ଜେଲରୁ ମୁକୁଳିବେ ସିସୋର ଚିଟଫଣ୍ଡ ଠକେଇର ମୁଖ୍ୟ ଅଭିଯୁକ୍ତ ପ୍ରଶାନ୍ତ ଦାଶ : ହାଇକୋର୍ଟରୁ ମିଳିଲା ଜାମିନ
କନକ ବ୍ୟୁରୋ : ସି-ସୋର ଚିଟଫଣ୍ଡ ଠକେଇ ମାମଲାରେ ସି-ସୋର ଗ୍ରୁପ୍ ମୁଖ୍ୟ ପ୍ରଶାନ୍ତ ଦାଶଙ୍କୁ ମିଳିଛି ଜାମିନ । ପ୍ରଶାନ୍ତଙ୍କୁ ସର୍ତମୂଳକ ଜାମିନ୍ ପ୍ରଦାନ କରିଛନ୍ତି ହାଇକୋର୍ଟ । କୋର୍ଟରେ ପାସପୋର୍ଟ ଦାଖଲ କରିବା ସହ ବାହାରକୁ ଯିବା ଉପରେ କଟକଣା ଲଗାଇଛନ୍ତି ହାଇକୋର୍ଟ । ସି-ସୋର ଚିଟଫଣ୍ଡ ଠକେଇ ମାମଲାର ମୁଖ୍ୟ ଅଭିଯୁକ୍ତ ଭାବେ ପ୍ରଶାନ୍ତ ଦାଶଙ୍କୁ ୨୦୧୩ ଜୁନ୍ ୧୯ରେ କ୍ରାଇମବ୍ରାଞ୍ଚ ମୁ୍ମ୍ବାଇରୁ ଗିରଫ କରିଥିଲା । ୨୦୧୩ରୁ ଗିରଫ ହୋଇଥିବା ପ୍ରଶାନ୍ତ ଦାଶ ୪ ବର୍ଷ ହେବ ଜେଲରେ ଅଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସର୍ତମୂଳକ ଜାମିନ୍ ଅନୁଯାୟୀ ପ୍ରଶାନ୍ତ ଯଦି ରାଜ୍ୟ ବାହାରକୁ ଯିବେ ତେବେ ତଦନ୍ତକାରୀ ଅଧିକାରୀଙ୍କ ଠାରୁ ଅନୁମତି ନେବାକୁ ପଡ଼ିବ । ଆଜି ପ୍ରଶାନ୍ତ ଦାଶଙ୍କୁ ହାଇକୋର୍ଟ ସର୍ତମୂଳକ ଜାମିନ ପ୍ରଦାନ କରିଥିବା ବେଳେ ଏହି ଚିଟଫଣ୍ଡ ମାମଲାର ଅନ୍ୟତମ ପୁରୋଧା ତଥା ତାଙ୍କ ଭାଇ ପ୍ରଭାତ ଦାଶ ପୂର୍ବରୁ ସୁପ୍ରିମକୋର୍ଟରୁ ଜାମିନ ପାଇସାରିଛନ୍ତିା
ପୂର୍ବରୁ ସି-ସୋର ଚିଟଫଣ୍ଡ ମହାଠକେଇକୁ ନେଇ ପୂରା ରାଜ୍ୟ ରାଜନୀତି ସରଗରମ ହୋଇ ଉଠିଥିଲା । କାରଣ ଶାସକ ଦଳର କିଛି ନେତା ଓ ମନ୍ତ୍ରୀଙ୍କ ନାଁ ଏହି ଚିଟଫଣ୍ଡ ମହାଠକେଇରେ ସାମ୍ନାକୁ ଆସିଥିଲା । ଏପରିକି କମ୍ପାନୀର ଏକ କାର୍ଯ୍ୟକ୍ରମରେ ମାଲିକ ପ୍ରଶାନ୍ତ ଦାଶଙ୍କୁ ଭୂୟସୀ ପ୍ରଶଂସା କରିଥିଲେ ଖୋଦ୍ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ପ୍ୟାରୀମୋହନ ମହାପାତ୍ରଙ୍କ ପରି ବଡବଡ ନେତା । ଏହି ଚିଟଫଣ୍ଡ ମାମଲା ସାମ୍ନାକୁ ଆସିବା ପରେ ରାଜରାସ୍ତାରୁୁ ଆରମ୍ଭ କରି ବିଧାନସଭା ପର୍ଯ୍ୟନ୍ତ ସବୁଠି ସରକାରଙ୍କୁ ବିରୋଧର ସାମ୍ନା କରିବାକୁ ପଡ଼ିଥିଲା ।
