କନକ ବ୍ୟୁରୋ: ମ୍ୟାଗି ଖାଇବାକୁ ପିଲାଠାରୁ ବୟସ୍କ ସମସ୍ତଙ୍କୁ ଭଲ ଲାଗେ । କିନ୍ତୁ ମ୍ୟାଗି ଖାଇବାକୁ ନେଇ ଛାଡପତ୍ର ଦିଆନିଆ କଥା କେବେ ଶୁଣିଛନ୍ତି? କିନ୍ତୁ ଏପରି ଘଟିଛି କର୍ଣ୍ଣାଟକ ମୈସୁର ସହରରେ । ଏଠି ମ୍ୟାଗୀକୁ କେନ୍ଦ୍ର କରି ପତ୍ନୀକୁ ଛାଡପତ୍ର ଦେଇଛନ୍ତି ସ୍ୱାମୀ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
କଥା ହେଉଛି ସକାଳ ଜଳଖିଆଠାରୁ ଆରମ୍ଭ କରି ମଧ୍ୟାହ୍ନ ଭୋଜନ, ରାତ୍ରୀ ଭୋଜନ ସବୁଥିରେ କେବଳ ମ୍ୟାଗି ହିଁ ଖାଇବାକୁ ଦେଉଥିଲେ ସ୍ତ୍ରୀ । ଏଥିରେ ବିରକ୍ତ ହୋଇଯାଇଥିଲେ ସ୍ୱାମୀ । ଶେଷରେ ଛାଡପତ୍ର ଦେବାକୁ ନିଷ୍ପତ୍ତି ନେଲେ । ଛାଡପତ୍ର ଆବେଦନରେ ବ୍ୟକ୍ତି ଜଣକ ଉଲ୍ଲେଖ କରିଛନ୍ତି ଯେ, ତାଙ୍କ ସ୍ତ୍ରୀଙ୍କୁ ରୋଷଇ କରି ଆସେନାହିଁ କି ସେ ରୋଷେଇ ଶିଖିବାକୁ ମଧ୍ୟ ଆଗ୍ରହୀ ନୁହଁନ୍ତି । ଗ୍ରୋସରୀ ସପକୁ ଗଲେ ମ୍ୟାଗି ଛଡା ଆଉ କିଛି କିଣନ୍ତି ନାହିଁ । ଘରେ କେବେ କିଛି ରାନ୍ଧନ୍ତି ନାହିଁ । ଅଫିସ୍ ଯିବା ବାହାନା ଓ ଥକି ପଡିଥିବା ବାହାନା କରି ସବୁବେଳେ ତାଙ୍କ ଆଗରେ ମ୍ୟାଗି ପ୍ଲେଟ୍ ଥୋଇଦିଅନ୍ତି । ଏହା ତାଙ୍କ ପାଇଁ ଏକ ମାନସିକ ଯନ୍ତ୍ରଣା ବ୍ୟତୀତ ଆଉ କିଛି ନୁହେଁ ବୋଲି ଛାଡପତ୍ର ଆବେଦନରେ ଉଲ୍ଲେଖ କରିଛନ୍ତି ।
ଆଦାଲତରେ ଅନେକ ଛାଡପତ୍ର ମାମଲା ପଡିଥିଲେ ବି ଏହା ସବୁଠୁ ରୋଚକ ଛାଡପତ୍ର ଆବେଦନ ଥିଲା ବୋଲି ଜଜ୍ କହିଛନ୍ତି । ଏହାକୁ ‘ମ୍ୟାଗି ଡିଭୋସ’ର୍ ବୋଲି କୋର୍ଟ ନାମିତ କରିଛନ୍ତି । ଏହାସହ ଏଥିରେ ଉଭୟ ସ୍ୱାମୀ ସ୍ତ୍ରୀଙ୍କର ସହମତି ଥିବାରୁ ଛାଡପତ୍ରକୁ ସ୍ୱୀକାର କରିଛନ୍ତି କୋର୍ଟ । ଏନେଇ ଗତ ଶୁକ୍ରବାର ମ୍ୟାଟ୍ରିମୋନିଆଲ ମାମଲାରେ ଥିବା ଶୁଣାଣୀ ବେଳେ ଏହି ବିଷୟରେ ସୂଚନା ଦେଇଛନ୍ତି ।
