ସେଫଟୀ କମିଶନରଙ୍କ ରିପୋର୍ଟରେ ସାଂଘାତିକ ତଥ୍ୟ: ଦୁର୍ଘଟଣା ପାଇଁ ରିଲେ-ରୁମ୍ ଷ୍ଟାଫ୍ ଦାୟୀ!
କନକ ବ୍ୟୁରୋ: ବାହାନଗା ରେଳ ଦୁର୍ଘଟଣାର ତଦନ୍ତ ରିପୋର୍ଟ ରେଳବାଇ ସୁରକ୍ଷା କମିଶନ ରେଳବୋର୍ଡ ଅଧ୍ୟକ୍ଷଙ୍କୁ ପ୍ରଦାନ କରିବା ପରେ ଆରମ୍ଭ ହୋଇଛି ଚର୍ଚ୍ଚା । ଦୁର୍ଘଟଣା ପାଇଁ କିଏ ଦାୟୀ ସେ ନେଇ ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି । ତେବେ ରିପୋର୍ଟରେ କ’ଣ ସବୁ ଉଲ୍ଲେଖ କରାଯାଇଛି ବିସ୍ତୃତ ସୂଚନା ମିଳିନାହିଁ । ସିବିଆଇ ତଦନ୍ତ ଚାଲିଥିବାରୁ ଏହି ରିପୋର୍ଟକୁ ସାର୍ବଜନୀନ କରାଯିବ ନାହିଁ ବୋଲି ବରିଷ୍ଠ ରେଳ ଅଧିକାରୀ ସୂଚନା ଦେଇଛନ୍ତି । ଅନ୍ୟପଟେ ଏହାକୁ ନେଇ ଆରମ୍ଭ ହୋଇଛି ରାଜନୈତିକ ବୟାନବାଜି ।
Kanak News is now on WhatsApp
Join and get latest news updates delivered to you via WhatsApp
ବାହାନଗା ଟ୍ରେନ ଦୁର୍ଘଟଣା ପାଇଁ ଦାୟୀ କିଏ? କାହାର ତ୍ରୁଟି ପାଇଁ ଏତେ ବଡ ଦୁର୍ଘଟଣା ଘଟିଲା? ତାହା ରହସ୍ୟରେ ରହିଥିବାବେଳେ ସାଂଘାତିକ ତଥ୍ୟ ସାମନାକୁ ଆସିଛି । ରେଲୱେ ସେଫ୍ଟି କମିଶନରଙ୍କ ରିପୋର୍ଟ ବିଭାଗ ପକ୍ଷରୁ ସାର୍ବଜନୀନ କରାଯାଇନଥିଲେ ଜାତୀୟ ଗଣମାଧ୍ୟମରେ ଜୋରଦାର ଚର୍ଚ୍ଚା ହେଉଛି । ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ,
ସେଫଟୀ କମିଶନରଙ୍କ ରିପୋର୍ଟ..
– ରିଲେ-ରୁମ୍ ଷ୍ଟାଫ ତ୍ରୁଟି ଦୁର୍ଘଟଣାର ବଡ଼ କାରଣ
– ସିଗନାଲ ଓ ଟେଲି କମ୍ୟୁନିକେସନ୍ ବିଭାଗରେ ତ୍ରୁଟି ରହିଥିଲା
କେବଳ ଟେକ୍ନିକାଲ ତ୍ରୁଟି ନେଇ ସେଫ୍ଟି କମିଶନର ରିପୋର୍ଟ ଦେଇଥିବା ଚର୍ଚ୍ଚା ହେଉଛି । କିନ୍ତୁ ଦୁର୍ଘଟଣା ଉଦ୍ଦେଶ୍ୟମୂଳକ ଥିଲା କି ନାହିଁ ତାହା ସିବିଆଇ ତଦନ୍ତ କରିବ ।
ସେଫଟୀ କମିଶନରଙ୍କ ରିପୋର୍ଟକୁ ନେଇ ତେଜିଛି ରାଜନୈତିକ ବୟାନବାଜି । ରିପୋର୍ଟକୁ ସାର୍ବଜନୀନ କରିବାକୁ ଦାବି କରିଛି କଂଗ୍ରେସ । କଂଗ୍ରେସ ମୁଖପାତ୍ର ସୁଦର୍ଶନ ଦାସ କହିଛନ୍ତି, ଯାହା ସୂଚନା ଅଛି, ସିଷ୍ଟମର ଫେଲ୍ୟୁଅର ଯୋଗୁଁ ଏତେ ବଡ ଦୁର୍ଘଟଣା ଘଟିଲା । ଏହା ପଛରେ କୌଣସି ଷଡଯନ୍ତ୍ର ନାହିଁ । ତେଣୁ ସେଫ୍ଟି କମିଶନରଙ୍କ ରିପୋର୍ଟକୁ ସାର୍ବଜନୀନ କରାଯାଉ । ଜବାବରେ ବିଜେପି କହିଛି, ସୁରକ୍ଷା ଗତ କାରଣ ଯୋଗୁଁ ରିପୋର୍ଟ ସାର୍ବଜନୀନ କରାଯାଇ ନାହିଁ । ଚିନ୍ତା କରି ପଦକ୍ଷେପ ନିଆଯିବ ।
ଏସବୁ ଭିତରେ ଦକ୍ଷିଣ ପୂର୍ବ ରେଳ ପଥ ଜେନେରାଲ ମ୍ୟାନେଜର ଅର୍ଚ୍ଚନା ଯୋଶୀଙ୍କୁ ବଦଳି କରାଯାଇଛି । କ୍ୟାବିନେଟ୍ କମିଟିର ନିଯୁକ୍ତି ସମିତି ଅର୍ଚ୍ଚନାଙ୍କ ସ୍ଥାନରେ ଅନିଲ କୁମାର ମିଶ୍ରଙ୍କୁ ନୂଆ ଦାୟିତ୍ୱ ପାଇଁ ଅନୁମତି ଦେଇଛି । ଅର୍ଚ୍ଚନା ଯୋଶୀଙ୍କୁ କର୍ଣ୍ଣାଟକର ୟେଲହଙ୍କାରେ ରେଲୱେ ଭେହିକିଲ ଫ୍ୟାକ୍ଟ୍ରିରେ ଜେନେରାଲ ମ୍ୟାନେଜର ଭାବେ ଦାୟିତ୍ୱ ଦିଆଯାଇଛି ।