କନକ ବ୍ୟୁରୋ : ନେପାଳ କଂଗ୍ରେସର ନେତା ରାମଚନ୍ଦ୍ର ପାଉଦେଲଙ୍କୁ ନେପାଳର ରାଷ୍ଟ୍ରପତି ଭାବେ ନିର୍ବାଚିତ କରାଯାଇଛି । ରାଷ୍ଟ୍ରପତି ନିର୍ବାଚନରେ ପାଉଦେଲ ପୁଷ୍ପକମଲ ଦହଲଙ୍କ ନେତୃତ୍ୱରେ ଚାଲିଥିବା ୮ଦଳିଆ ମେଣ୍ଟ ତରଫରୁ ପ୍ରାର୍ଥୀ ହୋଇଥିଲେ । ସେ ତାଙ୍କର ନିକତମ ପ୍ରତିଦ୍ୱନ୍ଦୀ ସୁଭାଷ ଚନ୍ଦ୍ର ନେମ୍ବବାଙ୍ଗଙ୍କୁ ବଡ ଅନ୍ତରରେ ପରାଜିତ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ନେପାଳ ନିର୍ବାଚନ ଆୟୋଗ ଗୁରୁବାର ଦିନ ନିର୍ବାଚନ ଫଳାଫଳ ଘୋଷଣା କରି ସୂଚନା ଦେଇଛନ୍ତି କି, ରାମଚନ୍ଦ୍ର ପାଉଦେଲଙ୍କୁ ୩୩,୮୦୨ ଖଣ୍ଡ ଭୋଟ ମିଳିଥିବା ବେଳେ ତାଙ୍କ ନିକଟତମ ପ୍ରତିଦ୍ୱନ୍ଦୀ ସୁଭାଷ ଚନ୍ଦ୍ର ନେମ୍ବବାଙ୍ଗଙ୍କୁ ୧୫,୫୧୮ ଖଣ୍ଡ ଭୋଟ ମିଳିଛି । ପାଉଦେଲଙ୍କୁ ନେପାଳ କଂଗ୍ରେସ ଓ ସିପିଏନ ସହିତ ମୋଟ ୮ ଦଳିଆ ମେଣ୍ଟ ସମର୍ଥନ କରିଥିଲେ । ତାଙ୍କୁ ଏହି ମେଣ୍ଟର ୩୫୨ ବିଧାନସଭା ସଦସ୍ୟ ଓ ୨୧୪ ଜଣ ସାଂସଦଙ୍କ ଭୋଟ ମିଳିଥିଲା ।
ପାଉଦେଲଙ୍କ ରାଜନୈତିକ ଜୀବନୀ କଥା କହିଲେ ସେ ନେପାଳ କଂଗ୍ରେସର ଜଣେ ବରିଷ୍ଠ ନେତା । ୭୮ ବର୍ଷିୟ ରାମଚନ୍ଦ୍ର ପାଉଦେଲ ୧୯୪୪ ସେପ୍ଟେମ୍ବର ମାସରେ ଜନ୍ମଗ୍ରହଣ କରିଥିଲେ । ୨୦୨୨ ସାଧାରଣ ନିର୍ବାଚନରେ ତାଙ୍କୁ ସଂସଦର ସଦସ୍ୟ ଭାବେ ଚୟନ କରାଯାଇଥିଲା । ଏହାସହ ସେ ନେପାଳ ସରକାରରେ ଉପ ପ୍ରଧାନମନ୍ତ୍ରୀ ଓ ପ୍ରତିନିଧୀ ସଭାର ଅଧ୍ୟକ୍ଷ ଭାବେ ମଧ୍ୟ କାର୍ଯ୍ୟ କରିଛନ୍ତି ।