ସହଜରେ ମିଳିଲା ସଭାପତି ପଦ ! ଏଣିକି କଣ୍ଟକିତ ରାସ୍ତାରେ ଚାଲିବେ ରାହୁଲ, ଜାଣନ୍ତୁ କଣ ରହିଛି କଂଗ୍ରେସ ଯୁବରାଜଙ୍କ ଆଗରେ ନୂଆ ଚ୍ୟାଲେଞ୍ଜ
କନକ ବ୍ୟୁରୋ : କଂଗ୍ରେସରେ ଆରମ୍ଭ ହେଲା ରାହୁଲ ଯୁଗ । ଉପାଧ୍ୟକ୍ଷରୁ ଅଧ୍ୟକ୍ଷ ପାହ୍ୟାକୁ ପାଇଲେ ପଦୋନ୍ନତି । କଂଗ୍ରେସର ନୂଆ ଅଧ୍ୟକ୍ଷ ଭାବେ ରାହୁଲ ଗାନ୍ଧି ନିର୍ବାଚିତ ହୋଇଛନ୍ତି । ୧୯ ବର୍ଷ ପରେ କଂଗ୍ରେସର କ୍ଷମତା ପରିବର୍ତନ । ଦଳ ପାଇଲା ନୂଆ ଅଧ୍ୟକ୍ଷ । ମା’ଙ୍କ ଦାୟିତ୍ୱ ନେଲେ ରାହୁଲ । ନୂଆ ସଭାପତି ଭାବେ ଯୁବରାଜ ରାହୁଲ ଗାନ୍ଧିଙ୍କ ନାଁ ଘୋଷଣା କରିଛି ଦଳ । ଏନେଇ କଂଗ୍ରେସ ପକ୍ଷରୁ ଆଜି ଔପଚାରିକ ଭାବେ ରାହୁଳଙ୍କ ନାମ ଘୋଷଣା କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସର ଅଧ୍ୟକ୍ଷ ପଦ ପାଇଁ ହେବାକୁ ଥିବା ନିୟମ ଅନୁଯାୟୀ ଆଜି ନାମାଙ୍କନ ପ୍ରତ୍ୟାହାର କରିବାର ଶେଷ ତାରିଖ ଥିଲା । ଅଧ୍ୟକ୍ଷ ପଦ ପାଇଁ କେବଳ ରାହୁଲ ହିଁ ନାମାଙ୍କନ ପତ୍ର ଦାଖଲ କରିଥିଲେ । ତେବେ ଦ୍ୱିପ୍ରହର ତିନିଟା ପରେ ନାମାଙ୍କନ ପ୍ରତ୍ୟାହାର ପାଇଁ ସମୟ ଶେଷ ହେବା ପରେ ରାହୁଲଙ୍କୁ କଂଗ୍ରେସର ନୂଆ ଅଧ୍ୟକ୍ଷ ଭାବେ ଘୋଷଣା କରାଯାଇଛି । ରାହୁଲ ଦାଖଲ କରିଥିବା ନାମାଙ୍କନ ପତ୍ରରୁ ସମସ୍ତ ୮୯ ସେଟ ଠିକ ଥିଲା । ଚଳିତ ମାସ ୪ ତାରିଖରେ କଂଗ୍ରେସର ଅଧ୍ୟକ୍ଷ ପଦ ପାଇଁ ରାହୁଲ ନାମାଙ୍କନ ପତ୍ର ଦାଖଲ କରିଥିଲେ । ସଭାପତି ଭାବେ ରାହୁଲ ଗାନ୍ଧୀ ନିର୍ବାଚିତ ହେବା ପରେ କଂଗ୍ରେସ କର୍ମୀଙ୍କ ମଧ୍ୟରେ ଖୁସିର ଲହରି ଖେଳିଯାଇଛି ।
