ତାମିଲନାଡୁରେ ହିନ୍ଦୀ ଭାଷାକୁ ଜୋରଦାର ବିରୋଧ! ସରକାରୀ କାର୍ଯ୍ୟାଳୟରେ ହିନ୍ଦୀ ଭାଷା ଲେଖାଥିବା ବୋର୍ଡରେ କଳା ରଙ୍ଗ ବୋଳିଲେ ଦୃବୁର୍ତ୍ତ ।
ତାମିଲନାଡୁରେ ହିନ୍ଦୀ ଭାଷାକୁ ବିରୋଧ ଜାରି ରହିଛି । ତାମିଲନାଡୁର ତ୍ରିଚି ଜିଲ୍ଲାରେ କିଛି ଅସାମାଜିକ ବ୍ୟକ୍ତି ସରକାରୀ ବାସଭବନ, ପୋଷ୍ଟ ଅଫିସ, ବିଏସଏନଏଲ ଓ ବିଭିନ୍ନ ସରକାରୀ କାର୍ଯ୍ୟାଳୟରେ ହିନ୍ଦୀ ଭାଷାରେ ଲଗାଯାଇଥିବା ବୋର୍ଡରେ କଳା ରଙ୍ଗ ବୋଳି ଦେଇଛନ୍ତି । ବୋର୍ଡରେ ହିନ୍ଦୀ,ଇଂରାଜୀ ଓ ତାମିଲ ଭାଷାରେ କାର୍ଯ୍ୟାଳୟର ନାଁ ଓ ଠିକଣା ଲେଖାଯାଇଥିବା ବେଳେ କେବଳ ହିନ୍ଦୀ ଭାଷା ଉପରେ କଳା ରଙ୍ଗ ବୋଳିଥିଲେ ଦୃବୁର୍ତ୍ତ ।
Kanak News is now on WhatsApp
Join and get latest news updates delivered to you via WhatsApp
କେବଳ ସରକାରୀ କାର୍ଯ୍ୟାଳୟ ନୁହେଁ ବରଂ ତିରଚୁରପଲ୍ଲୀ ଏୟାରପୋର୍ଟରେ ଲାଗିଥିବା ବୋର୍ଡ ଉପରେ ମଧ୍ୟ କେହି କଳା ରଙ୍ଗ ବୋଳିଥିବା ଦେଖିବାକୁ ମିଳିଛି । ତେବେ କିଏ ଏହି ବୋର୍ଡରେ ରଙ୍ଗ ବୋଳିଛି ତାହାର ଖୋଳତାଡ ଏବେ ଆରମ୍ଭ ହୋଇଛି । ଏହାପୂର୍ବରୁ ରାସ୍ତା କଡରେ କିଲୋମିଟର ଦର୍ଶାଉଥିବା ବୋର୍ଡ ଉପରେ ମଧ୍ୟ କାଳି ବୋଳାଯାଇଥିଲା ।
ଗତ କିଛିଦିନ ହେବ ତାମିଲନାଡୁରେ ହିନ୍ଦୀ ଭାଷାକୁ ଜୋରଦାର ବିରୋଧ କରାଯାଉଛି । କେନ୍ଦ୍ର ମାନବ ସମ୍ବଳ ବିକାଶ ମନ୍ତ୍ରାଳୟ ପକ୍ଷରୁ ଗଠିତ କମିଟି ଦେଶରେ ତିନି ଭାଷାର ଫର୍ମୁଲା ଲାଗୁ କରିବାକୁ ସୁପାରିଶ କରାଯାଇଥିଲା । ଏହାଦ୍ୱାରା ତାମିଲନାଡରେ ଇଂରାଜୀ, ସ୍ଥାନୀୟ ଭାଷା ସମେତ ହିନ୍ଦୀ ଭାଷାରେ ପାଠ ପଢିବାକୁ ସୁପାରିଶ କରାଯାଇଥିଲା ।
କେନ୍ଦ୍ର ସରକାରଙ୍କ ଏହି ନୂଆ ନୀତିକୁ ତାମିଲନାଡୁରେ ଡିଏମକେ ସମେତ ଅନ୍ୟ ଦଳ ମଧ୍ୟ ବିରୋଧ କରିଥିଲେ । ଏପରିକି ତାମିଲନାଡୁ ଲୋକଙ୍କ ପାଇଁ ହିନ୍ଦୀ ଭାଷା ବାଧ୍ୟତାମୂଳକ କରାଗଲେ ପରିସ୍ଥିତି ସାଂଘାତିକ ହେବ ବୋଲି ଡିଏମକେ ଧମକ ଦେଇଥିଲା । ଆଉ ଏହାପରେ କେନ୍ଦ୍ର ମାନବ ସମ୍ବଳ ମନ୍ତ୍ରୀଙ୍କୁ ସଫେଇ ଦେବାକୁ ମଧ୍ୟ ପଡିଥିଲା ।