ମଦର ଟେରେସାରୁ ସନ୍ଥ ମଦର
ସନ୍ଥ ମଦର ଟେରେସା । ସେବାର ମୂର୍ତିମନ୍ତ ପ୍ରତୀକ । ଆଜି ଭାଟିକାନ ସିଟିରେ ପୋପ୍ ଫ୍ରାନସିସ୍ ମଦର ଟେରେସାଙ୍କୁ ସନ୍ଥ ଉପାଧିରେ ଘୋଷିତ କରିଛନ୍ତି । ସେବାର ଚିରସ୍ମରଣୀୟା ଟେରେସା ଆଜିଠୁ ପାଲଟି ଯାଇଛନ୍ତି ସନ୍ଥ ମଦର ଟେରେସା । ସାରା ବିଶ୍ୱର ଏହି ମଦରଙ୍କ ବ୍ୟକ୍ତତ୍ୱରେ ଆଉ ଏକ ସମ୍ମାନ ଯୋଡି ହୋଇ ଯାଇଛି ।ଏହି ଅବସରରେ ଭୁବନେଶ୍ୱରରେ ଏକ ରାସ୍ତାକୁ ମଦର ଟେରେସା ନାଁରେ ନାମିତ କରିଛନ୍ତି ଓଡିଶା ସରକାର । କଟକ-ପୁରୀ ରାସ୍ତାକୁ ସଂଯୋଗ କରୁଛି ବ୍ରିଜ । ଯାହା ସନ୍ଥ ମଦର ଟେରେସାଙ୍କ ପ୍ରତି ଏକ ଅପୂର୍ବ ଶ୍ରର୍ଦ୍ଧାଂଜଳି କହିଲେ ଅତ୍ୟୁକ୍ତି ହେବ ନାହିଁ।
Kanak News is now on WhatsApp
Join and get latest news updates delivered to you via WhatsApp
ଓଡିଶା ସହ ସନ୍ଥ ମଦର ଟେରେସାଙ୍କ ସଂପର୍କ ବହୁ ପୁରୁଣା। ପ୍ରଥମେ ୧୯୭୪ମସିହାରେ ସନ୍ଥ ମଦର ଟେରେସା ଭୁବନେଶ୍ୱର ଆସିଥିଲେ। ତତ୍କାଳୀନ ମୁଖ୍ୟମନ୍ତ୍ରୀ ନନ୍ଦିନୀ ଶତପଥୀ ଓ ରାଜ୍ୟପାଳ ଆକବର ଅଲ୍ଲୀ ଖାନଙ୍କୁ ଭେଟିଥିଲେ । ତାପରେ ସେ ଅନେକଥର ଏହି ଓଡିଶା ମାଟିକୁ ଆସିଛନ୍ତି । ମଦର ଟେରେସା କୋଲକାତାକୁ ତାଙ୍କର ସେବା କ୍ଷେତ୍ର ଭାବେ ଗ୍ରହଣ କରିଥିଲେ । ଭାରତରୁ ସାରା ବିଶ୍ୱକୁ ସେ ମାନବତାର ବାର୍ତା ଦେଇଥିଲେ ।
ସନ୍ଥ ମଦର ଟେରେସା ୨୬ ଅଗଷ୍ଟ ୧୯୧୦ରେ ସ୍କୋପଜେ ( ଆଧୁନିକ ମାସିଡୋନିଆ ଗଣରାଜ୍ୟ ) ରେ ଜନ୍ମ ହୋଇଥିଲେ । ଏହା ତୁର୍କ ସାମ୍ରାଜ୍ୟର ଏକ ଅଂଶ ଥିଲା । ଜୀବନର ୧୮ ବର୍ଷ ମାସିଡୋନିଆରେ ବିତେଇବା ପରେ ସେ ଆୟରଲ୍ୟାଣ୍ଡ ଯାଇଥିଲେ । ତତପରେ ସେ ଆସିଥିଲେ ଭାରତ । ଯେଉଁଠାରେ ସେ ବିତେଇଲେ ଜୀବନର ଅପୂର୍ବ ମୁହୂର୍ତ । ସନ୍ଥ ଟେରେସା ପ୍ରତିଷ୍ଠା କରିଥିଲେ ମିଶନାରୀ ଅଫ୍ ଚ୍ୟାରିଟି ( ଏକ ରୋମାନ କ୍ୟାଥୋଲିକ୍ ଧାର୍ମିକ ମଣ୍ଡଳୀ )।
୨୦୧୨ରେ ଏହି ମିଶନାରୀରେ ୪୫୦୦ ସିଷ୍ଟର ଯୋଗଦେଇଥିଲେ ଏବଂ ଏହି ମିଶନାରୀ ୧୩୩ଟି ଦେଶରେ ଚାଲୁ ରହିଥିଲା । ସିଷ୍ଟରମାନେ ଲୋକଙ୍କ ଘରକୁ ଯାଇ ଏଚଆଇଭି / ଏଡସ୍ ,କୁଷ୍ଠ ,ଯକ୍ଷ୍ମା ଆଦିରେ ପୀଡିତ ଲୋକଙ୍କ ସେବା କରୁଥିଲେ । ଦାରିଦ୍ରରେ ଥିବା ଲୋକଙ୍କୁ ଖାଇବାକୁ ଦେବା ଓ ପିତୃମାତୃହୀନ ପିଲାଙ୍କୁ ନେଇ ଅନାଥାଳୟ ମଧ୍ୟ ପ୍ରତିଷ୍ଠା କରିଥିଲେ । ସନ୍ଥ ଟେରେସାଙ୍କ ସାନିଧ୍ୟତାରେ ଖୁବ୍ ହୃଦୟତାର ସହ ମିଶନାରୀର ସିଷ୍ଟରମାନେ ଲୋକଙ୍କ ସେବା କରୁଥିଲେ। ସନ୍ଥ ଟେରେସାଙ୍କ ସମାଜ ପ୍ରତି ଏହି ମହତ୍ୱ ସେବା ପାଇଁ ଅନେକ ସମ୍ମାନ ଓ ପୁରସ୍କାରର ଅଧିକାରୀ ହୋଇଥିଲେ ।
୧୯୬୨ରେ ସନ୍ଥ ଟେରେସା ପାଇଥିଲେ ରେମନ ମେଗାସେସ୍ ଶାନ୍ତି ପୁରସ୍କାର ଓ ୧୯୭୯ରେ ନୋବେଲ ଶାନ୍ତି ପୁରସ୍କାର ଏବଂ ୧୯ ଅକ୍ଟୋବର ୨୦୦୩ରେ ସନ୍ଥ ଟେରେସା ‘କୋଲକତାର ଧନ୍ୟ ଟେରେସା’ ନାମରେ ଘୋଷିତ ହୋଇଥିଲେ। ୮୭ ବର୍ଷ ବୟସରେ ୫ସେପ୍ଟେମ୍ବର ୧୯୯୭ରେ ଏହି ମହିୟସୀ ନାରୀ ସନ୍ଥ ଟେରେସା ଏ ନଶ୍ୱର ଜଗତରୁ ଚିର ବିଦାୟ ନେଇଥିଲେ । ହେଲେ ସାରା ବିଶ୍ୱରେ ପରିଚିତା ଏହି ମା’ ବହୁ ଆଗରୁ ବିଶ୍ୱ ପ୍ରାଣରେ ଜଣେ ସନ୍ଥ ବୋଲି ଅଭିହିତ ହୋଇଥିଲେ ।