ଓଠକୁ ଚୁମ୍ବନ କରିବା ଅପ୍ରାକୃତିକ ଅପରାଧ ନୁହେଁ । ଯୌନ ଉତ୍ପୀଡନ ମାମଲାରେ ଅଭିଯୁକ୍ତକୁ ଜାମିନ୍ ଦେଲେ ବମ୍ବେ ହାଇକୋର୍ଟ ।
କନକ ବ୍ୟୁରୋ: ଓଠକୁ ଚୁମ୍ବନ କରିବା ଏବଂ ଶରୀର କୌଣସି ଅଙ୍ଗକୁ ଛୁଇଁବା ଭାରତୀୟ ଦଣ୍ଡ ସଂହିତା (ଆଇପିସି) ଅନୁସାରେ ଅପରାଧ ନୁହେଁ । ଆଇପିସି ଧାରା ୩୭୭ ଅନୁସାରେ ଏହାକୁ ଅପ୍ରାକୃତିକ ଅପରାଧ ଶ୍ରେଣୀ ଭୁକ୍ତ କରିହେବ ନାହିଁ । ଏକ ଯୌନ ଉତ୍ପୀଡନ ମାମଲାର ବିଚାର କରି ଏଭଳି କହିଛନ୍ତି ବମ୍ବେ ହାଇକୋର୍ଟ । ଖାଲି ସେତିକି ନୁହେଁ, ଜଷ୍ଟିସ ଅନୁଜା ପ୍ରଭୁଦେଶାଇ ଏହି ମାମଲାରେ ଅଭିଯୁକ୍ତଙ୍କୁ ଜାମିନ୍ ମଧ୍ୟ ପ୍ରଦାନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ଜଣେ ନାବାଳକର ପିତା ତାଙ୍କ ପୁଅ ପ୍ରତି ଯୌନ ଉତ୍ପୀଡନ ହୋଇଥିବା ନେଇ ପ୍ରଥମେ ପୋଲିସ ପାଖରେ ଅଭିଯୋଗ କରିଥିଲେ । ତାଙ୍କ ଅଭିଯୋଗ ଅନୁସାରେ, ତାଙ୍କ ପୁଅ ମୁମ୍ବାଇର ଏକ ଅନଲାଇନ୍ ଗେମ୍ ଦୋକାନରେ ରିଚାର୍ଜ କରିବାକୁ ଯାଇଥିଲା । ଏହି ସମୟରେ ଦୋକାନୀ ଜଣକ ତାଙ୍କ ଓଠକୁ ଚୁମ୍ବନ କରିବା ସହିତ ତାଙ୍କ ଯୌନାଙ୍ଗକୁ ଛୁଇଁଥିଲେ । ଏହାପରେ ପୀଡିତଙ୍କ ବାପା ଏନେଇ ଅଭିଯୋଗ କରିବା ସହିତ ପୋକ୍ସୋ ଅଧିନିୟମ ଅନୁସାରେ ମାମଲା ଦାୟର କରିଥିଲେ । ହେଲେ ବମ୍ବେ ହାଇକୋର୍ଟ ଏହି ବିଷୟରେ ବିଚାର କରି ଏହାକୁ ଅପ୍ରାକୃତିକ ଅପରାଧ ନୁହେଁ ବୋଲି କହିବା ସହିତ ଅଭିଯୁକ୍ତକୁ ଜାମିନ୍ ପ୍ରଦାନ କରିଛନ୍ତି ।
ଆଇପିସି ଧାରା ୩୭୭ ଅନୁସାରେ ଦୋଷୀଙ୍କୁ ଏଭଳି ମାମଲାରେ ଆଜୀବନ ଜେଲ ଦଣ୍ଡାଦେଶ ସହ ଜାମିନ୍ ପ୍ରଦାନ କରିବା କଷ୍ଟକର ହୋଇତାଏ । ହେଲେ ଜଷ୍ଟିସ୍ ପ୍ରଭୁଦେଶାଇ କହିଛନ୍ତି, ସମ୍ପୃକ୍ତ ଯୁବକଙ୍କର ମେଡିକାଲ ପରୀକ୍ଷାରେ ଯୌନ ଉତ୍ପୀଡନ ହୋଇଥିବା ନେଇ କୌଣସି ପୃଷ୍ଟି ନାହିଁ ବୋଲି କହିଛନ୍ତି । ତା ସହିତ ଏଭଳି କେସରେ ଅଭିଯୁକ୍ତଙ୍କୁ ଜାମିନ୍ ପ୍ରଦାନ କରାଯାଇପାରିବ ବୋଲି କହିଛନ୍ତି ।
ଅନ୍ୟପଟେ ହାଇକୋର୍ଟ ଆହୁରି ମଧ୍ୟ କହିଛନ୍ତି ଯେ, ଅଭିଯୁକ୍ତ ଗତ ଏକ ବର୍ଷ ହେଲା ଜେଲରେ ବନ୍ଦ ଅଛି । ଏହି ମାମଲାର ଶୁଣାଣି ଜଲଦି ମଧ୍ୟ ଆରମ୍ଭ ହେବାର ସମ୍ଭାବନା ନାହିଁ । ତେଣୁ ଅଭିଯୁକ୍ତକୁ ୩୦ ହଜାର ଟଙ୍କା ବଦଳରେ ଜାମିନ୍ ପ୍ରଦାନ କରାଯାଇଥିବା ନେଇ ସେ କହିଛନ୍ତି ।