କନକ ବ୍ୟୁରୋ: ବର୍ମିଂହାମରେ ଶେଷ ହୋଇଛି ରାଜ୍ୟଗୋଷ୍ଠୀ କ୍ରୀଡ଼ାର ୨୨ତମ ସଂସ୍କରଣ । ଏହି ସମ୍ମାନଜନକ କ୍ରୀଡ଼ାର ଶେଷ ଦିନରେ ମଧ୍ୟ କମାଲ କରିଦେଖାଇଛି ଭାରତ । ସୋମବାର ଏକାଦଶ ଦିନରେ ଭାରତ ୪ଟି ସ୍ୱର୍ଣ୍ଣ ପଦକ ହାସଲ କରିଛି । ତେବେ ପୁରୁଷ ହକିରେ ଭାରତ ନୈରାଶ୍ୟଜନକ ପ୍ରଦର୍ଶନ କରି ରୌପ୍ୟ ପଦକରେ ସନ୍ତୁଷ୍ଟ ହୋଇଛି । ଭାରତ ୨୨ ସ୍ୱର୍ଣ୍ଣ, ୧୬ ରୌପ୍ୟ ଓ ୨୩ ବ୍ରୋଞ୍ଜ ସହ ମୋଟ ୬୧ ପଦକ ଜିତି ତାଲିକାର ଚତୁର୍ଥ ସ୍ଥାନରେ ଅଭିଯାନ ଶେଷ କରିଛି । ଶେଷ ଦିନରେକ ବ୍ୟାଡମିଂଟନ ଓ ଟେବୁଲ ଟେନିସ୍ରେ ଭାରତକୁ ଦୁଇଟି ଲେଖାଏ ସ୍ୱର୍ଣ୍ଣ ପଦକ ମିଳିଛି । ବ୍ୟାଡମିଂଟନର ମହିଳା ସିଙ୍ଗଲ୍ସରେ ପିଭି ସିନ୍ଧୁ ଓ ପୁରୁଷ ସିଙ୍ଗଲ୍ସରେ ଲକ୍ଷ୍ୟ ସେନ୍ ହଳଦିଆ ପଦକ ଲାଭ କରିଛନ୍ତି । ବ୍ୟାଡମିଂଟନର ମହିଳା ସିଙ୍ଗଲ୍ସ ଫାଇନାଲରେ ସିନ୍ଧୁ କାନାଡା ପ୍ରତିଦ୍ୱନ୍ଦ୍ୱୀ ମିଚେଲ ଲି’ଙ୍କୁ ସିଧାସଳଖ ୨୧-୧୫, ୨୧-୧୩ ଗେମରେ ହରାଇ ପ୍ରଥମଥର ରାଜ୍ୟଗୋଷ୍ଠୀ କ୍ରୀଡ଼ାରେ ସ୍ୱର୍ଣ୍ଣ ପଦକ ଜିତିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେହିପରି ପ୍ରଥମ ଗେମରେ ପଛୁଆ ରହିବା ପରେ ଲକ୍ଷ୍ୟ ସେନ୍ ଜବରଦସ୍ତ ପ୍ରତ୍ୟାବର୍ତନ କରି ମୁକାବିଲାକୁ ଜିତି ନେଇଥିଲେ । ସେ ଫାଇନାଲରେ ମାଲେସିଆର ଏନଜି ଟି ୟୋଙ୍ଗଙ୍କୁ ୧୯-୨୧, ୨୧-୯, ୨୧-୧୬ ଗେମରେ ହରାଇଥିଲେ । ଏହା ମଧ୍ୟ ତାଙ୍କର ପ୍ରଥମ ରାଜ୍ୟଗୋଷ୍ଠୀ କ୍ରୀଡ଼ା ସ୍ୱର୍ଣ୍ଣ ପଦକ ଥିଲା । ଟେବୁଲ ଟେନିସ୍ ପାଇଁ ମଧ୍ୟ ଥିଲା ଆଜିର ଦିନ ସ୍ୱର୍ଣ୍ଣିମ । ପୁରୁଷ ସିଙ୍ଗଲ୍ସରେ ଭେଟେରାନ୍ ଅଚନ୍ତା ଶରତ କମଲ ନିଜ ନାଁରେ ଆଉଏକ ସ୍ୱର୍ଣ୍ଣ ପଦକ କରିଛନ୍ତି । ଭାରତର ଏହି ଅଭିଜ୍ଞ ଖେଳାଳି ଫାଇନାଲରେ ଇଂଲଣ୍ଡର ଲିଆମ ପିଚଫୋର୍ଡଙ୍କୁ ମାତ୍ ଦେଇଛନ୍ତି । ଅଚନ୍ତା ମ୍ୟାଚକୁ ୧୧-୧୩, ୧୧-୭, ୧୧-୨, ୧୧-୭ରେ ନିଜ ନାଁରେ କରିଥିଲେ । ଏହା ପୂର୍ବରୁ ସେ ପୁରୁଷ ଟିମ୍ ଓ ମିକ୍ସଡ ଡବଲ୍ସରେ ସ୍ୱର୍ଣ୍ଣ ଜିତିଥିଲେ । ସେହିପରି ପୁରୁଷ ଡବଲ୍ସରେ ସାତ୍ୱିକ ସାଇରାଜ ଓ ଚିରାଗ ଶେଟ୍ଟୀଙ୍କ ଯୋଡ଼ି ସ୍ୱର୍ଣ୍ଣ ପଦକ ଜିତିଛନ୍ତି । ଭାରତର ଏହି ଏକ ନମ୍ବର ଯୋଡ଼ି ଫାଇନାଲରେ ଇଂଲଣ୍ଡର ଲେନ୍ ଓ ୱେଣ୍ଡିଂଙ୍କ ଯୋଡ଼ିଙ୍କୁ ହରାଇଛନ୍ତି । ପୁରୁଷ ହକି ଫାଇନାଲରେ ଭାରତ ଅଷ୍ଟ୍ରେଲିଆ ନିକଟରୁ ଶୋଚନୀୟ ଭାବେ ପରାସ୍ତ ହୋଇଛି । କଙ୍ଗାରୁ ଟିମ୍ ଏକତରଫା ପ୍ରଦର୍ଶନ କରି ୭-୦ ଗୋଲରେ ବିଜୟୀ ହୋଇ ସ୍ୱର୍ଣ୍ଣ ପଦକ କବଜା କରିଛି ।