କାଶ୍ମୀରରୁ ଧାରା ୩୭୦ ଉଚ୍ଛେଦ ପରେ ବାଉଳା ପାକିସ୍ତାନ : ଭାରତ ସହ ସମ୍ପର୍କ ଛିନ୍ନ ପରେ ୩ଟି ଏୟାରସ୍ପେଶ୍ ବନ୍ଦ କଲା ଇସଲାମାବାଦ୍
କନକ ବ୍ୟୁରୋ : କାଶ୍ମୀରରେ ଧାରା ୩୭୦ ଉଚ୍ଛେଦ ପରେ ବିଚଳିତ ପାକିସ୍ତାନ । ଭାରତ ସହ ଦ୍ୱିପାକ୍ଷିକ ବାଣିଜ୍ୟିକ ସଂପର୍କ ଛିନ୍ନ କରିବା ପରେ ଆକାଶପଥ ବି ବନ୍ଦ କରିଛି ପାକିସ୍ତାନ । ଭାରତ ପାକିସ୍ତାନ ମଧ୍ୟରେ ରହିଥିବା ୯ ଟି ଆକାଶ ପଥ ମଧ୍ୟରୁ ୩ଟି ବନ୍ଦ କରିଦେଇଛି ପାକିସ୍ତାନ । ପାକିସ୍ତାନ ବିଦେଶୀ ବିମାନ ଗୁଡ଼ିକର ଉଡାଣର ଉଚ୍ଚତା ବଢ଼ାଇ ଦେଇଛି । ଏଥି ସହିତ ବିମାନ ପଥ ଗୁଡ଼ିକ ମଧ୍ୟ ପରିବର୍ତ୍ତନ କରିଛି ।
Kanak News is now on WhatsApp
Join and get latest news updates delivered to you via WhatsApp
ବୁଧବାର ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଅଧ୍ୟକ୍ଷତାରେ ଜାତୀୟ ସୁରକ୍ଷା ପରିଷଦର ବୈଠକ ପରେ ପାକ୍ ନେଇଥିବା ଭାରତ ସହିତ ବାଣିଜ୍ୟିକ ସଂପର୍କ ଛିନ୍ନ ନିଷ୍ପତି । ଏହି ଘୋଷଣା ପରେ ଭାରତ ସହ ଥିବା କୂଟନୀତିକ ସମ୍ପର୍କର ସ୍ତରକୁ କମାଇଛି ପାକିସ୍ତାନ । ଫଳରେ ଇସଲାମାବାଦରେ ଥିବା ଭାରତୀୟ ହାଇକମିଶନର ଭାରତ ଫେରିଆସିବେ । ଅନ୍ୟପଟେ ଦିଲ୍ଲୀକୁ ଆସିବାକୁ ଥିବା ପାକିସ୍ତାନର ନୂଆ ହାଇକମିଶନର ବର୍ତମାନ ପାଇଁ ଆସିବେ ନାହିଁ । ଫଳରେ ଦୁଇଦେଶ ମଧ୍ୟରେ କୂଟନୈତିକ ସଂପର୍କ ଏକ ପ୍ରକାର ସ୍ଥାଣୁ ହୋଇଯିବ ।
ଇମ୍ରାନ କହିଛନ୍ତି, ମିଳିତ ଜାତିସଂଘରେ ଭାରତର ଧାରା ୩୭୦ ଉଚ୍ଛେଦ ନିଷ୍ପତିକୁ ଚ୍ୟାଲେଂଜ କରିବ ପାକିସ୍ତାନ । ଆସନ୍ତା ୧୪ ତାରିଖରେ କାଶ୍ମୀରରେ କିପରି ସ୍ୱାଧୀନତା ଦିବସ ପାଳନ ହେବ ସେ ଦିଗରେ ମଧ୍ୟ ଆବଶ୍ୟକ ପଦକ୍ଷେପ ନିଆଯାଉଛି ବୋଲି କହିଛନ୍ତି ଇମ୍ରାନ । ଅନ୍ୟପଟେ ଭାରତର ସ୍ୱାଧୀନତା ଦିବସ ଅଗଷ୍ଟ ୧୫ କୁ କଳାଦିବସ ଭାବେ ପାକିସ୍ତାନ ପାଳନ କରିବ ବୋଲି ନିଷ୍ପତି ନେଇଥିବା ସୂଚନା ମିଳିଛି । ତେବେ ପାକିସ୍ତାନର ଏଭଳି ନିଷ୍ପତିର ଭାରତ ଉପରେ କୌଣସି ପ୍ରଭାବ ପଡିବ ନାହିଁ, ବରଂ ପାକିସ୍ତାନର ବ୍ୟାପକ କ୍ଷତି ହେବ ବୋଲି ବିଶେଷଜ୍ଞ ପ୍ରତିକ୍ରିୟା ରଖିଛନ୍ତି ।
ସେପଟେ ଧାରା ୩୭୦ ଉଚ୍ଛେଦ ପରେ କାଶ୍ମୀରରେ ନୀରବତାର ବାତାବରଣ । ଏବେ ବି ୧୪୪ଧାରା ଜାରି ରହିଛି । ଲୋକେ ଏକାଠି ହେବା ସମ୍ଭବ ହେଉନଥିବା ବେଳେ ଚାରିଆଡେ ସୁରକ୍ଷାକର୍ମୀ ପହରା ଦେଉଛନ୍ତି । ଜାମ୍ମୁ-କାଶ୍ମୀରରେ ରହୁଥିବା ବାହାର ରାଜ୍ୟର ଲୋକେ ଶ୍ରୀନଗର ଓ ଜାମ୍ମୁ ଛାଡୁଛନ୍ତି । ବସଷ୍ଟାଣ୍ଡ ଓ ରେଳଷ୍ଟେସନରେ ଭିଡ ଦେଖିବାକୁ ମିଳିଛି । ଶ୍ରୀନଗର ଓ ଜାମ୍ମୁ ରେ ରହୁଥିବା ବାହାର ରାଜ୍ୟର ଲୋକେ ଅସୁବିଧାରେ ଅଛନ୍ତି । ଯେକୌଣସି ପ୍ରକାରେ ସେମାନେ ନିଜ ରାଜ୍ୟକୁ ଫେରିବାକୁ ଚାହିୁଁଛନ୍ତି । ଏଥିପାଇଁ ପ୍ରଶାସନ ସେମାନଙ୍କୁ ସହାୟତା କରୁନଥିବା ଅଭିଯୋଗ ହୋଇଛି । ବସଷ୍ଟାଣ୍ଡ ଓ ରେଳଷ୍ଟେସନରେ ଭିଡ ଯୋଗୁଁ ଟିକେଟ ମିଳୁନାହିଁ । ଆଉ ଯେଉଁଠି ଟିକେଟ ମିଳୁଛି ଦର ଆକାଶଛୁଆଁ ହୋଇଛି ।