ସମ୍ବଲପୁର ଭାଇରାଲ ଭିଡିଓର ତଦନ୍ତ ଦିଗକୁ ନେଇ ଉଠିଛି ପ୍ରଶ୍ନ ! ଭିଡିଓରେ ଅଭିଯୁକ୍ତଙ୍କ ଚେହେରା ସ୍ପଷ୍ଟ ଜଣାପଡୁଥିଲେ ବି ଟେର ପାଉନି ପୁଲିସ
କନକ ବ୍ୟୁରୋ : ସମ୍ବଲପୁର ଭାଇରାଲ ଭିଡିଓର ତଦନ୍ତ ଦିଗକୁ ନେଇ ଏବେ ଉଠିଛି ପ୍ରଶ୍ନ । ଭାଇରାଲ ଭିଡିଓରେ ଅଭିଯୁକ୍ତଙ୍କ ଚେହେରା ସ୍ପଷ୍ଟ ଜଣାପଡୁଥିଲେ ବି ସେମାନଙ୍କ ଟେର ପାଉନି ପୁଲିସ । କେବେ ଧାରପଡିବେ ଅତ୍ୟାଚାରୀ ଦୁର୍ବୃତ୍ତ ତାକୁ ନେଇ ଏବେ ପୁଲିସର ପାରିବା ପଣିଆ ଉପରେ ପ୍ରଶ୍ନ ଉଠିଛି । ଦୁଇ ଜଣ ଯୁବତୀଙ୍କ ସହ ଅସଦାଚାରଣର ଭିଡିଓ ଭାଇରାଲ ହେବା ପରେ ସମ୍ବଲପୁର ପୁଲିସ ପାଖରେ ଅଭିଯୋଗ ହୋଇଛି । ବିଜେପି ମହିଳା ମୋର୍ଚ୍ଚା ପକ୍ଷରୁ ଏତଲା ଦିଆଯାଇଛି । ଘଟଣାକୁ ନେଇ ପୁଲିସ ତନାଘନା ତଦନ୍ତ ଜାରି ରଖିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଗତକାଲି ଏକ ଭିଡ଼ିଓ ଭାଇରାଲ ହୋଇଥିଲା ଯେଉଁଠି ଦୁଇ ଜଣ ମହିଳାଙ୍କୁ ଉଲଗ୍ନ କରି ଭିଡିଓ କରିଥିଲେ ଦୁର୍ବୃତ୍ତ । ଏ ନେଇ ବିଜେପି ମହିଳା ମୋର୍ଚ୍ଚା ପକ୍ଷରୁ ଥାନାରେ ଏତଲା ଦିଆଯାଇଥିଲା । ଭିଡଓରେ ବାଡି ଧରି ଦୁଇ ଜଣ ମହିଳାଙ୍କୁ ଧମକ ଦିଆଯାଉଥିବା ଦେଖିବାକୁ ମିଳିଥିଲା । ଭିଡିଓରେ ଦୁଇ ଜଣ ମହିଳା ଉଲଗ୍ନ ହେବାର ଦୃଶ୍ୟ ରହିଥିବା ବେଳେ ମହିଳାଙ୍କ ସମ୍ବେଦନଶୀଳ ଅଙ୍ଗରେ ଆଘାତ କରିବାର ମଧ୍ୟ ଦେଖିବାକୁ ମିଳିଥିଲା । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ଓଡ଼ିଶାରେ ମହିଳା ଅସଦାଚରଣର ଭିଡିଓ, ଅହେତୁକ ଭାବରେ ବୃଦ୍ଧି ପାଉଛି । ବିଧାନସଭାରେ ଖୋଦ୍ ମୁଖ୍ୟମନ୍ତ୍ରୀ ରଖିଥିବା ଉତ୍ତର କହୁଛି-ଗତ ୩ ବର୍ଷରେ ଏଭଳି ୧୭୫ଟି ଭିଡିଓ ଭାଇରାଲ ହୋଇଛି । ୨୦୧୫ରେ ୪୨ଟି, ୨୦୧୬ରେ ୧୦ଟି ଏବଂ ୨୦୧୭ରେ ଏହାର ସଂଖ୍ୟା ପହଂଚିଛି ୯୩ରେ ।
ଗତ ନଭେମ୍ବର ମାସରେ ଭାଇରଲ ଭିଡିଓ ନେଇ ଆଡଭାଇଜରି ଜାରି କରିଥିଲା ରାଜ୍ୟ ପୋଲିସ୍ । ଯେଉଁଥିରେ ସବୁ ଜିଲ୍ଲାର ଏସପିଙ୍କୁ ଏନେଇ ନିର୍ଦ୍ଦେଶନାମା ଜାରି କରାଯାଇ କୁହାଯାଇଥିଲା, ଆପତ୍ତିଜନକ ଭିଡିଓ ଭାଇରାଲ୍ କରିବା ବେଆଇନ । ଭାଇରାଲ ଭିଡିଓ ପାଇଁ ୫ରୁ ୭ ବର୍ଷ ଯାଏଁ ଜେଲ ଦଣ୍ଡାଦେଶ ହୋଇପାରେ । ନିକଟରେ ଭୁବନେଶ୍ୱରରେ ଥିବା ଫରେନସିକ୍ ଲାବରୋଟୋରୀଙ୍କୁ ଆଧୁନିକିକରଣ କରାଯାଇ ଉଦଘାଟନ କରାଯାଇଥିଲା । ଯାହାର ମୂଳ ଉଦ୍ଦେଶ୍ୟ ଥିଲା ସାଇବର ଅପରାଧ ଉପରେ ଅଙ୍କୁଶ ଲଗାଯିବ । କିନ୍ତୁ ସ୍ଥିତିରେ କୌଣସି ପରିବର୍ତନ ଆସିଲା ଭଳି ମନେ ହେଉନି । ଏସବୁ ଭିତରେ ଆମ ଅନୁରୋଧ ରହିବ । କୌଣସି ଆପତ୍ତିଜନକ ଭିଡିଓକୁ ପୋଷ୍ଟ କିମ୍ବା ସେୟାର କରନ୍ତୁ ନାହିଁ । ବେଆଇନ କାର୍ୟ୍ୟକୁ ଅନ୍ତତଃ ନିଜେ ପ୍ରୋତ୍ସାହନ ଦିଅନ୍ତୁ ନାହିଁ । ଆପତ୍ତିଜନକ ଭିଡିଓ ସଂପର୍କରେ ସୂଚନା ପାଇଲେ ପୁଲିସକୁ ଖବର ଦିଅନ୍ତୁ ।
ଏସବୁ ସତ୍ୱେ ଭିଡ଼ିଓ ଭାଇରାଲରେ କୌଣସି ସୁଧାର ଆସୁନି । ଧୀରେ ଧୀରେ ଏପରି ଘଟଣା ବଢ଼ିଚାଲିଛି । ତେବେ ଏହି ଘଟଣାର ଅଭିଯୁକ୍ତ କେବେ ଧାରାପଡ଼ିବେ ବା ପୋଲିସ ସେମାନଙ୍କୁ କେବେ ଖୋଜି ପାଇବ ସେନେଇ ଅନେକ ପ୍ରଶ୍ନ ଉଠୁଛି ।