ନୂଆ ରୂପ ପାଇବ ପ୍ରକଳ୍ପ ପରିସରର ମଠ । ଦ୍ରୁତ ଗତିରେ ଚାଲିଛି ଉନ୍ନତିକରଣ କାମ
କନକ ବ୍ୟୁରୋ : ଜାନୁଆରୀ ୧୭ ତାରିଖରେ ଲୋକାର୍ପିତ ହେବାକୁ ଥିବା ପରିକ୍ରମା ପ୍ରକଳ୍ପର କାମ ଶେଷ ପର୍ଯ୍ୟାୟରେ ପହଂଚିଛି । ନିର୍ଦ୍ଧାରିତ ସମୟ ପୂର୍ବରୁ କାମ ସାରିବାକୁ ଦିନ ରାତି ଏକ କରିଦେଇଛନ୍ତି ଓବିସିସି ଓ ଟାଟା ପ୍ରୋଜେକ୍ଟର ଇଞ୍ଜିନିୟର । ଏସବୁ ଭିତରେ ପ୍ରକଳ୍ପ ପରିସରରେ ଥିବା ମଠଗୁଡ଼ିକ ନୂଆ ରୂପ ପାଇବ । ମଠର ସ୍ଥିତି ଓ ଉନ୍ନତିକରଣ କାର୍ଯ୍ୟ ଦ୍ରୁତ ଗତିରେ ଆଗେଇ ଚାଲିଛି । ଶ୍ରୀମନ୍ଦିର ମେଘନାଦ ପାଚେରୀ ଠାରୁ ୧୦୦ ମିଟର ମଧ୍ୟରେ ଥିବା ୪ଟି ମଠ ଯଥା ବଡ଼ଛତା ମଠ, ଛାଉଣୀ ମଠ, ଉତ୍ତରପାର୍ଶ୍ୱ ମଠ ଓ କାକୁଡିଖାଇ ମନ୍ଦିରର ପୁନରୁଦ୍ଧାର କରାଯାଇ ନୂଆ ରୂପ ଦିଆଯାଉଛି । ମୂଳ ମଠକୁ ଅକ୍ଷୁର୍ଣ୍ଣ ରଖିବା ସହ ଖଣ୍ଡେଲାଇଟ ପଥର ବ୍ୟବହାର କରି କଳିଙ୍ଗ ସ୍ଥାପତ୍ୟ ଶୈଳୀରେ ମଠର ପୁନରୁଦ୍ଧାର କରାଯାଉଛି । ତେବେ ଜାନୁଆରୀ ୧୭ ସୁଦ୍ଧା ପୂର୍ଣ୍ଣାଙ୍ଗ ପ୍ରକଳ୍ପ ଶେଷ ହୋଇପାରିବ ନାହିଁ କି ନାହିଁ, ତାକୁ ନେଇ ଆଶଙ୍କା ଦେଖା ଦେଇଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ପରିକ୍ରମା ପ୍ରକଳ୍ପ ପରିସରରେ ଥିବା ମଠଗୁଡିକରେ ରହିଥିବା ପୁରାତନ ଐତିହ୍ୟ କୀର୍ତିରାଜୀ ଗୁଡିକର ଶୋଭା ବଢ଼ାଇବା ଉପରେ ଗୁରୁତ୍ୱ ଦିଆଯାଇଛି । କିନ୍ତୁ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପରିସରରେ ଥିବା ପ୍ରାୟ ୨୦ଟିରୁ ଅନେକ ମଠର କାର୍ଯ୍ୟ ସରି ନାହିଁ । ଏହାସହ ପରିକ୍ରମା ପ୍ରକଳ୍ପ ପରିସରରେ ଥିବା ପ୍ରାୟ ୧୮ଟି ମଠର ପୁନରୁଦ୍ଧାର କରାଯାଉଛି । ଏଗୁଡ଼ିକୁ ଖଣ୍ଡେଲାଇଟ ପଥରରେ ଉତ୍କଳୀୟ ଢାଂଚାର ରୂପ ଦିଆଯାଉଛି । ଏସବୁର କାମ ଡିସେମ୍ବର ୨୭ତାରିଖ ସୁଦ୍ଧା ସାରିବାକୁ ଡେଡ୍ଲାଇନ୍ ଥିବା ବେଳେ, ଆଜି ସୁଦ୍ଧା ତାହା ଶେଷ ହୋଇନାହିଁ । କିନ୍ତୁ ଓବିସିସି କହିଛି ଯେ ମଠର ସୌନ୍ଦର୍ଯ୍ୟକରଣ କାର୍ଯ୍ୟ ପ୍ରକଳ୍ପର ଯଥେଷ୍ଟ ପୂର୍ବରୁ ସରିବ ।
ନୂଆ ରୂପ ପାଇବା ପରେ ମଠ ଗୁଡିକ ଭକ୍ତଙ୍କୁ ଖୁବ୍ ଆକର୍ଷଣ କରିବ । ଆଉ ଏହା ଭକ୍ତଙ୍କ ଭିତରେ ଭକ୍ତିଭାବ ସହ ଏକ ଆଧ୍ୟାତ୍ମିକ ପରିବେଶ ସୃଷ୍ଟି କରିବ ବୋଲି କୁହଯାଉଛି ।