ଗୁଜରାଟର ଦ୍ୱିତୀୟ ପର୍ଯ୍ୟାୟ ନିର୍ବାଚନ ପାଇଁ ମତଦାନ ପୂର୍ବରୁ ରାହୁଲ କଂଗ୍ରେସର ମଙ୍ଗ ଧରିବେ ବୋଲି ଚର୍ଚ୍ଚା ହେଉଥିଲା । ଆଗାମୀ ୧୪ ତାରିଖରେ ଗୁଜରାଟରେ ଦ୍ୱିତୀୟ ପର୍ଯ୍ୟାୟ ନିର୍ବାଚନ ପାଇଁ ମତଦାନ ହେବ । ଆଉ ଏହା ପୂର୍ବରୁ ରାହୁଲ ଅଧ୍ୟକ୍ଷ ଭାବେ ନିର୍ବାଚିତ ହେବ କର୍ମୀଙ୍କ ମନରେ ଏକ ନୂଆ ଆଶା ସଂଚାର କରିଛି । ତେବେ ପାଖାପାଖି ଦୁଇ ଦଶକ ପରେ ଅଥାର୍ତ ୧୯ ବର୍ଷ ପରେ କଂଗ୍ରେସ ଦଳ ନୂଆ ମୁଖିଆଙ୍କୁ ପାଇଛି । ପୂର୍ବରୁ ଏହି ଦାୟିତ୍ୱ ନିର୍ବାହ କରିଥିଲେ ସୋନିଆ ଗାନ୍ଧି । ୧୯୯୮ ମସିହାରୁ କଂଗ୍ରେସ ଦଳର ଅଧ୍ୟକ୍ଷା ଭାବେ ସୋନିଆ ଦାୟିତ୍ୱ ତୁଲାଇଥିଲେ । ଏପରିକି ତାଙ୍କରି ନେତୃତ୍ୱରେ ଲଗାତାର ଦୁଇ ବର୍ଷ ଧରି କେନ୍ଦ୍ରରେ ସରକାର ଗଢିଥିଲା କଂଗ୍ରେସ ।
ରାହୁଲ କଂଗ୍ରେସ ଅଧ୍ୟକ୍ଷ ଭାବେ ନିର୍ବାଚିତ ହେବା ପରେ ଏବେ ତାଙ୍କ ପାଇଁ ନୂଆ ନୂଆ ଚ୍ୟାଲେଞ୍ଜ ସୃଷ୍ଟି ହୋଇଛି । ଦେଶର ସବୁଠାରୁ ପୁରୁଣା ଦଳର ସଭାପତି ଭାବେ ରାହୁଲଙ୍କ ରାଜଭିଷେକ କରାଯାଇଛି ସତ । କଂଗ୍ରେସ ଇତିହାସର ସବୁଠାରୁ ଖରାପ ସମୟରେ ଦଳର ଦାୟିତ୍ୱ ନେଇଛନ୍ତି ରାହୁଲ । ସ୍ଥିିତି ଏପରି ଅଛି ଯେ, ଲୋକସଭାରେ ବିରୋଧୀ ଦଳ ପାଇଁ ଆବଶ୍ୟକୀୟ ସଂଖ୍ୟା ମଧ୍ୟ ହାସଲ କରି ପାରିନାହିଁ ଦଳ ।ଏବେ ଲୋକସଭାରେ କଂଗ୍ରେସ ଦଳର ୫୦ରୁ କମ ସଦସ୍ୟ ରହିଛନ୍ତି । ଏହାଛଡା ଗୋଟିଏ ପରେ ଗୋଟିଏ ରାଜ୍ୟରୁ ଶାସନଭାର ମଧ୍ୟ ଦଳ ହାତରୁ ଖସି ସାରିଛି । ଏଭଳି ସମୟରେ ନୂଆ ସଭାପତି ଭାବେ ଦାୟିତ୍ୱ ନେବା ରାହୁଲଙ୍କ ପାଇଁ ଅଗ୍ନିପରୀକ୍ଷା ସଦୃଶ । ବିଭିନ୍ନ ଦିଗରୁ ଏବେ କଂଗ୍ରେସ ଭାଜାପା ଠାରୁ ପଛରେ ରହିଛି । ଏଭଳି ସ୍ଥିତିରେ ନିଜ ଘର ସଜାଡିବା ରାହୁଲଙ୍କ ପାଇଁ ଚ୍ୟାଲେଞ୍ଜ ପାଲଟିଛି ।
କଂଗ୍ରେସକୁ ମଜବୁତ କରିବା : ସଭାପତି ଭାବେ ନିର୍ବାଚିତ ହେବା ପରେ ଦଳକୁ ମଜବୁତ ସ୍ଥିତିରେ ପହଞ୍ଚାଇବା ରାହୁଲଙ୍କ ପାଇଁ ମୁଖ୍ୟ ଚ୍ୟାଲେଞ୍ଜ । ୨୦୧୪ ନିର୍ବାଚନ ପରେ କଂଗ୍ରେସର ଅଧୋପତନ ଆରମ୍ଭ ହୋଇଥିଲା ଯାହାର ପ୍ରଭାବ ବିଭିନ୍ନ ରାଜ୍ୟର ବିଧାନସଭା ନିର୍ବାଚନ ଉପରେ ପଡିଥିଲା । ଏପରିକି ୨୦୧୪ ପୂର୍ବରୁ ଅଧିକାଂଶ ରାଜ୍ୟରେ ସରକାର ଗଢିଥିବା କଂଗ୍ରେସ ଏବେ ୬ଟି ରାଜ୍ୟରେ ସିମୀତ ରହିଛି । ବଡ ବଡ ଦୁର୍ନୀତିରେ କଂଗ୍ରେସର ନେତା ସାମିଲ ଥିବା କହି ୨୦୧୪ରେ ଶାସନଗାଦି ନିଜ ହାତକୁ ନେଇଥିଲା ବିଜେପି । ଏହାପରେ କଂଗ୍ରେସ ମୁକ୍ତ ଭାରତର ଆହ୍ୱାନ ଦେଇ ବିଭିନ୍ନ ରାଜ୍ୟରୁ ସରକାର ଗଠନ କରିବାରେ ସକ୍ଷମ ହୋଇଛି ବିଜେପି । ଏଭଳି ସମୟରେ ରାହୁଲ ବୁଡି ଯାଉଥିବା କଂଗ୍ରେସର ଡଙ୍ଗାକୁ କିପରି ଉଦ୍ଧାର କରୁଛନ୍ତି ତାହା ଉପରେ ସମସ୍ତଙ୍କ ନଜର ।
୨୦୧୪ ସାଧାରଣ ନିର୍ବାଚନରେ କଂଗ୍ରେସକୁ ମାତ ଦେଇଥିବା ବିଜେପି ମୁଖ୍ୟତଃ ଯୁବବର୍ଗଙ୍କୁ ଆକୃଷ୍ଟ କରି ଭୋଟ ହାତେଇବା ସହ ସରକାର ଗଠନ କରିଥିଲା । କିନ୍ତୁ ଏବେ ଯୁବଗୋଷ୍ଠୀ ମୋଦି ସରକାର ଉପରେ ଅସନ୍ତୋଷ ଜାହିର କଲେଣି । ଆଉ ଏଭଳି ସମୟରେ କଂଗ୍ରେସର ରାହୁଲଙ୍କ ଭଳି ଯୁବକଙ୍କୁ କଂଗ୍ରେସ ଦଳର ଡୋରି ଦେଇ ଯୁବବର୍ଗଙ୍କ ଭୋଟ ହାତେଇବାକୁ ଲକ୍ଷ୍ୟ ରଖିଛି ଦଳ । ତେବେ ଯୁବଗୋଷ୍ଠୀ ରାହୁଲଙ୍କୁ କିପରି ଗ୍ରହଣ କରୁଛନ୍ତି ତାହା ମଧ୍ୟ ନୂଆ ଅଧକ୍ଷ୍ୟଙ୍କ ପାଇଁ ଏକ ବଡ ଚ୍ୟାଲେଞ୍ଜ ।
କର୍ମୀ କମ ନେତା ଅଧିକ : କଂଗ୍ରେସ ଏବେ ଏମିତି ଏକ ଦଳ ପାଲଟି ଯାଇଛି ଯେଉଁଠି ନେତା ଅଧିକ ଅଛନ୍ତି ସତ କିନ୍ତୁ କର୍ମୀଙ୍କ ସଂଖ୍ୟା ନେତାଙ୍କ ତୁଳନାରେ ମଧ୍ୟ କମ । ଯାହା ଦଳର ପରାଜୟର ଏକ ମୁଖ୍ୟ କାରଣ । କଂଗ୍ରେସ ଦଳ ପାଇଁ ଏକ ବଡ ଚ୍ୟାଲେଞ୍ଜ ହେଉଛି ବିଜେପିର ବୁଥ ସ୍ତରୀୟ କର୍ମୀଙ୍କୁ ପ୍ରତିହତ କରିବା । ଗୋଟିଏ ପଟେ ବୁଥସ୍ତରରେ ବିଜେପି ଶକ୍ତିଶାଳୀ ହେଉଥିବା ବେଳେ ଅନ୍ୟପଟେ ବୁଥସ୍ତରରେ କଂଗ୍ରେସ ଠାରୁ ମୁହଁ ଫେରାଇ ନେଇ ସାରିଲେଣି ପୁରୁଣା କର୍ମୀ । ଯାହା ଦଳ ପରାଜୟର ମୁଖ୍ୟ କାରଣ । ବୁଥ ସ୍ତରରେ କଂଗ୍ରେସର ଥିବା ସଂଗଠନ ଗୁଡିକ ପୂର୍ବାପେକ୍ଷା ଦୁର୍ବଳ ହୋଇସାରିଛି । ତେଣୁ କଂଗ୍ରେସକୁ ମଜବୁତ କରିବାକୁ ହେଲେ ବିଜେପି ଭଳି ବୁଥ ସ୍ତରରୁ କର୍ମୀଙ୍କୁ ଆପଣାଇବାକୁ ପଡିବ । ଏଭଳି ସ୍ଥିତିରେ ବୁଥ ସ୍ତରର କର୍ମୀଙ୍କ ପାଇଁ ରାହୁଲ କେଉଁ ପଦକ୍ଷେପ ନେଉଛନ୍ତି ତାହା ଦେଖିବାର କଥା ।
ସୋସିଆଲ ମିଡିଆରେ ସକ୍ରିୟ : ସୋସିଆଲ ମିଡିଆ ହିଁ ଏକମାତ୍ର ମାଧ୍ୟମ ଯାହା ମାଧ୍ୟମରେ ଜଣେ ନେତା ଭୋଟରଙ୍କ ପାଖରେ ବେଶ ସହଜରେ ପହଞ୍ଚିପାରିବ । ଆଉ ୨୦୧୪ ନିର୍ବାଚନରେ ମୋଦି ସୋସିଆଲ ମିଡିଆକୁ ପାଥେୟ କରି ଯୁବବର୍ଗଙ୍କୁ ଆକର୍ଷିତ କରିବା ସହ ଭୋଟ ହାତେଇ ପାରିଥିଲେ । ଆଉ ଏହି ଟ୍ରେଣ୍ଟର ଦୌଡରେ ବହୁତ ପଛରେ ପଡି ଯାଇଥିଲା କଂଗ୍ରେସ । ଯାହା ଦଳକୁ ଆଶ୍ଚଯ୍ୟଜନକ ଭାବେ କ୍ଷତି ପହଞ୍ଚାଇଥିଲା । ସୋସିଆଲ ମିଡିଆ ସହାୟତାରେ ମୋଦି ସାଧାରଣ ଲୋକଙ୍କ ସହ ସିଧାସଳଖ ସର୍ମ୍ପକ ସ୍ଥାପନ କରିବା କଥା ସମସ୍ତେ ଜାଣନ୍ତି ଠିକ୍ ସେହିଭଳି ରାସ୍ତା ରାହୁଳଙ୍କୁ ଆପଣାଇବାକୁ ପଡିବ ।
ମୋଦି ଲହରକୁ ପ୍ରତିହତ କରିବା : ରାହୁଲଙ୍କ ସିଧାସଳଖ ଲଢେଇ ପ୍ରଧାନମନ୍ତ୍ରୀ ମୋଦିଙ୍କ ସହ ଆଗାମୀ ଦିନରେ ଦେଖିବାକୁ ମିଳିବ । ଦେଶରେ ମୋଦି ଲହର ଯେଉଁଭଳି ଭାବେ ବହୁଛି ତାହାକୁ ପ୍ରଶମିତ କରିବା ଏତେ ସହଜ କଥା ନୁହେଁ । ମୋଦିଙ୍କ ଲହର ଯୋଗୁଁ ଅଧିକାଂଶ ରାଜ୍ୟରେ ଏବେ ଗେରୁଆ ଧ୍ୱଜ ଉଙ୍ଗିବା ଆରମ୍ଭ କରିଛି । କଂଗ୍ରେସ ଶାସିତ ରାଜ୍ୟରେ ମଧ୍ୟ ମୋଦି ଲହର ଦେଖିବାକୁ ମିଳିଛି । ଆଉ ଯାହା ସମ୍ପୂର୍ଣ୍ଣ ଭାବେ ଭୋଟରେ ମଧ୍ୟ ପ୍ରତିଫଳିତ ହେଉଛି । କିନ୍ତୁ ଗୁଜରାଟ ନିର୍ବାଚନରେ ଏହି ଲହରକୁ କିଛି ମାତ୍ରାରେ ଅଟାକାଇପାରିଛନ୍ତି ରାହୁଲ । ଏସବୁକୁ ଦୃଷ୍ଟିରେ ରଖିଲେ ମୋଦି ଲହର ରାହୁଳଙ୍କ ପାଇଁ ଏକ ବଡ ଚ୍ୟାଲେଞ୍ଜ ସୃଷ୍ଟି କରିବ ଯାହାକୁ ପ୍ରତିହତ କରିବା ରାହୁଲଙ୍କ ପାଇଁ କଷ୍ଟକର ହୋଇପାରେ ।
