କନକ ବ୍ୟୁରୋ: ଚୀନରେ କରୋନା ବିସ୍ଫୋରଣର ଖବର ପରେ ଭାରତୀୟଙ୍କ ମନରେ ପୁଣି ମହାମାରୀ ଭୟ ଫେରିଛି । କିନ୍ତୁ ଏପଟେ, ଆଇଆଇଟି କାନପୁର ଦେଶରେ ସଂକ୍ରମଣକୁ ନେଇ ବଡ ଦାବି କରିଛି । ଆଇଆଇଟି କାନପୁର ମାଥମେଟିକ୍ସ ମଡେଲ କହିଛି, ଦେଶର ୯୮ପ୍ରତିଶତ ଲୋକଙ୍କ ପାଖରେ କରୋନା ମୁକାବିଲା ପାଇଁ ପ୍ରାକୃତିକ ପ୍ରତିରୋଧକ ଶକ୍ତି ରହିଛି । ତେଣୁ ଭୟ କରିବାର କୌଣସି କାରଣ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଆଇଆଇଟି କାନପୁରର ପ୍ରଫେସର ମଣିନ୍ଦ୍ର ଅଗ୍ରୱାଲ କହିଛନ୍ତି, ‘ଦୁର୍ବଳ ପ୍ରତିରୋଧକ ଶକ୍ତି ଥିବା କିଛି ବ୍ୟକ୍ତି କରୋନାରେ ଆକ୍ରାନ୍ତ ହୋଇପାରନ୍ତି, ଆଉ ସେଥିପାଇଁ କରୋନାର ଛୋଟ ଲହର ଭାରତରେ ଦେଖା ଦେଇପାରେ । କିନ୍ତୁ ଦେଶର ୯୮ପ୍ରତିଶତ ଲୋକଙ୍କ ପାଖରେ ପ୍ରାକୃତିକ ପ୍ରତିରୋଧକ ଶକ୍ତି ବିକଶିତ ହୋଇଥିବାରୁ ବିଶେଷ କିଛି ପ୍ରଭାବ ପଡିବ ନାହିଁ । ଚୀନ, ଜାପାନ, ଦକ୍ଷିଣ କୋରିଆ, ଆମେରିକାରେ ବିଏଫ- ୭ ଭୂତାଣୁ ଯୋଗୁଁ ସଂକ୍ରମଣ ବଢୁଛି । ହେଲେ ଭାରତରେ ହର୍ଡ ଇମ୍ୟୁନିଟି ଯୋଗୁଁ ସେତେଟା ପ୍ରଭାବ ଦେଖାଯାଇ ନପାରେ ।’
ବର୍ତମାନ ସୁଦ୍ଧା ଭାରତରେ ନୂଆ ପ୍ରଜାତି ଭୂତାଣୁରେ ମାତ୍ର ୩ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ଗୁଜୁରାଟରେ ୨ ଜଣ ଏବଂ ଓଡିଶାରୁ ଜଣେ ଆକ୍ରାନ୍ତ ଚିହ୍ନଟ ହୋଇଛନ୍ତି । ଅନ୍ୟ କେହି ବିଏଫ- ୭ ଭୁତାଣୁରେ ସଂକ୍ରମିତ ହୋଇଥିବା ଖବର ମିଳି ନାହିଁ । କିନ୍ତୁ ଲୋକଙ୍କୁ ସତର୍କ ରହିବାକୁ ଉପଦେଶ ଦେଉଛନ୍ତି ସରକାର ।
ଚିନ୍ତା ବଢାଇଲା ଚୀନ ଭୂତାଣୁ । ଚୀନରେ ଭୟାବହ ସ୍ଥିତି ପରେ ଭାରତରେ ସଜାଗ ରହିବାକୁ ପରାମର୍ଶ ଦେଇଛନ୍ତି ସରକାର । ବିଭିନ୍ନ ରାଜ୍ୟରେ କୋଭିଡ୍ ଡାକ୍ତରଖାନାକୁ ପୁଣିଥରେ ପ୍ରସ୍ତୁତ ରହିବାକୁ କୁହାଯାଇଛି । ଯଦି କରୋନାର ଆଉ ଏକ ଲହର ଆସେ ତାହାଲେ ଏହାର ମୁକାବିଲା କିପରି କରାଯିବ, ସେନେଇ ଡାକ୍ତରଖାନା ଗୁଡିକରେ ବି ପ୍ରସ୍ତୁତି ଆରମ୍ଭ ହୋଇଯାଇଥିବା ଦେଖିବାକୁ ମିଳୁଛି ଏପଟେ କରୋନା ମୁକାବିଲା ପାଇଁ ଭାରତକୁ ଏକ ନୂଆ ଅସ୍ତ୍ର ମିଳିଛି । ଦେଶକୁ ବୁଷ୍ଟର ଡୋଜ ଭାବେ ଭାରତ ବାୟୋଟେକ ଦ୍ୱାର ପ୍ରସ୍ତୁତ ବିଶ୍ୱର ପ୍ରଥମ ନାଜାଲ ଭ୍ୟାକ୍ସିନ ଇନକୋଭାକ୍-କୁ ବ୍ୟବହାର ପାଇଁ ଅନୁମତି ଦେଇଛନ୍ତି କେନ୍ଦ୍ର ସରକାର ।
ଡିସିଜିଆଇର ଅନୁମତି ପରେ ଏହି ଟିକାକୁ ଭାରତ ସରକାର ମଂଜୁର କରିଛନ୍ତି । ଏହି ଟିକାକୁ ବାହୁର ନଦେଇ ନାକରେ ସ୍ପ୍ରେ କରାଯାଇଥାଏ । ଏସଂପର୍କରେ ଗତକାଲି ରାଜ୍ୟସଭାରେ ସୂଚନା ଦେଇଛନ୍ତି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡିଭ୍ୟ । କହିଛନ୍ତି, କରୋନା ରୂପ ବଦଳାଇ ପୁଣି ସାମ୍ନାକୁ ଆସୁଛି, ସଂକ୍ରମଣ ରୋକିବା ପାଇଁ ଭାରତ ସରକାର ସବୁ ପ୍ରକାର ପଦକ୍ଷେପ ନେବାକୁ ପ୍ରସ୍ତୁତ ଅଛନ୍ତି । ତେଣୁ ନାଜାଲ ଭ୍ୟାକ୍ସିନକୁ ବୁଷ୍ଟର ଡୋଜ ଭାବେ ବ୍ୟବହାର କରିବାକୁ କେନ୍ଦ୍ର ସରକାର ମଂଜୁରୀ ଦେଇଛନ୍ତି । ଇନକୋଭାକ୍ ଭ୍ୟାକ୍ସିନର କେଇ ବୁନ୍ଦା ନାକରେ ପକାଇ କରୋନାରୁ ସମସ୍ତଙ୍କୁ ସୁରକ୍ଷିତ ରଖାଯାଇପାରିବ ।