କନକ ବ୍ୟୁରୋ : ଭାରତ ତରଫରୁ କାନାଡା ନାଗରିକଙ୍କ ପାଇଁ ପୁଣିଥରେ ଭିସା ସେବା ଆରମ୍ଭ କରାଯାଇଛି । ସେପ୍ଟେମ୍ବର ୨୧ ତାରିଖରୁ ଭିସା ପ୍ରଦାନ କରୁଥିବା ଏଜେନ୍ସି ତରଫରୁ କିଛି କାରଣ ପାଇଁ ଏହି ସୁବିଧା ବନ୍ଦ କରିଥିଲା । ବିଏଲଏସ ଇଣ୍ଟରନ୍ୟାସନାଲ ତରଫରୁ ଜାରି କରାଯାଇଥିବା ଆଦେଶରେ କୁହାଯାଇଥିଲା କି, କିଛି କାରଣ ପାଇଁ ଆଗାମୀ ସୂଚନା ପର୍ଯ୍ୟନ୍ତ କାନାଡା ନାଗରିକଙ୍କ ପାଇଁ ଭାରତୀୟ ଭିସା ସୁବିଧା ବନ୍ଦ କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ହେଲେ ଅକ୍ଟୋବର ୨୬ ତାରିଖରେ ଭାରତ ସରକାର କିଛି ସ୍ୱତନ୍ତ୍ର ଶ୍ରେଣୀର ଭିସା ସେବା ଆରମ୍ଭ କରିବା କଥା କହିଥିଲେ । ଏଥିରେ ପ୍ରବେଶ ଭିସା, ବ୍ୟବସାୟ ଭିସା, ମେଡିକାଲ ଭିସା ଓ କନଫରେନ୍ସ ଭିସା ସାମିଲ ଥିଲା । ହେଲେ ଏବେ କାନାଡା ନାଗରିକଙ୍କ ପାଇଁ ସବୁ ପ୍ରକାର ଇ-ଭିସା ଆବେଦନ ଉପରେ ସରକାର ସହମତି ପ୍ରଦାନ କରିଛନ୍ତି ।
ଖଲିସ୍ତାନୀ ଆତଙ୍କବାଦୀ ହରଦୀପସିଂ ନିଜ୍ଜରର ହତ୍ୟା ମାମଲାରେ କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋଙ୍କ ବୟାନ ପରେ ଉଭୟ ଦେଶ ମଧ୍ୟରେ ଥିବା ସଂପର୍କରେ ତିକ୍ତତା ଆସିଥିଲା । ଏବେ ଏହି ସଂପର୍କରେ କିଛିଟା ସୂଧାର ଆସିନାହିଁ । ପ୍ରଥମେ କାନାଡା ତରଫରୁ ଭାରତ ଆସୁଥିବା ଯାତ୍ରୀଙ୍କ ପାଇଁ ଟ୍ରେବଲ ଆଡଭାଇଜରୀ ଜାରି କରାଯାଇଥିଲା । ଏହାପରେ ଭାରତ ତରଫରୁ ଖଲିସ୍ତାନ ସମର୍ଥକଙ୍କ ତରଫରୁ ବିପଦକୁ ନଜରରେ ରଖି ଭାରତୀୟ ନାଗରିକଙ୍କ ପାଇଁ ମଧ୍ୟ ଆଡଭାଇଜରୀ ଜାରି କରାଯାଇଥିଲା ।