ସିବିଆଇ ଚଢାଉ ପରେ ସିସୋଦିଆଙ୍କ ସାମ୍ବାଦିକ ସମ୍ମିଳନୀ । କହିଲେ ଆପର ଲୋକପ୍ରିୟତାରେ ଭୟଭୀତ ମୋଦି ସରକାର
କନକ ବ୍ୟୁରୋ : ଦିଲ୍ଲୀ ଅବକାରୀ ନୀତିରେ ଅର୍ଥ ହେରଫେର ଓ ବଡ ଧରଣର ଦୁର୍ନୀତି ଅଭିଯୋଗ ଆସିବା ପରେ ସିବିଆଇ ସ୍କାନରରେ ଦିଲ୍ଲୀ ଉପମୁଖ୍ୟମନ୍ତ୍ରୀ ମନିଷ ସିସୋଦିଆ । ଶୁକ୍ରବାର ସିସୋଦିଆଙ୍କ ଘର, କାର୍ଯ୍ୟାଳୟ ଉପରେ ଚଢାଉ କରିଛି ସିବିଆଇ । ଏହା ପରେ ଶନିବାର ସାମ୍ବାଦିକ ସମ୍ମିଳନୀ କରି ସିସୋଦିଆ ନିଜ ବୟାନ ଜାରି କରିଛନ୍ତି । ସିସୋଦିଆ କହିଛନ୍ତି ବିଜେପି ପ୍ରକୃତରେ ଆମ ଆଦମୀ ପାର୍ଟିର ସଫଳତା ଓ ଲୋକପ୍ରିୟତାକୁ ନେଇ ବିଚଳିତ ହୋଇପଡିଛି । କେଜ୍ରିୱାଲଙ୍କୁ ରୋକିବାକୁ ପ୍ରୟାସ କରି ଏଭଳି ଚଢାଉ କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଏଥିସହ ସିସୋଦିଆ ଏକଥା ମଧ୍ୟ ଦୃଢୋକ୍ତିର ସହ କହିଛନ୍ତି କି ନୂଆ ଅବକାରୀ ନୀତିରେ କୌଣସି ପ୍ରକାରର ଘୋଟାଲ ନାହିଁ । ଭଲ କାମକୁ ରୋକିବା ପାଇଁ କେନ୍ଦ୍ର ସରକାର ଚେଷ୍ଟା କରିବା ସହ ଆପକୁ ବଦନାମ କରାଯାଉଛି । ୨ରୁ ୩ଦିନ ମଧ୍ୟରେ ଗିରଫ ମଧ୍ୟ କରାଯାଇପାରେ ବୋଲି ସିସୋଦିଆ ଆଶଙ୍କା ପ୍ରକାଶ କରିଛନ୍ତି ।
ସେପଟେ କେନ୍ଦ୍ରମନ୍ତ୍ରୀ ଅନୁରାଗ ଠାକୁର ସାମ୍ବାଦିକ ସମ୍ମିଳନୀ କରି ଆମ ଆଦମୀ ପାର୍ଟିକୁ ପାଲଟା ଜବାବ ଦେଇଛନ୍ତି । ସେ କହିଛନ୍ତି କି ଦିଲ୍ଲୀ ଅବକାରୀ ନୀତିର ମୁଖ୍ୟ ଅଭିଯୁକ୍ତ ଅରବିନ୍ଦ କେଜ୍ରିୱାଲ । ୨୪ଘଂଟା ଭିତରେ କେଜ୍ରିୱାଲ ସର୍ବ ସମ୍ମୁଖକୁ ଆସନ୍ତୁ ଓ ଘଟଣା ବାବଦରେ ଜବାବ ରଖନ୍ତୁ ।
କେଜ୍ରିୱାଲଙ୍କୁ ଖୋଲାଖୋଲି ଚ୍ୟାଲେଞ୍ଜ ଦେଇଛନ୍ତି କେନ୍ଦ୍ରମନ୍ତ୍ରୀ । ଉଭୟ ସିସୋଦିଆ ଓ କେଜ୍ରିୱାଲ ଅବକାରୀ ନୀତିରେ ବଡ ଘୋଟାଲା କରିଥିବା କେନ୍ଦ୍ରମନ୍ତ୍ରୀ କହିଛନ୍ତି । ଏଥିସହ ଦିଲ୍ଲୀ ସରକାର ମଦ ମାଫିଆଙ୍କୁ ୧୪୪ କୋଟି ଟଙ୍କା ଛାଡ କଣ ପାଇଁ କରିଛନ୍ତି ବୋଲି ପ୍ରଶ୍ନ କରିଛନ୍ତି କେନ୍ଦ୍ରମନ୍ତ୍ରୀ ।
ଶୁକ୍ରବାର ସକାଳ ୮ଟାରୁ ୧୦ଟା ପର୍ଯ୍ୟନ୍ତ ଚଢାଉ କରିଥିଲା । ୧୪ ଘଂଟାର ଚଢାଉରେ ସିବିଆଇ ସିସୋଦିଆଙ୍କ ଫୋନ ଓ ଲାପଟପ ଜବତ କରିଛି । ସିସୋଦିଆଙ୍କ ବ୍ୟତିତ ପୂର୍ବତନ ଏକ୍ସାସାଇଜ କମିଶନର, ଡେପୁଟି କମିଶନର, ଆସିଷ୍ଟାଂଟ କମିଶନର ଓ ୯ଜଣ ବ୍ୟବସାୟଙ୍କୁ ନାଁରେ ମାମଲା ରୁଜୁ କରିଛି ସିବିଆଇ । ସିବିଆଇ ଅଭିଯୋଗ କରିଛି କି ସିସୋଦିଆ ଓ ଅନ୍ୟ ଅଭିଯୁକ୍ତ ସରକାରୀ କର୍ମଚାରୀମାନେ ଟେଣ୍ଡର ପରେ ଲାଇସେନ୍ସଧାରୀଙ୍କୁ ଅତ୍ୟାବଶକୀୟ ସୁବିଧା ଦେଇଛନ୍ତି । ଏହା ପାଇଁ ଦକ୍ଷ ଅଧୀକାରୀଙ୍କ ଅନୁମୋଦନ ବିନା ଏକ୍ସାଇଜ ପଲିସି ୨୦୨୧-୨୨ ସମ୍ବନ୍ଧୀୟ ସୁପାରିସ ଓ ନିଷ୍ପତି ନେଇଛନ୍ତି । ସିବିଆଇ ଦିଲ୍ଲୀ ସମେତ ବିଭିନ୍ନ ରାଜ୍ୟର ମୋଟ ୩୧ଟି ସ୍ଥାନରେ ଚଢାଉ କରିଛି । ଚଢାଉ ସମୟରେ ଦସ୍ତାବିଜ, ଡିଜିଟାଲ ରେକର୍ଡ ସହ କିଛି ଗୁରୁତ୍ୱପୂର୍ଣ୍ଣ ତଥ୍ୟ ସିବିଆଇ ହାତରେ ଲାଗିଛି ।