କନକ ବ୍ୟୁରୋ : ରାଜରାସ୍ତାରେ ଜଳୁଛି ପ୍ରତିବାଦର ନିଆଁ । ଅନ୍ୟାୟ ସହ ଲଢ଼ି ଲଢ଼ି ଶେଷରେ ଜୀବନ ଯୁଦ୍ଧରେ ହାରି ଯାଇଥିବା କୁନ୍ଦୁଲି ପୀଡ଼ିତାଙ୍କୁ ନ୍ୟାୟ ଦେବା ପାଇଁ ବାହାରି ଆସିଛନ୍ତି ବିଜେପି ଓ କଂଗ୍ରେସ । ମାଁକୁ ସମ୍ମାନର ନାରା ଦେଉଥିବା ଶାସକ ବିଜେଡିର ବିଫଳତାକୁ ଲୋକଙ୍କ ପାଖରେ ପହଂଚିବା ପାଇଁ ଓଡ଼ିଶା ବନ୍ଦର ବାଟକୁ ବାଛି ନେଇଛନ୍ତି ବିରୋଧୀ । ଆଉ ଏହି ମାଧ୍ୟମ ଭିତରେ କେଉଁଠି ଭଙ୍ଗାରୁଜା ହୋଇଛି, ତ ଆଉ କେଉଁଠି ଧସ୍ତାଧସ୍ତି ଓ ମୁହାଁମୁହିଁ ।
Kanak News is now on WhatsApp
Join and get latest news updates delivered to you via WhatsApp
ସରକାର ବିରୋଧୀ ନାରାବାଜି ଭିତରେ ଭୁବନେଶ୍ୱରରେ ବିଜେପି ମୁଖ୍ୟମନ୍ତ୍ରୀଙ୍କ ବାଟ ଓଗାଳିବାକୁ ଚେଷ୍ଟା କରିଛି ତ, ଜଗତସିଂହପୁରରେ ସରକାରୀ କାର୍ଯ୍ୟାଳୟରେ ବ୍ୟାପକ ଭଙ୍ଗାରୁଜା କରିଛି । ପୁରୀ ଓ ପିପିଲିରେ ପୁଣି ଦେଖିବାକୁ ମିଳିଛି ରାଜନୈକିତ ଦଳ ଭିତରେ ଖଣ୍ଡ ଯୁଦ୍ଧ । ବଡ ଦାଣ୍ଡରେ ବିଜେଡି-ବିଜେପି ମୁହାଁମୁହିଁ ହୋଇଥିବା ବେଳେ ପିପିଲିରେ କଂଗ୍ରେସ ସହ ଭିଡିଛି ଭାରତୀୟ ଜନତା ପାର୍ଟି ।
ଆଦର୍ଶର ମୁଖ୍ୟମନ୍ତ୍ରୀର ପୁରସ୍କାର ନେଇ ସଫଳତାର ବାର୍ତା ବଖାଣୁଥିବା ମୁଖ୍ୟମନ୍ତ୍ରୀଙ୍କ ଆଗରେ କୁନ୍ଦୁଲିର କାହାଣୀର ରଖି ବିରୋଧୀ ବିଜେପି ଓ କଂଗ୍ରେସ, ଶାସକ ଦଳକୁ କାଠଗଡ଼ାକୁ ଟାଣିବାକୁ ଚେଷ୍ଟା କରିଛନ୍ତି । ବିଜେଡି କିନ୍ତୁ ଏହାକୁ ଶବ ଉପରେ ରାଜନୀତି କରାଯାଉଛି ବୋଲି କହିଛି ।ଶାସକ ବିଜେଡି, ଘଟଣାକୁ ନେଇ ରାଜନୀତି ହେଉଥିବା ଅଭିଯୋଗ କରୁଥିବା ବେଳେ ପୀଡ଼ିତାଙ୍କ ଆତ୍ମହତ୍ୟା ପାଇଁ ଶାସକ ଦଳକୁ ଦାୟୀ କରିିଛି ଉଭୟ କଂଗ୍ରେସ ଓ ବିଜେପି । ଆଉ ଏହାରି ଭିତରେ ସ୍କୁଲ-କଲେଜ, ଦୋକାନ ବଜାର ବନ୍ଦ ରହିଥିବା ବେଳେ ଠପ୍ ହୋଇଯାଇଛି ଓଡ଼ିଶା ।