ସିନିୟର- ଜୁନିୟର ନେତାଙ୍କ ଭିତରେ ଉତ୍ତମ ସମ୍ବନ୍ଧ : ଭାରତର ସବୁଠାରୁ ପୁରୁଣା ଦଳ ହୋଇଥିବାରୁ କଂଗ୍ରେସରେ ଅଧିକାଂଶ ସିନିୟର ନେତା ରହିଛନ୍ତି । ତେବେ କିଛି ରାଜ୍ୟରେ ଦଳୀୟ ସଂଗଠନରେ କ୍ଷମତା ପାଇବା ପାଇଁ ସିନିୟର ଓ ଜୁନିୟର ନେତାଙ୍କ ମଧ୍ୟରେ ରାଜନୀତିକ ଲଢେଇ ଲାଗି ରହୁଛି । ଯାହାର ପ୍ରଭାବ ତଳସ୍ତରର କର୍ମୀଙ୍କ ଉପରେ ପଡୁଛି । ଦଳ ଭିତରେ ଅନ୍ତଃକନ୍ଦଳ ଭୋଟ ଉପରେ ମଧ୍ୟ ପ୍ରଭାବ ପକାଉଛି । ଯେପରିକି ରାଜସ୍ଥାନରେ ଅଶୋକ ଗେହଲଟ ସିନିୟର ନେତା ହୋଇଥିବା ବେଳେ ଏଠାରେ ତାଙ୍କ କ୍ଷମତାକୁ ହ୍ରାସ କରିବା ପାଇଁ ସଚିନ ପାଇଲଟ ଲଗାତାର ଉଦ୍ୟମ କରି ଆସୁଛନ୍ତି । ଯାହା ଦଳକୁ କ୍ଷତି ପହାଞ୍ଚାଉଛି । ସେହିଭଳି ମଧ୍ୟପ୍ରଦେଶରେ ଦିଗବିଜୟ ସିଂହ ବନାମ ଜ୍ୟୋତିରାଦିତ୍ୟ ସିନ୍ଧିଆ, ଦିଲ୍ଲୀରେ ଶୀଲା ଦିକ୍ଷିତ ବନାମ ଅଜୟ ମାକେନଙ୍କ ଲଢେଇ ରାହୁଳଙ୍କ ଚିନ୍ତା ବଢାଇପାରେ । ତେଣୁ ଏଭଳି ସମୟରେ ସଭାପତି ଭାବେ ବରିଷ୍ଠ ଓ ଯୁବ ନେତାଙ୍କ ମଧ୍ୟରେ ସମନ୍ୱୟ ରକ୍ଷା କରିବା ରାହୁଲଙ୍କ ପାଇଁ ଏସିଡ ଟେଷ୍ଟ ସଦୃଶ ହେବାକୁ ଯାଉଛି ।
ବିଜେପି ରାହୁଲଙ୍କ ସିରିୟସନେସକୁ ନେଇ ଅନେକ ସମୟରେ ପ୍ରଶ୍ନ ଉଠାଇଛି । ସଂସଦରେ ରାହୁଳଙ୍କ ପିଲାଳିଆମି ଯୁକ୍ତିକୁ ବିଜେପି ସଡକ ପର୍ଯ୍ୟନ୍ତ ଆଣିଛି । ରାହୁଲଙ୍କୁ ଅପରିପକ୍ୱ ନେତାର ଟ୍ୟାଗ ଦେଇ ସାଧାରଣ ଲୋକଙ୍କ ନିକଟରେ ରାହୁଳଙ୍କ ଛବିକୁ ମଳିନ କରିବାର ସୁଯୋଗ ହାତଛଡା କରିନି ବିଜେପି । କିନ୍ତୁ ହିମାଚଳ ପ୍ରଦେଶ ଓ ଗୁଜରାଟ ନିର୍ବାଚନରେ ରାହୁଲ ଏକ ନୂଆ ରୂପରେ ସାମ୍ନାକୁ ଆସିଛନ୍ତି । ଗୋଟିଏ ସମୟରେ ରାହୁଳଙ୍କ କଥାକୁ ହସରେ ଉଡାଇଦେଉଥିବା ବିଜେପି ଏବେ ରାହୁଳଙ୍କ ଶାଣିତ ଯୁକ୍ତିରେ ଅସ୍ତବ୍ୟସ୍ତ ହେବାରେ ଲାଗିଲାଣି । ସଭାପତି ଭାବେ ଦାୟିତ୍ୱ ନେବା ପରେ ଅପରିପ୍ୱକ ନେତାର ଛବିରେ ପରିବତର୍ତ୍ତନ ଆଣି ବିଜେପିକୁ ଜବାବ ଦେବା ରାହୁଲଙ୍କ ପାଇଁ ଏକ ବଡ ଚ୍ୟାଲେଞ୍ଜ ।
