କନକ ବ୍ୟୁରୋ : ଶରୀରରେ ଅଧାଗୋଡ଼ କିନ୍ତୁ ଆଖିରେ ଆଖିଏ ଆତ୍ମବିଶ୍ୱାସ । ଭିଡ଼ର ଭୁବନେଶ୍ୱର ଆଉ ଭିଜା ଭିଜା ରାସ୍ତାରେ ଗଡୁଥିଲା ଗାଡ଼ିମଟର । ଠିକ୍ ସେତିକିବେଳେ କ୍ୟାମେରାର କଳାଧଳା ଲେନ୍ସରେ କଏଦ୍ ହୋଇଗଲେ ଜଣେ ଭିନ୍ନକ୍ଷମ ପରିବାବାଲା । ସମସ୍ୟା, ସଂଘର୍ଷ ଓ ସଙ୍କଟକୁ ସାମ୍ନା କରି ସ୍ମାର୍ଟସିଟିରେ କେମିତି ବଞ୍ଚି ହୁଏ, ତାହା ଏ ଭିନ୍ନକ୍ଷମଙ୍କ କାହାଣୀ ଜାଣିଲେ ଭଲସେ ବୁଝିପାରିବେ ।
Kanak News is now on WhatsApp
Join and get latest news updates delivered to you via WhatsApp
ନାଁ ଲିପୁନା ପ୍ରତିହାରୀ…କାନ୍ଧରେ କପାଳ ଲେଖିଥିବା କଷ୍ଟର ଗାମୁଛା, ହାତରେ ବିଧାତା ଧରାଇଥିବା ବିଡ଼ା ବିଡ଼ା ବୋଝର ସଜନା ଛୁଇଁ । ରୋଜଗାରର ‘ରାଜଧାନୀ’ ତାଙ୍କୁ ଭିନ୍ନକ୍ଷମ ପରିବା ବାଲା ଭାବେ ଜାଣିଛି । ସ୍ମାର୍ଟସିଟିର ରାସ୍ତାକଡ଼ରେ ହ୍ୱିଲଚେୟାରରେ ଛୋଟ ହାଟଟିଏ ଖୋଲିଛନ୍ତି । ଭୋକର ଭଉଁରୀର ଭୋକ ମାରିବାକୁ ଝିପି ଝିପି ବରଷାରେ ଭିଜି ଭିଜି ପରିବା ବିକୁଛନ୍ତି ।
ଲିପୁନାଙ୍କ ଘର ବଡ଼ମ୍ବା ନରସିଂହପୁର ଅଞ୍ଚଳରେ । ପିଲାଦିନୁ ନିଜ ବାମ ଗୋଡ଼ ହରାଇଥିଲେ ମଧ୍ୟ ଜୀବନ ଯୁଦ୍ଧରେ ହାରିନାହାନ୍ତି । ଭିନ୍ନକ୍ଷମର ବାହାନା ଦେଖେଇ ଭରସାର ଭୁବନେଶ୍ୱରରେ ଭିକ ବି ମାଗୁନାହାନ୍ତି । ସ୍ୱାଭିମାନର ସହ ସ୍ମାର୍ଟସିଟିରେ ସାଜିଛନ୍ତି ପରିବାବାଲା । ଘରେ ଭିନ୍ନକ୍ଷମ ସ୍ତ୍ରୀ, ତାଙ୍କ ଆଖିକୁ ଦେଖାଯାଏନି କିନ୍ତୁ ଦିବ୍ୟାଙ୍ଗ ସ୍ୱାମୀ ସହରର ଛକରେ ସୁନ୍ଦର ସଂସାର ପାଇଁ ସଘଂର୍ଷ କରୁଛନ୍ତି ।
ଦିବ୍ୟାଙ୍ଗ ପରିବାବାଲା ଲିପୁନା, ପ୍ରତିଦିନ ଭୁବନେଶ୍ୱର ଛକ ଛକରେ ଭୋକ ସହ ଲୁଚକାଳି ଖେଳନ୍ତି । କାରଣ ‘ହ୍ୱିଲଚେୟାର ହାଟ’ରେ ପରିବାଥାଏ କିନ୍ତୁ ଏ ଭିଡ଼ର ଭୁବନେଶ୍ୱରରେ କାହାକୁ ଫୁରସତ୍ ନଥାଏ? ଗାଡ଼ି ଅଟକୁନି ବୋଲି ନିଜେ ଅକ୍ଷମତାକୁ ଆଖି ଦେଖାଉଛନ୍ତି, ହ୍ୱିଲଚେୟାର ଛାଡ଼ି ଗ୍ରାହକଙ୍କ ପାଖକୁ ଆତ୍ମବଳ ନେଇ ଚାଲିଆସୁଛନ୍ତି । ଦିବ୍ୟାଙ୍ଗ ବୋଲି କିଛି ଦୟାଳୁ ଲୋକମାନେ ତାଙ୍କଠୁ ପରିବା କିଣିନେଉଛନ୍ତି । ପ୍ରତିଦିନ ରାଜଧାନରେ ୯ରୁ୧୦ କିଲୋମିଟର ବୁଲିଲେ ଦିନକୁ ଦୁଇଶହରୁ ଅଢ଼େଶହ ହାତକୁ ଆସେ । ବାସ୍ ତା’ପରେ ଖୁସିରେ ସେ ପଇସାକୁ ମୁଣ୍ଡରେ ମାରି ଆଖିରେ ଲୁହ ଜାକିଦିଅନ୍ତି ଲିପୁନା ।
ହଁ ସେ ଅକ୍ଷମ, କିନ୍ତୁ ସେ ଅଟକି ନାହାନ୍ତି । ସମାଜ ଆଗରେ ମୁଣ୍ଡଟେକି ଛାତି ଫୁଲାଇ ବଞ୍ଚିଛନ୍ତି । ଦୁଃଖ ଏତିକି ୨୦୧୯ରୁ ସରକାରଙ୍କୁ ନିଜର ଦୁର୍ବଳତା ବିଷୟରେ ଜଣାଇ ଆସୁଛନ୍ତି କିନ୍ତୁ ଏଯାଏଁ କେହି ଶୁଣିନାହାନ୍ତି । ଏପରିକି ସ୍ତ୍ରୀଙ୍କୁ ଭିନ୍ନକ୍ଷମ ଭତା ମଧ୍ୟ ମିଳୁନାହିଁ ବୋଲି କୋହଭରା କଣ୍ଠରେ କହିଛନ୍ତି ଦିବ୍ୟାଙ୍ଗ ପରିବାବାଲା ଲିପୁନା ।
ଭାଗ୍ୟ-ଭରସାର ଭୁବନେଶ୍ୱରରେ ଅନେକ ଭିନ୍ନକ୍ଷମଙ୍କୁ ଆପଣ ପ୍ରତିଦିନ ଭେଟୁଥିବେ । କିନ୍ତୁ ସଙ୍କଟ, ସଂଘର୍ଷ, ସମସ୍ୟାଙ୍କୁ ସାମ୍ନା କରିବା, ଆଉ ନିଜର ଅକ୍ଷମତାକୁ ସକ୍ଷମତାରେ ପରିଣତ କରୁଥିବା ଭିନ୍ନକ୍ଷମଙ୍କ ମଧ୍ୟରୁ ଲିପୁନାଙ୍କ କାହାଣୀ ସତରେ ପ୍ରେରଣାଦାୟୀ…