚିତ୍ର ଦେଖିବାକୁ ମିଳିଥିଲା ଠିକ୍ ଅନରୂପ ଚିତ୍ର ଦେଖିବାକୁ ମିଳିଥିଲା ଦେଶର ରାଜଧାନୀ ଦିଲ୍ଲୀରେ । ଆଉ ସମସ୍ତଙ୍କ ମୁହଁରେ ସେଇ ଗୋଟିଏ କଥା-ମନ୍ଦିର ବନିବ ତ’ ସେଇଠି ବନିବ, ଯେଉଁଠି ପ୍ରଭୁ ଶ୍ରୀରାମ ଜନ୍ମ ହୋଇଥିଲେ ।ଠିକ୍ ଦୁଇ ଦିନ ପରେ ସଂସଦର ଶୀତକାଳୀନ ଅଧିବେଶନ । ମୋଦି ସରକାରଙ୍କ ଶେଷ ପୂର୍ଣ୍ଣାଙ୍ଗ ଅଧିବେଶନ । ଅର୍ଥାତ୍ ଏହି ଅଧିବେଶରେ ରାମ ମନ୍ଦିର ନିର୍ମାଣ ପ୍ରସଙ୍ଗରେ ଅଧ୍ୟଦେଶ ଆଣିବାକୁ ପ୍ରତ୍ୟକ୍ଷରେ ହେଉ ବା ପରୋକ୍ଷରେ ହେଉ ସରକାର ଉପରେ ଚାପ ପ୍ରଯୋଗ କରିବାକୁ ଉଦ୍ୟମ କରିଛି ବିଶ୍ୱ ହିନ୍ଦୁ ପରିଷଦ ।
ଆଉ ଏହି ଧର୍ମସଭା ବିଜେପି ସରକାରକୁ ଧର୍ମ ସଂକଟରେ ପକାଇ ଦେଇଛି । କାରଣ ୨୦୧୪ ନିର୍ବାଚନ ସମୟରେ ପ୍ରତିଶ୍ରୁତିର ଲମ୍ବା ତାଲିକାର ଶୀର୍ଷ ସ୍ଥାନରେ ଥିଲା ରାମ ମନ୍ଦିର ନିର୍ମାଣ । ଆଉ ଯେତେବେଳେ ମୋଦି ସରକାରଙ୍କ କାର୍ଯ୍ୟକାଳ ସରିବାକୁ ବସୁଛି, ଠିକ୍ ଏତିକି ବେଳେ ଅଯୋଧ୍ୟରେ ରାମ ମନ୍ଦିର ନିର୍ମାଣ ନେଇ କେନ୍ଦ୍ର ସରକାରକୁ ଘେରିଛନ୍ତି ହିନ୍ଦୁବାଦୀ ସଂଗଠନ ।
ଦେଶର କୋଣ ଅନୁକୋଣରୁ ଲକ୍ଷାଧିକ ରାମ ମନ୍ଦିର ସମର୍ଥକ ଦିଲ୍ଲୀରେ ଏକତ୍ରିତ ହୋଇଛନ୍ତି । ଶଙ୍କରାଚାର୍ଯ୍ୟଙ୍କଠାରୁ ଆରମ୍ଭ କରି ବଡ ବଡ ସାଧୁସନ୍ଥ ଆସି ରାମ ମନ୍ଦିର ପାଇଁ ଦାବି କରୁଛନ୍ତି । ଆଉ ଏହି ଧର୍ମସଭା ଦିଲ୍ଲୀ ସମେତ ଦେଶବ୍ୟପୀ ଆୟୋଜନ ହୋଇଛି । ଓଡ଼ିଶାର ଭୁବନେଶ୍ୱର, ବ୍ରହ୍ମପୁର ଏବଂ ବାଲେଶ୍ୱରରେ ବି ଅନୁରୁପ ଢ଼ଙ୍ଗରେ ଧର୍ମସଭାର ଅୟୋଜନ ହୋଇଛି ।
ପୂର୍ବରୁ ଅଯୋଧ୍ୟାରେ ଏବେ ଦିଲ୍ଲୀରେ, ଆଗକୁ ପୁଣି ପ୍ରୟାଗରେ କୁମ୍ଭମେଳା ସମୟରେ ବିଶାଳ ଧର୍ମସଭା ଆୟୋଜନ କରିବାକୁ ଲକ୍ଷ୍ୟ ରଖିଛି ବିଶ୍ୱ ହିନ୍ଦୁ ପରିଷଦ । ଫେବୃୟାରୀ ୩୧ରୁ ଜାନୁୟାରୀ ୧ ତାରିଖ ଦୁଇ ଦିନ ଧରି ହେବ ଧର୍ମସଭା । ତାହା ପୁଣି ଠିକ୍ ୨୦୧୯ ନିର୍ବାଚନର ଅଳ୍ପ କିଛି ଦିନ ପୂର୍ବରୁ ।