ସଙ୍ଗୀନ ହେଉଛି ଶ୍ରୀଲଙ୍କା ସ୍ଥିତି: ଆର୍ଥିକ ସଙ୍କଟ ଭିତରେ ଏବେ ଦେଖାଗଲାଣି ଖାଦ୍ୟ ସଙ୍କଟ
କନକ ବ୍ୟୁରୋ: ଆର୍ଥିକ ସଙ୍କଟ ଭିତରେ ଛନ୍ଦି ହୋଇପଡ଼ିଥିବା ଶ୍ରୀଲଙ୍କା ସ୍ଥିତି ସଂଗୀନ ହେବାରେ ଲାଗିଛି । ଆଶା କରାଯାଉଥିଲା ନୂଆ ପ୍ରଧାନମନ୍ତ୍ରୀ ନିଯୁକ୍ତ ହେବା ପରେ ସ୍ଥିତି ସୁଧୁରିବ । ହେଲେ ସ୍ଥିତି ଆହୁରି ଜଟିଳ ହୋଇପଡ଼ିଲାଣି । ଏବେ ଶ୍ରୀଲଙ୍କାରେ ଦେଖାଦେଇଛି ଖାଦ୍ୟ ସଙ୍କଟ ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀଲଙ୍କା ପ୍ରଧାନମନ୍ତ୍ରୀ ରାନିଲ ୱିକ୍ରମସିଂଘେ ସତର୍କ କରାଇ ଦେଇଛନ୍ତି ଯେ, ଦେଶ ଖାଦ୍ୟ ସଙ୍କଟର ସାମ୍ନା କରିବାକୁ ଯାଉଛି । ଏଯାଏଁ ସେଠାରେ ପେଟ୍ରୋଲ, ଡିଜେଲ ଓ ଗ୍ୟାସ୍ର ଘୋର ଅଭାବ କଥା ସାମ୍ନାକୁ ଆସିଥିଲା, ହେଲେ ଖାଦ୍ୟର ସଙ୍କଟ ଏବେ ସମସ୍ତିଙ୍କ ପାଇଁ ଚିନ୍ତାର କାରଣ ପାଲଟିଛି । ପ୍ରାୟ ୨ କୋଟି ଦେଶବାସୀଙ୍କୁ ଖାଦ୍ୟ ଯୋଗାଇବା ଏବେ ନୂଆ ସରକାର ପାଇଁ ଏକ ବଡ଼ ଆହ୍ୱାନ ପାଲଟିଛି ।
ଅବଶ୍ୟ ଖାଦ୍ୟ ଶସ୍ୟ ଉତ୍ପାଦନ ବଢ଼ାଇବାକୁ ଶ୍ରୀଲଙ୍କା ସରକାର ପଦକ୍ଷେପ ନେବା ଆରମ୍ଭ କରିଛନ୍ତି । ଚଷୀମାନଙ୍କୁ ସାର ଯୋଗାଇ ଦେଇ ଉତ୍ପାଦନ ବଢ଼ାଇବା କଥା କହିଛନ୍ତି ପ୍ରଧାନମନ୍ତ୍ରୀ ରାନିଲ ୱିକ୍ରମସିଂଘେ । ଶ୍ରୀଲଙ୍କାରେ ଏହି ଖାଦ୍ୟ ସଙ୍କଟ ପଛରେ ଗୋଟାବାୟା ସରକାର ଭୁଲ ନିଷ୍ପତିକୁ ଦାୟୀ କରାଯାଇପାରେ । କାରଣ ଜୈବିକ ଚାଷ ନାଁରେ ନିଆଯାଇଥିବା ନିଷ୍ପତିର ଭୟଙ୍କର ପରିଣାମ ଏବେ ଦେଖିବାକୁ ମିଳୁଛି ।
ଗତ ବର୍ଷ ଏପ୍ରିଲରେ ଦେଶରେ ସବୁ ପ୍ରକାର ରାସାୟନିକ ସାର ବ୍ୟବହାର ଉପରେ ହଠାତ୍ କଟକଣା ଲଗାଇଦେଲେ ଗୋଟାବାୟା ସରକାର । ଏହା ପଛରେ ଯୁକ୍ତି ଦର୍ଶାଗଲା ଯେ, ଜୈବିକ ଚାଷ କରାଯିବ । ହେଲେ ଏହାର ପରିଣାମ ସାଂଘାତିକ ପାଲଟିଛି । ଦେଶରେ ଖାଦ୍ୟ ଶସ୍ୟ ଉତ୍ପାଦନ ଏକଦମ୍ କମିଗଲା । ଫଳରେ ଏବେ ଏମିତି ସ୍ଥିତି ଉପୁଜିଛି ଯେ, ଦେଶର ଜନସଂଖ୍ୟାକୁ ଖାଦ୍ୟ ଯୋଗାଇବା କଷ୍ଟକର ହୋଇପଡ଼ିଛି । ଅବଶ୍ୟ ଆର୍ଥିକ ସଙ୍କଟ ଆରମ୍ଭ ହେବା ପରେ ରାସାୟନିକ ସାର ଉପରେ ଲଗାଇଥିବା କଟକଣାକୁ ହଟାଇ ଦିଆଯାଇଛି । ହେଲେ ଏହାର କୁପରିଣାମ ଶ୍ରୀଲଙ୍କା ବାସୀଙ୍କୁ ହନ୍ତସନ୍ତ କରୁଛି ।