ମିଡିଆ ରିପୋର୍ଟ ମୁତାବକ, ମୈସୁର ସେସନ୍ସ କୋର୍ଟର ବିଚାରପତି ଏମ ଏଲ ରଘୁନାଥ କହିଛନ୍ତି ଯେ, ଛାଡପତ୍ର ଆବେଦନ କରିଥିବା ବ୍ୟକ୍ତିଙ୍କ ପତ୍ନୀ ସକାଳ ଜଳଖିଆଠାରୁ ଆରମ୍ଭ କରି ରାତି ଖାଇବାରେ ମଧ୍ୟ କେବଳ ଆଉ କେବଳ ମ୍ୟାଗି ହିଁ ବନାଉଥିଲେ । କାରଣ ମ୍ୟାଗି ବ୍ୟତୀତ ତାଙ୍କୁ ଆଉ କିଛି ପ୍ରସ୍ତୁତ କରିଆସୁନଥିଲା । ଏନେଇ ତାଙ୍କ ଘର ଲୋକ ଅନେକ ଥର ବୁଝାଇଥିଲେ ବି ତାଙ୍କ ଉପରେ କିଛି ପ୍ରଭାବ ପଡିନଥିଲା । ସେ ଅନ୍ୟ କିଛି ରୋଷଇ ଶିଖିବାକୁ ମଧ୍ୟ ଚେଷ୍ଟା କରୁନଥିଲେ । ବରଂ ସେ ଚାକିରି କରିଛନ୍ତି ଆଉ ବେଶି କିଛି କରିପାରିବେ ନାହିଁ ବୋଲି ଯୁକ୍ତି ବାଢୁଥିଲେ । ସେଥିପାଇଁ ଦୁହିଁଙ୍କ ଘର ଲୋକଙ୍କ ସହ ଆଲୋଚନା ପରେ ଦୁହିଁଙ୍କ ସହମତି କ୍ରମେ କୋର୍ଟ ଏହି ଛାଡପତ୍ର ଆବେଦନକୁ ମଂଜୁରୀ ଦେଇଛନ୍ତି ।
ମାମଲାର ବିଚାର ସମୟରେ ବାସ୍ତବ ଚିତ୍ର ଉପରେ ଆଲୋକପାତ କରିଥିଲେ ବିଚାରପତି ଏମ ଏଲ ରଘୁନାଥ । କହିଥିଲେ, ଆଜିକାଲି ଦାମ୍ପତ୍ୟ ଜୀବନ କ୍ଷଣସ୍ଥାୟୀ ହୋଇପଡିଛି । କର୍ଣ୍ଣାଟକ ସେସନ୍ସ କୋର୍ଟରେ ପାଖାପାଖି ୯୦୦ ଛାଡପତ୍ର ମାମଲା ରହିଛି । ଏଥିମଧ୍ୟରୁ ଛୋଟ ଛୋଟ କଥାକୁ ନେଇ ଛାଡପତ୍ର ଆବେଦନ କରୁଛନ୍ତି ସ୍ୱାମୀ ସ୍ତ୍ରୀ । କେତେବେଳେ ରୁଟି କରିଆସୁନି ବୋଲି ସ୍ୱାମୀ ସ୍ତ୍ରୀକୁ ଛାଡପତ୍ର ଦେଉଛି ତ ଆଉ କେତେବେଳେ ବିଭାଘରର ଫଟୋ ସୁଟକୁ ନେଇ ସ୍ତ୍ରୀ କରୁଛି ଛାଡପତ୍ର ଆବେଦନ । ଏସବୁକୁ ଶୁଣି ଲାଗୁଛି ଯେପରି ବିଦେଶରେ କଣ୍ଟ୍ରାକ୍ଟ ମ୍ୟାରେଜକୁ ବଳି ପଡୁଛି ଭାରତୀୟ ବୈବାହିକ ସମ୍ପର୍କ ।