କନକ ବ୍ୟୁରୋ: କରମଣ୍ଡଳ ଦୁର୍ଘଟଣା ଯେ କେତେ ଲୋକଙ୍କ ଆଖିରେ ଲୁହ ଆଣିଛି ତାହାର ସୀମା ନାହିଁ । ହସ୍ପିଟାଲ ବାହାରେ ଏବେ ଶୁଭୁଛି ନିଜ ପୁଅ, ଝିଅଙ୍କୁ ହରାଇଥିବା ବାପା ମା’ଙ୍କ କାନ୍ଦ । କେମିତି ଧୈର୍ଯ୍ୟ ଧରିବେ ସେ ବାପା ମା ଯେତେବେଳେ ସେମାନେ ନିଜ ପୁଅର ମୁଣ୍ଡ ଆଉ ହାତ ନଥିବା ମୃତ ଶରୀର ଦେଖିବେ । ସତରେ ଏ ଦୁଃଖଠୁ ବଡ ଦୁଃଖ ହୁଏତ ଜଣେ ବାପା, ମା’ଙ୍କ ପାଇଁ ଆଉ କିଛି ବି ନହୋଇପାରେ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ବିହାରର ସୂରଜ କୁମାର ପ୍ରଥମ ଥର ପାଇଁ ଟ୍ରେନରେ ଯାତ୍ରା କରୁଥିଲେ, ହେଲେ କିଏ ଜାଣିଥିଲା ଏହା ତାଙ୍କ ଶେଷ ଯାତ୍ରା ହୋଇଯିବ ବୋଲି । ଦଶମ ପରୀକ୍ଷା ଦେଇ ବାହାର ରାଜ୍ୟକୁ ଯାଉଥିଲେ ଦି ପଇସା ରୋଜଗାର କରି ଭଉଣୀ ବାହାଘର କରିବେ । ବାପାଙ୍କ ସହ ଘର ଚଳାଇବାରେ ସାହାଯ୍ୟ କରିବେ । ହେଲେ ବିଧିର ବିଧାନ କିନ୍ତୁ କିଛି ଅଲଗା ଥିଲା କରମଣ୍ଡଳର କାଳ ରାତିରେ ସେଦିନ ତାଙ୍କ ସହ ଯାହା ଘଟିଲା ପୂରା ପରିବାର ଏବେ ସ୍ତବ୍ଧ ହୋଇଯାଇଛି ।
ବାଲେଶ୍ୱର ବାହାନଗା ଟ୍ରେନ ଦୁର୍ଘଟଣା ପରେ ସୂରଜଙ୍କ ପରିବାର ବ୍ୟସ୍ତ ହୋଇପଡିଥିଲେ । ପୁଅକୁ ଖୋଜିବାକୁ ବାପା ବିହାରରୁ ଓଡିଶା ଧାଇଁ ଆସିଥିଲେ । କାନ୍ଦି କାନ୍ଦି ଏ ହସ୍ପିଟାଲରୁ ସେ ହସ୍ପିଟାଲ ପୁଅକୁ ଅନେକ ଖୋଜିଥିଲେ । ଶେଷରେ ତାଙ୍କୁ ପୁଅର ମୃତଦେହ ମିଳିଥିଲା, ଆଉ ଏମିତି ଅବସ୍ଥାରେ ମିଳିଥିଲା ଯାହା ଜଣେ ବାପା ଦେଖି ଧୈର୍ଯ୍ୟ ଧରିବା ସମ୍ଭବ ନୁହେଁ । ମୁଣ୍ଡ ନଥିବା ପୁଅର ମୃତ ଶରୀରରକୁ ବାପା ଡ୍ରେସ ଆଉ ହାତର କଡା ଦେଖି ଚିହ୍ନଟ କରିଥିଲେ । ଆଉ ଏହା ଦେଖିବା ପରେ ବାପା ଆଖିରୁ ଲୁହ ଶୁଖୁନି କି ଛାତିର କୋହ ବନ୍ଧ ବାଡ ମାନୁନି ।
କେତେ ଭୟଙ୍କର ହୋଇଥିବ ସେ ରାତି, ଯିଏ ତାକୁ ନିଜ ଆଖିରେ ଦେଖିଥିବ । କୁଢ କୁଢ ମୃତଦେହକୁ ଉଣ୍ଡାଳି କିଏ ନିଜ ପୁଅକୁ ଖୋଜୁଛି ତ କିଏ ନିଜ ସ୍ୱାମୀକୁ ଆଉ କିଏ ନିଜ ବାପାକୁ… ସତରେ ଏମିତି କାଳ ଦିନ ଆଉ କେବେ ବି ନ ଆସୁ… ଖବର ଲେଖିଲା ବେଳକୁ ହାତ ଥରୁଛି.. ଥରେ ଭାବନ୍ତୁ ନିଜ ବାପା, ମା, ଭାଇ, ଉଭଣୀ, ପୁଅ, ଝିଅଙ୍କୁ ହରାଇଥିବା ଲୋକଟି ଉପରେ ଏ ଦିନ କେମିତି ବିତୁଥିବ…