ନିର୍ବାଚନ ଜିତିବା : ଉପାଧ୍ୟକ୍ଷରୁ ଅଧ୍ୟକ୍ଷ ଭାବେ ପଦୋନ୍ନତି ପାଇବା ପରେ ରାହୁଳଙ୍କ ପାଇଁ ବଡ ଚ୍ୟାଲେଞ୍ଜ ହେଉଛି ଆଗାମୀ ବିଧାନସଭା ନିର୍ବାଚନ । ୨୦୦୪ରେ ରାଜନୀତିରେ କ୍ୟାରିୟର ଆରମ୍ଭ କରିଥିବା ରାହୁଲଙ୍କୁ ୨୦୧୨ରେ ସବୁଠାରୁ ବଡ ଝଟକା ଲାଗିଥିଲା । ୨୦୧୨ ଉତ୍ତରପ୍ରଦେଶ ବିଧାନସଭା ନିର୍ବାଚନର ନେତୃତ୍ୱ ନେଇ ମାତ୍ର ୨୮ ଟି ସିଟରେ ଦଳକୁ ବିଜୟୀ କରିପାରିଥିଲେ । ଏହାପରେ ୨୦୧୩ ମସିହାରେ ତାଙ୍କୁ କଂଗ୍ରେସ ଦଳର ନମ୍ବର-୨ ନେତା ଭାବେ ମାନ୍ୟତା ମିଳିଥିଲା । ଉପାଧ୍ୟକ୍ଷ ପଦ ପାଇବା ପରେ ୨୦୧୪ ସାଧାରଣ ନିର୍ବାଚନର ପ୍ରଚାର ଅଭିଯାନର ନେତୃତ୍ୱ ନେଇଥିଲେ ଯୁବରାଜ ରାହୁଲ । କିନ୍ତୁ ୨୦୧୪ରେ ଫଳାଫଳ କଂଗ୍ରେସକୁ ଚିନ୍ତାରେ ପକାଇଦେଇଥିଲା । ରାହୁଲ ପ୍ରଚାର ପୂରାପୁରି ଭାବେ ଫ୍ଲପ ମାରିଥିଲା । ମାତ୍ର ୪୪ଟି ସିଟରେ ସୀମିତ ରହିଥିଲା କଂଗ୍ରେସର ଗାଡି । ଏହାପରେ ଉତ୍ତରପ୍ରଦେଶରେ ଅମାନତ ହରାଇଥିଲା ଦଳ । ମେଣ୍ଟ କରି ଲଢିବା ସତ୍ତେ୍ୱ ମଧ୍ୟ ମୋଦି ଲହରକୁ ଅଟକାଇବାରେ ସକ୍ଷମ ହୋଇନଥିଲେ । ତେବେ ହିମାଚଳ ପ୍ରଦେଶ ଓ ଗୁଜରାଟ ନିର୍ବାଚନର ଫଳାଫଳ ଉପରେ ଏବେ ସମସ୍ତଙ୍କ ନଜର । କାରଣ ପ୍ରଥମଥର ପାଇଁ ଗୁଜରାଟରେ ବିଜେପି –କଂଗ୍ରେସ ଲଢେଇ ଦେଖିବାକୁ ମିଳିବ ବୋଲି ଚର୍ଚ୍ଚା ହେଉଛି । ଯାହା ରାହୁଲଙ୍କ ନେତୃତ୍ୱ ଏକ ନୂଆ ଦିଶା ଦେବ । ଏହାଛଡା ଆଗାମୀ ବର୍ଷ ୮ଟି ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନ ରାହୁଲଙ୍କ ପାଇଁ ଏସିଡ ଟେଷ୍ଟ ସଦୃଶ ହେବାକୁ ଯାଉଛି ।