ବିଦ୍ରୋହୀ ବିଧାୟକ ପୁଣିଥରେ ନିଷ୍ପତ୍ତିର ପୁନଃବିଚାର କରିପାରିବେ, ସେଥିରେ ସମସ୍ୟା ନାହିଁ : ଶରଦ ପାୱାର
କନକ ବ୍ୟୁରୋ : ମହାରାଷ୍ଟ୍ର ରାଜନୀତି କେଉଁ ମୋଡ ନେବ ତାହାକୁ ନେଇ ଏବେ ବି ଦ୍ୱନ୍ଦ୍ୱ ଲାଗି ରହିଛି । ସିନ୍ଦେ ସରକାରରେ ଅଜିତ ପାୱାର ସାମିଲ ହେବା ପରେ ଏନସିପିରେ ଲାଗିଥିବା ନିଆଁ ଥମିବାର ନାଁ ନେଉନାହିଁ । ଗୋଟିଏ ପଟେ ଅଜିତ ପାୱାର ଏନସିପି ପାର୍ଟି ଓ ଚିହ୍ନକୁ ନିଜ ପକ୍ଷରେ ରଖିବାକୁ ସବୁ ପ୍ରକାର ଉଦ୍ୟମ କରୁଥିବା ବେଳେ ଅନ୍ୟପଟେ ଶରଦ ପାୱାର କହିଛନ୍ତି, ଏନସିପି ଦଳ ଓ ଚିହ୍ନ ଅନ୍ୟ କେଉଁଆଡେ ଯିବନି । ଏପରିକି ନିଜେ ଶରଦ ପାୱାର ନିର୍ବାଚନମଣ୍ଡଳୀ ବୁଲି ସମର୍ଥନ ଜୁଟାଇବାରେ ଲାଗିଛନ୍ତି । ଶରଦ ପାୱାର ପ୍ରଥମେ ବିଦ୍ରୋହୀ ବିଧାୟକ ଛଗନ ଭୁଜବଳଙ୍କ ନିର୍ବାଚନମଣ୍ଡଳୀରୁ ନିଜର ଯାତ୍ରା ଆରମ୍ଭ କରିଛନ୍ତି । ଏପରିକି ଛଗନଙ୍କୁ ବିଧାୟକ ଭାବେ ନିର୍ବାଚିତ କରାଇବାରେ ସାଥ୍ ଦେଇଥିବାରୁ କ୍ଷମା ପ୍ରାର୍ଥନା କରିଛନ୍ତି । କେବଳ ଏତିକି ନୁହେଁ ଶରଦ କହିଛନ୍ତି, ଯଦି କୌଣସି ବିଦ୍ରୋହୀ ବିଧାୟକ ନିଷ୍ପତ୍ତି ବଦଳାଇ ପୁଣିଥରେ ଫେରି ଆସିବାକୁ ଚାହୁଁଥାନ୍ତି ତେବେ ସେଥିରେ କୌଣସି ସମସ୍ୟା ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଛଗନ ଭୁଜବଳଙ୍କ ଗଡରେ ଶରଦ କହିଛନ୍ତି, ମୁଁ ଏଠାକୁ କାହା ବିରୋଧରେ ଅଭିଯୋଗ ନେଇ ଆସିନି ବରଂ ସମସ୍ତଙ୍କୁ କ୍ଷମା ମାଗିବାକୁ ଆସିଛି । ଭୁଲ ନିଷ୍ପତ୍ତି ନେଇଥିବାରୁ ମୁଁ ଦୁଃଖିତ । ଆପଣ ମୋତେ ଭରସା କରି ଦଳକୁ ଭୋଟ ଦେଇଥିଲେ । କିନ୍ତୁ ମୋର ନିଷ୍ପତ୍ତି ଭୁଲ ଥିଲା, ସେଥିପାଇଁ ଭୁଲ ମାଗୁଛି । ତେବେ ପ୍ରତିଶ୍ରୁତି ଦେଉଛି ଏଭଳି ଭୁଲ ଦ୍ୱିତୀୟଥର ହେବନି । ଏଭଳି କହି ଛଗନ ଭୁଜବଳଙ୍କୁ ପରୋକ୍ଷରେ ଟାର୍ଗେଟ କରିଥିଲେ ଶରଦ । ଏସବୁ ଭିତରେ ମହାରାଷ୍ଟ୍ର ବାଚସ୍ପତି ଶିବସେନାର ଉଭୟ ପକ୍ଷକୁ ନୋଟିସ ଜାରି କରିବା ସହ ସଦସ୍ୟ ପଦ ଅଯୋଗ୍ୟତା ଉପରେ ଜବାବ ମାଗିଛନ୍ତି । ତେଣୁ ଆଗକୁ ମହାରାଷ୍ଟ୍ର ରାଜନୀତି କେଉଁ ମୋଡ ନେବ ତାହା ଏବେ ସବୁଠୁ ବଡ ପ୍ରଶ୍ନବାଚୀ ।