ଏହି ମାମଲାର ତଦନ୍ତ ଆରମ୍ଭ ହେବା ପରେ ଗୋଟିଏ ପରେ ଗୋଟିଏ ବଡ଼ ମାଛ ସିବିଆଇ ଜାଲରେ ପଡ଼ିଥିଲେ । ଲାଗୁଥିଲା ଖୁବଶୀଘ୍ର ଏହି ମାମଲାର ତଦନ୍ତ ଶେଷ ହେବ । କିନ୍ତୁ ୨୦୧୪ ସାଧାରଣ ନିର୍ବାଚନ ପରେ ସିବିଆଇ ତଦନ୍ତରେ ଶିଥିଳତା ଦେଖା ଦେଇଥିଲା । ତଦନ୍ତରେ ଯେପରି ଏକରକମର ତାଲା ପଡ଼ିଯାଇଥିଲା । କିନ୍ତୁ ଏବେ ପ୍ରଶାନ୍ତ ଦାଶଙ୍କୁ ହାଇକୋର୍ଟରୁ ଜାମିନ ମିଳିବା ପରେ ଜମାକାରୀଙ୍କ ଗାଲରେ ଲାଗିଛି ଶକ୍ତ ଚାପୁଡ଼ା ।
ଜେଲରୁ ବେଲ୍ ପର୍ଯ୍ୟନ୍ତ ପ୍ରଶାନ୍ତ ଦାଶଙ୍କ ପୂରା ଯାତ୍ରା:
ସିସୋର ଚିଟଫଣ୍ଡ ମାଲିକ ପ୍ରଶାନ୍ତ ଦାଶ । ଅଧିକ ଲାଭର ଲୋଭ ଦେଖାଇ ରାଜ୍ୟରେ ପ୍ରାୟ ୧ଲକ୍ଷ ୫୦ ହଜାର ଜମାକାରୀଙ୍କ ୧୭୦୦କୋଟି ଟଙ୍କା ଠକି ନେଇଥିବା ଅଭିଯୋଗ ଆସିବା ପରେ ୨୦୧୩ ଜୁନ୍ ୧୯ରେ ତାଙ୍କୁ କ୍ରାଇମବ୍ରାଞ୍ଚ ମୁମ୍ବାଇରୁ ଗିରଫ କରିଥିଲା । ଜମାକରୀଙ୍କ ପଇସାରେ ଅୟସ ଆରାମ କରୁଥିଲେ ପ୍ରଶାନ୍ତ । ଚିଟଫଣ୍ଡ ଟଙ୍କାକୁ ସେ ତାଙ୍କ ଅନ୍ୟ ବ୍ୟବସାୟରେ ନିବେଶ କରିଥିଲେ । ଖାଲି ଏତିକିରେ ତାଙ୍କ କଳାକାରାନାମା ସରିନଥିଲା, ନେତା, ମନ୍ତ୍ରୀ ଓ ସରକାରୀ ଅଫିସରକୁ ଖୁସ୍ କରିବାକୁ ଜମାକାରୀଙ୍କ ଟଙ୍କାକୁ ପାଣି ପରି ଖର୍ଚ୍ଚ କରୁଥିଲେ । ପରେ ତାଙ୍କ ନାଁରେ ଚିଟଫଣ୍ଡ ଠକେଇ ଆସିବା ପରେ ୨୦୧୩ରେ କ୍ରାଇମବ୍ରାଞ୍ଚ ପ୍ରଶାନ୍ତଙ୍କୁ ମୁମ୍ବାଇରୁ ଗିରଫ କରିଥିଲା ।ଏହାପରେ ୪ ବର୍ଷ ଧରି ଜେଲରେ ରହିସାରିଲେଣି ଚିଟଫଣ୍ଡ ଖଳନାୟକ । ତେବେ ହାଇକୋର୍ଟରୁ ଆଜି ତାଙ୍କୁ ସର୍ତମୂଳକ ଜାମିନ ମିଳିଛି ।