ରଥଯାତ୍ରାରେ ବିଭ୍ରାଟ ହେଲେ ଦାୟୀ ରହିବେ ଅଧିକାରୀ : ଖିଲାପକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଜିଲ୍ଲପାଳଙ୍କ ଚେତାବନୀ
କନକ ବ୍ୟୁରୋ: ରଥଯାତ୍ରାରେ ବିଭ୍ରାଟ ହେଲେ ଦାୟୀ ରହିବେ ଅଧିକାରୀ । ଏମିତି ଚେତାବନୀ ଦେଇଛନ୍ତି ପୁରୀ ଜିଲ୍ଲାପାଳ । ରଥଯାତ୍ରାରେ ଯଦି କୌଣସି ପ୍ରକାର ବିଭ୍ରାଟ ହୁଏ ତେବେ ଏଥିପାଇଁ ଅଧିକାରୀମାନେ ହିଁ ଦାୟୀ ରହିବେ ବୋଲି ତାଗିଦ୍ କରିଛନ୍ତି ଜିଲ୍ଲାପାଳ ଅରବିନ୍ଦ ଅଗ୍ରୱାଲ । ରଥଯାତ୍ରା ପ୍ରସ୍ତୁତି ଆଲୋଚନା ବେଳେ ଏ ସଂପର୍କରେ ସେ ବିଭିନ୍ନ ଦାୟିତ୍ୱରେ ଥିବା ଅଧିକାରୀମାନଙ୍କୁ ଏ ସଂପର୍କରେ ଚେତାଇ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହା ସହ ରଥଯାତ୍ରା ପାଇଁ ଅଧିକାରୀ ମାନଙ୍କୁ ସମ୍ପୂର୍ଣ ଭାବେ ପ୍ରସ୍ତୁତ ରହିବା ସହ କୌଣସି ପ୍ରକାର ତ୍ରୁଟି କିମ୍ବା ବିଶୃଙ୍ଖଳା ଯେପରି ନହୁଏ, ଏ ନେଇ ତାଗିଦ୍ କରିଛନ୍ତି ଜିଲ୍ଲାପାଳ । ଖିଲାପକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ମଧ୍ୟ ସେ ସଂପୃକ୍ତ ଅଧିକାରୀମାନଙ୍କୁ ଚେତାବନୀ ଦେଇଛନ୍ତି । ଏହା ସହ ଟୋପାଏ ବର୍ଷା ହେଲେ ବଡଦାଣ୍ଡ ଉବୁଟୁବୁ ହେଉଥିବାରୁ ପ୍ରସ୍ତୁତି ଆଲୋଚନା ବେଳେ ରଥଯାତ୍ରା ପୂର୍ବରୁ ନାଳସଫା ଉପରେ ମଧ୍ୟ ଗୁରୁତ୍ୱ ଦିଆ ଯାଇଛି ।
ଅନ୍ୟପଟେ, ଆଜି ଲାଗି ହେବ ଫୁଲୁରି ତେଲ । ଜ୍ୱରରେ ପୀଡିତ ଥିବା ମହାପ୍ରଭୂଙ୍କୁ ଆଜି ପଂଚମୀ ତିଥିରେ ଫୁଲୁରି ତେଲ ଲାଗି ହେବ । ବଡଓଡିଆ ମଠ ଏହି ତେଲକୁ ପ୍ରସ୍ତୁତ କରିଥିବା ବେଳେ ଆଜି ଏକ ଭବ୍ୟ ଶୋଭାଯାତ୍ରାରେ ଏହାକୁ ଶ୍ରୀମନ୍ଦିରକୁ ନିଆଯିବ । ବୈଦ୍ୟଙ୍କ ପରାମର୍ଶ କ୍ରମେ ଅଣସର ପିଣ୍ଡିରେ ଶ୍ରୀଜିଉଙ୍କୁ ଏହି ଫୁଲୁରି ତେଲ ଚିକିତ୍ସା ସେବା ଯୋଗାଇ ଦିଆଯିବ । ଶାଳ ପର୍ଣ୍ଣି, ଗମ୍ଭାରୀ, ଲବାଙ୍ଗ କୁଳି, ଫଣଫଣା, କୃଷ୍ଣ ପର୍ଣ୍ଣି, ବେଲ, ଖଣି ବଥୁ, ପଟଳି, ଖୁଆ, ଅଙ୍କରାନ୍ତି, ଗୋଖରା, ଲମ୍ବାଗୋତି, ଦେଶୀ ଘିଅ, ମହୁ, ନବାତ, ଖୁଆସର ଇତ୍ୟାଦିକୁ ମିଶାଇ ଫୁଲୁରି ତେଲର ଏହି ମହୌଷଧି ପ୍ରସ୍ତୁତ କରାଯାଇଛି । ଏହି ମହୌଷଧି ଲାଗି ହେବା ପରେ ମହାପ୍ରଭୁ ସୁସ୍ଥ ହେବା ସହ ନବଯୌବନ ପ୍ରାପ୍ତି ହେବେ ।