ସ୍ୱଦେଶୀ ଅସ୍ତ୍ରର ଶକ୍ତି ଦେଖିବେ ପ୍ରଧାନମନ୍ତ୍ରୀ । ରାଜସ୍ଥାନ ପୋଖରାନ୍ ଗସ୍ତ କରିବେ ମୋଦୀ ।
କନକ ବ୍ୟୁରୋ: ସ୍ୱଦେଶୀ ଅସ୍ତ୍ର ଶକ୍ତି ଦେଖିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଆଜି ରାଜସ୍ଥାନର ପୋଖରାନକୁ ପ୍ରଧାନମନ୍ତ୍ରୀ ମୋଦୀଙ୍କ ଗସ୍ତ କାର୍ଯ୍ୟକ୍ରମ ରହିଛି । ଏଠାରେ “ଭାରତ ଶକ୍ତି’ ସାମରିକ ଅଭ୍ୟାସର ତଦାରଖ କରିବେ ପ୍ରଧାନମନ୍ତ୍ରୀ । ଭାରତ ଶକ୍ତି ସାମରିକ ଅଭ୍ୟାସରେ ସ୍ୱଦେଶୀ କୌଶଳରେ ତିଆରି ହୋଇଥିବା ଯୁଦ୍ଧାସ୍ତ୍ର ଗୁଡ଼ିକର ପ୍ରଦର୍ଶନ କରାଯିବ । ସ୍ୱଦେଶୀ ଅସ୍ତ୍ର କେତେ ସକ୍ଷମ ଓ କେତେ ଭରସାଯୋଗ୍ୟ, ଏନେଇ ଏଠାରେ ପରୀକ୍ଷଣ କରାଯାଉଛି । ପ୍ରଧାନମନ୍ତ୍ରୀଙ୍କ ସହ ୪୦ଟି ଦେଶର ପ୍ରତିନିଧି ବି ସାମିଲ ହେବେ ।
Kanak News is now on WhatsApp
Join and get latest news updates delivered to you via WhatsApp
ପ୍ରତିରକ୍ଷାମନ୍ତ୍ରୀ ରାଜନାଥ ସିଂ, ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ, ସିଡିଏସ୍ ଅନୀଲ ଚୌହ୍ୱାନ, ତିନି ସେନାର ମୁଖ୍ୟ ଏହି ସାମରିକ ଅଭ୍ୟାସ ବେଳେ ଉପସ୍ଥିତ ରହିବେ । ଭାରତ ଶକ୍ତି ସମରାଭ୍ୟାସରେ ବିଭିନ୍ନ ପ୍ରକାର କ୍ଷେପଣାସ୍ତ୍ର, ଡ୍ରୋନ୍, ଟ୍ୟାଙ୍କ, ହେଲିକପ୍ଟର ନିଜର ଶକ୍ତି ପ୍ରଦର୍ଶନ କରିବେ । ତିନି ସେନା ପକ୍ଷରୁ ମିଳିତ ଭାବେ ଏହି ଅଭ୍ୟାସ କରାଯାଉଛି । ପୂର୍ବରୁ ବିଦେଶରୁ ସାମରିକ ଅସ୍ତ୍ରଅସ୍ତ୍ର ଆମଦାନୀ କରାଯାଉଥିବା ବେଳେ ଏବେ ଏହାକୁ ନିଜ ଦେଶରେ ପ୍ରସ୍ତୁତ କରାଯିବାକୁ ଜୋରଦାର ଚେଷ୍ଟା କରାଯାଉଛି । ଆଉ ଯେଉଁ ସବୁ ଅସ୍ତ୍ରଶସ୍ତ୍ର ଭାରତୀୟ କୌଶଳରେ ପ୍ରସ୍ତୁତ ହୋଇଛି ଓ ସଫଳତା ପାଇଛି, ସେସବୁର ଆଜି ପ୍ରଦର୍ଶନ କରାଯିବ ।