କନକ ବ୍ୟୁରୋ: ଜୁଲାଇ ପହିଲାରୁ ଦେଶରେ ସାମଗ୍ରୀ ଏବଂ ସେବା ଟିକସ (ଜିଏସଟି) କାର୍ଯ୍ୟକାରୀ ହେଲାଣି । ଫଳରେ ଜିଏସଟିକୁ ଏକ ମାସ ପୂରଣ ହୋଇଯାଇଛି । ମାସେ ବିତିଯାଇଥିଲେ ମଧ୍ୟ ବ୍ୟବସାୟୀମାନେ ନୂଆ ଟିକସ ବ୍ୟବସ୍ଥାକୁ ସମ୍ପୂର୍ଣ୍ଣ ଭାବେ ଆପଣାଇ ପାରିନାହାନ୍ତି । ବଜାରକୁ ସାମଗ୍ରୀ ଯୋଗାଣ ସ୍ୱାଭାବିକ ହୋଇନାହିଁ । ଗ୍ରାହକ, ବ୍ୟବସାୟୀ ଓ ସରକାରଙ୍କ ପାଇଁ ଜିଏସଟି କେତେଦୂର ଲାଭଦାୟକ ହେବ ତାହା ଆଉ କିଛି ଦିନ ଯିବା ପରେ ହିଁ ଜଣାପଡ଼ିବ ବୋଲି ଟିକସ ବିଶେଷଜ୍ଞଙ୍କଠାରୁ ଆରମ୍ଭ କରି ବ୍ୟବସାୟୀ ଏବଂ ଗ୍ରାହକମାନେ ମତ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଜିଏସଟି ଲାଗୁ ହେବା ପରେ ଦୁଇ ପ୍ରକାର ଏମଆରପି ଲେଖିବା ଏବଂ ମୂଲ୍ୟ ହ୍ରାସର ଲାଭ ଗ୍ରାହକଙ୍କୁ ଦେବା ଲାଗି ସରକାର ଯେଉଁ ନିୟମ କରିଛନ୍ତି ତାହାକୁ କାଁ ଭାଁ ପାଳନ କରାଯାଉଛି । ଯେଉଁଠି ପ୍ରତିଯୋଗିତାମୂଳକ ବଜାର ରହିଛି ସେଠାରେ ଗ୍ରାହକମାନେ ମୂଲ୍ୟ ହ୍ରାସର ଲାଭ ପାଉଥିବାବେଳେ ଅନ୍ୟସ୍ଥାନରେ ତାହା ମିଳୁନାହିଁ । ଗ୍ରାହକ ଯେଭଳି ମୂଲ୍ୟ ହ୍ରାସର ଲାଭ ପାଇବେ ତାହାକୁ ସରକାର କଡ଼ାକଡ଼ି ଅନୁଧ୍ୟାନ କରିବା ଆବଶ୍ୟକ ବୋଲି ସାଧାରଣରେ ମତ ପ୍ରକାଶ ପାଇଛି ।
କେତେକ ବଡ଼ ବଡ଼ ବ୍ୟବସାୟୀ ଜିଏସଟି ବ୍ୟବସ୍ଥା ଅନୁଯାୟୀ ବ୍ୟବସାୟ କରୁଥିବାବେଳେ ଛୋଟ ଛୋଟ ବ୍ୟବସାୟୀ ନୂଆ ବ୍ୟବସ୍ଥାକୁ ଏପର୍ୟ୍ୟନ୍ତ ବୁଝିପାରି ନାହାନ୍ତି । ଯେଉଁ ଛୋଟ ବ୍ୟବସାୟୀ ଜିଏସଟିକୁ ଯାଇନାହାନ୍ତି ସେମାନେ ତାଙ୍କ ତଳେ ରହିଥିବା ବ୍ୟବସାୟୀଙ୍କୁ ଏଣ୍ଡ୍ କଷ୍ଟମର ବା ଅନ୍ତିମ ଗ୍ରାହକ ଭାବେ ସାମଗ୍ରୀ ବିକ୍ରି କରୁଛନ୍ତି । ଫଳରେ ସେହି ଛୋଟ ବ୍ୟବସାୟୀମାନେ ଇନପୁଟ୍ ଟ୍ୟାକ୍ସ କ୍ରେଡିଟ୍ ପାଇବାର ସୁଯୋଗ ପାଉନାହାନ୍ତି ।
