କନକ ବ୍ୟୁରୋ : ରାଷ୍ଟ୍ରୀୟ ଶିକ୍ଷା ଅନୁସନ୍ଧାନ ଓ ପ୍ରଶିକ୍ଷଣ ପରିଷଦ ପ୍ୟାନେଲ ତରଫରୁ ସମସ୍ତ ଏନସିଇଆରଟି ପାଠ୍ୟ ପୁସ୍ତକରେ ଇଣ୍ଡିଆ ସ୍ଥାନରେ ଭାରତ ଲେଖାଯିବା ପ୍ରସ୍ତାବକୁ ମଞ୍ଜୁରୀ ପ୍ରଦାନ କରିଛନ୍ତି । ଏହି ନିଷ୍ପତ୍ତି କମିଟିର ସମସ୍ତ ସଦସ୍ୟଙ୍କ ସହମତି କ୍ରମେ ନିଆଯାଇଛି । ଏନସିଇଆରଟି ପୁସ୍ତକର ଆଗାମୀ ସେଟରେ ଏହି ପରିବର୍ତ୍ତନ ନଜରକୁ ଆସିବ । ସୂଚନା ଥାଉ କି, ଏହି ପ୍ରସ୍ତାବ କିଛିମାସ ପୂର୍ବରୁ ଦିଆଯାଇଥିଲା । ଏବେ ଏହା ଔପଚାରିକ ସମର୍ଥନ ଲାଭ କରିଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଏନସିଇଆରଟିର ତରଫରୁ ଏହି ନିଷ୍ପତ୍ତି ସେତେବେଳେ ନିଆଯାଇଛି, ଯେତେବେଳେ ରାଜନୀତି ମହଲରେ ଇଣ୍ଡିଆ ବନାମ ଭାରତ ପ୍ରସଙ୍ଗ ସରଗରମ ରହିଛି । ଏହି ବିବାଦ ସେତେବେଳେ ମୁଣ୍ଡ ଟେକିଥିଲା ଯେତେବେଳେ ଜି-୨୦ ସମ୍ମିଳନୀ ପାଇଁ ରାଷ୍ଟ୍ରପତି ଯେଉଁ ଭୋଜିର ଆୟୋଜନ କରିଥିଲେ ସେହି ଭୋଜି ପାଇଁ ନିମନ୍ତ୍ରଣ ପତ୍ରରେ ପ୍ରେସିଡେଣ୍ଟ ଅଫ୍ ଇଣ୍ଡିଆ ବଦଳରେ ପ୍ରେସିଡେଣ୍ଟ ଅଫ୍ ଭାରତ ବୋଲି ଲେଖାଯାଇଥିବାର ଦେଖିବାକୁ ମିଳିଥିଲା । ଏହା ପରେ ବିରୋଧୀମାନେ ଏହି ପ୍ରସଙ୍ଗକୁ ନେଇ ବୟାନବାଜୀ କରିଥିଲେ । ହେଲେ ତା ପରେ ମଧ୍ୟ ଅନେକ ସାର୍ବଜନୀନ ମଞ୍ଚରେ ଇଣ୍ଡିଆ ପରିବର୍ତ୍ତେ ଭାରତ ବୋଲି ଲେଖାଯାଇଥିବାର ଦେଖିବାକୁ ମିଳିଥିଲା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅନେକ କାର୍ଯ୍ୟକ୍ରମରେ ତାଙ୍କ ନେମ୍ ପ୍ଲେଟ ଉପରେ ପ୍ରାଇମ ମିନିଷ୍ଟର ଅଫ୍ ଭାରତ ବୋଲି ଲେଖାଯାଇଥିବାର ଦେଖିବାକୁ ମିଳିଛି ।