କନକ ବ୍ୟୁରୋ : ଗୁଜରାଟ ନିର୍ବାଚନ ଯେତେ ପାଖେଇ ଆସୁଛି ରାଜନୈତିକ ଦଳମାନଙ୍କ ମଧ୍ୟରେ କଥା କଟାକଟି ବଢିବାରେ ଲାଗିଛି । ନିର୍ବାଚନ କମିଶନଙ୍କ ଘୋଷଣା ମୁତାବକ ଗୁଜରାଟ ବିଧାନସଭା ପାଇଁ ଦୁଇଟି ପର୍ଯ୍ୟାରେ ଭୋଟ ଗ୍ରହଣ ହେବ । ପ୍ରଥମ ପର୍ଯ୍ୟାୟ ଡିସେମ୍ବର ୧ ରେ ଓ ଦ୍ୱିତୀୟ ପର୍ଯ୍ୟାୟ ଡିସେମ୍ବର ୫ ତାରିଖରେ ହେବ । ଏହାପରେ ଡିସେମ୍ବର ୮ ତାରିଖରେ ଉଭୟ ଗୁଜରାଟ ଓ ହିମାଚଳ ପ୍ରଦେଶ ବିଧାନସଭା ନିର୍ବାଚନର ଫଳାଫଳ ପ୍ରକାଶ ପାଇବ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ନିର୍ବାଚନ ବେଳେ ଯେଉଁ ନେତାମାନଙ୍କୁ ନିଜ ଦଳରୁ ଟିକେଟ ନମିଳିଲା ସେମାନେ ନିର୍ବାଚନ ଲଢିବାକୁ ଦଳ ବଦଳାଇ ଦେଲେ । ଏହି କ୍ରମରେ ଗୁଜରାଟରେ ନିଜ ଦଳ ଛାଡି ବିଜେପିରେ ଯୋଗ ଦେଇଥିବା ନେତାମାନଙ୍କ ମଧ୍ୟରେ ବିଜେପି ୧୯ ଜଣଙ୍କୁ ଟିକେଟ ଦେଇଥିବା ବେଳେ ଆମ୍ ଆଦମୀ ପାର୍ଟି ଏଭଳି ଦଳ ବଦଳ କରି ଆସିଥିବା ୨୫ ଜଣ ନେତାଙ୍କୁ ଟିକେଟ ଦେଇଛି । ଏହି ନେତାମାନେ କଂଗ୍ରେସ ଛାଡି ବିଜେପି ଓ ଆମ୍ ଆଦମୀ ପାର୍ଟିରେ ଯୋଗ ଦେଇଥିଲେ ।
ସେପଟେ ଏତେ ପରିମାଣର ନେତା କଂଗ୍ରେସ ଛାଡି ଅନ୍ୟ ଦଳରେ ଯୋଗ ଦେବା ପରେ ଏହାକୁ ନେଇ କଂଗ୍ରେସ ପ୍ରବକ୍ତା ମନୀଷ ଦୋଷୀ କହିଛନ୍ତି ଆପ୍ ହେଉଛି ବିଜେପିର ‘ବି’ ଟିମ୍ । ସେପଟେ କଂଗ୍ରେସ ତରଫରୁ କୁହାଯାଇଛି କି, ଏହା ଦଳ ଓ ନିର୍ବାଚନ ଉପରେ କୌଣସି ପ୍ରଭାବ ପକାଇବ ନାହିଁ ।