ଅନ୍ୟପକ୍ଷରେ ନୂଆ ଟିକସ ବ୍ୟବସ୍ଥା କାର୍ୟ୍ୟକାରୀ ହେବା ଦ୍ୱାରା ଅନ୍ତଃରାଜ୍ୟ ଚେକଗେଟ୍ ଗୁଡ଼ିକ ଉଚ୍ଛେଦ ହୋଇଛି । ଫଳରେ ମାଲ ପରିବହନ ସମୟ ହ୍ରାସ ଘଟିଛି । ତନଖି ଫାଟକ ନିକଟରେ ଘଣ୍ଟା ଘଣ୍ଟା ଧରି ଟ୍ରକ୍ ଗୁଡ଼ିକୁ ଆଉ ଠିଆ ହେବାକୁ ପଡ଼ୁନାହିଁ । ଯେଉଁ ମାଲ୍ ଦିଲ୍ଲୀ କିମ୍ବା ମୁମ୍ବାଇରୁ ଭୁବନେଶ୍ୱରରେ ପହଞ୍ଚିବା ଲାଗି ପୂର୍ବରୁ ୭ ଦିନ ଲାଗୁଥିଲା ତାହା ଏବେ ୪ ଦିନରେ ପହଞ୍ଚି ଯାଉଛି । ତେବେ ଜିଏସଟି ଏକ ପ୍ରଯୁକ୍ତିଭିତ୍ତିକ ଟିକସ ବ୍ୟବସ୍ଥା ହୋଇଥିବାରୁ ବିଲିଂ ଏପର୍ଯ୍ୟନ୍ତ ଠିକ୍ ଭାବେ ହୋଇପାରି ନାହିଁ । ଗ୍ରାହକମାନେ ବି ମୂଲ୍ୟ ହ୍ରାସର ଲାଭ ପାଇନାହାନ୍ତି ।
ଜିଏସଟି କାର୍ଯ୍ୟକାରୀ ହୋଇଥିଲେ ମଧ୍ୟ ଏହାର ଅସଲ ବିଷୟ ବା ରିଟର୍ଣ୍ଣ ଫାଇଲ ଏ ପର୍ଯ୍ୟନ୍ତ ହୋଇନାହିଁ । ଅନେକ ବ୍ୟବସାୟୀଙ୍କ ପାଇଁ କମ୍ପ୍ୟୁଟରରେ କାର୍ଯ୍ୟ କରିବା ସହଜ ହୋଇନାହିଁ । ଫଳରେ ରିଟର୍ଣ୍ଣ ଫାଇଲ କରିବା ପରେ ବ୍ୟବସ୍ଥା ସମ୍ପର୍କରେ ପରିଚିତ ହେବୁ । ଏହାପରେ ନୂଆ ଟିକସ ବ୍ୟବସ୍ଥା କେତେ ଭଲ ବା ଖରାପ ତାହା ଜଣାପଡ଼ିବ । ଖାଲି ଥିଓରିରେ କିଛି ବୁଝାପଡ଼ିବନି । ପ୍ରାକ୍ଟିକାଲ କରିବା ପରେ ହିଁ ସବୁକିଛି ସ୍ପଷ୍ଟ ହେବ ବୋଲି ଓଡ଼ିଶା ବ୍ୟବସାୟୀ ମହାସଂଘର ସାଧାରଣ ସମ୍ପାଦକ ସୁଧାକର ପଣ୍ଡା କୁହନ୍ତି । ପ୍ରଥମ ରିଟର୍ଣ୍ଣ ଅଗଷ୍ଟ ୧୦ ତାରିଖ ବେଳକୁ ଫାଇଲ କରିବା ପରେ ସବୁକିଛି ସ୍ପଷ୍ଟ ହେବ ବୋଲି ସେ କହିଛନ୍ତି।
ଚାର୍ଟାର୍ଡ ଆକାଉଣ୍ଟାଣ୍ଟ୍ ବିଧୁଭୂଷଣ ନାୟକ କୁହନ୍ତି ଗୋଟିଏ ବିଜନେସ୍ ସାଇକଲ୍ ସାଧାରଣତଃ ୩ ମାସ ନେଇଥାଏ । କମ୍ପାନିରୁ ଉତ୍ପାଦନ ହୋଇ ସାମଗ୍ରୀ ଗ୍ରାହକଙ୍କ ନିକଟରେ ପହଞ୍ଚିବା ଲାଗି ଏହି ସମୟ ଲାଗିଥାଏ । ତେଣୁ ଜିଏସଟି ପୂର୍ବରୁ ଯେଉଁ ସାମଗ୍ରୀ ବଜାରକୁ ଆସିଥିଲା ତାହା ଶେଷ ହେବାକୁ ସେପ୍ଟେମ୍ବର ଶେଷ ପର୍ଯ୍ୟନ୍ତ ଲାଗିଯିବ । ତାହା ପରେ ନୂଆ ଟିକସ ବ୍ୟବସ୍ଥାର ଲାଭ ଲୋକେ ପାଇବେ ବୋଲି ଶ୍ରୀ ନାୟକ କୁହନ୍ତି ।
ଆଇଟି ବ୍ୟବସାୟ ଉପରେ ନୂଆ ଟିକସ ବ୍ୟବସ୍ଥା ଅନୁକୂଳ ପ୍ରଭାବ ପକାଇଛି ବୋଲି କୁହନ୍ତି ଭୁବନେଶ୍ୱରର ପ୍ରତିଷ୍ଠିତ ଆଇଟି ବ୍ୟବସାୟୀ ରୁଦ୍ରକାନ୍ତ ମହାପାତ୍ର । ତାଙ୍କ କହିବାନୁଯାୟୀ ଯାହା ବ୍ୟବସାୟ ହେଉଛି ବିଲରେ ହେଉଛି । ହାତ ଲେଖା ଚିଠା ଯୁଗ ଶେଷ ହୋଇଯାଇଛି । ଆକାଉଣ୍ଟିଂ କାର୍ଯ୍ୟ ସବୁ କମ୍ପ୍ୟୁଟରରେ କରାଯାଉଛି । ଫଳରେ ଲାପଟପ୍, ଡେସ୍କଟପ୍ ବିକ୍ରି ବୃଦ୍ଧି ଘଟିଛି । ଜିଏସଟି ପାଇଁ ସଫ୍ଟଓୟାର ବିକ୍ରି ମଧ୍ୟ ବଢ଼ିଛି ।
୩ ମାସ ମଧ୍ୟରେ ସବୁ ବ୍ୟବ୍ୟସାୟୀ ନୂଆ ଟିକସ ବ୍ୟବସ୍ଥା ପରିସରକୁ ଆସିଯିବେ । ଫଳରେ ଜିଏସ୍ଟିର ଲାଭ ଉଭୟ ଗ୍ରାହକ ଏବଂ ବ୍ୟବସାୟୀ ପାଇବେ ବୋଲି ବୋଲି ଶ୍ରୀ ମହାପାତ୍ର ମତବ୍ୟକ୍ତ କହିଛନ୍ତି । ଜିଏସଟି ଏବଂ ସୀମା ଶୁଳ୍କ ବିଭାଗର ଜଣେ ଅଧିକାରୀଙ୍କ ସୂଚନା ଅନୁଯାୟୀ ରାଜ୍ୟରେ ଏବେ ସୁଦ୍ଧା କେନ୍ଦ୍ରୀୟ ଜିଏସଟି ବ୍ୟବସ୍ଥାକୁ ୬୪ ପ୍ରତିଶତ ଟିକସଦାତା ଆସିଲେଣି । ଅବଶିଷ୍ଟ ଟିକସଦାତା ନିକଟ ଭବିଷ୍ୟତରେ ଜିଏସଟି ପରିସରକୁ ଆସିବା ନେଇ ସେ ଆଶାବାଦୀ ଥିବା କହିଛନ୍ତି ।