ଏକନାଥ ସିନ୍ଦେଙ୍କୁ ଉପ-ବାଚସ୍ପତିଙ୍କ ଝଟକା । ୧୬ ବିଦ୍ରୋହୀ ବିଧାୟକଙ୍କୁ କଲେ ନୋଟିସ୍
କନକ ବ୍ୟୁରୋ: ମହାରାଷ୍ଟ୍ର ରାଜନୀତିରେ ଏବେ ଘଡିକେ ଘୋଡା ଛୁଟୁଛି । ଗୋଟିଏ ପଟେ ଏକନାଥ ସିନ୍ଦେଙ୍କ ବଳ ଦିନକୁ ଦିନ ବଢୁଥିବାବେଳେ, ଅନ୍ୟପଟେ ଉଦ୍ଧବ ଠାକରେଙ୍କ ଟେନସନ୍ ମଧ୍ୟ ବଢିବାକୁ ଲାଗିଛି । ଏହାରି ଭିତରେ ଏକନାଥ ସିନ୍ଦେଙ୍କ ଗ୍ରୁପର ୧୬ ବିଦ୍ରୋହୀ ବିଧାୟକଙ୍କୁ ସମନ ଜାରି କରିଛନ୍ତି ମହାରାଷ୍ଟ୍ର ବିଧାନସଭାର ଉପ-ବାଚସ୍ପତି । ଆସନ୍ତା ଜୁନ୍ ୨୭ ତାରିଖ ସନ୍ଧ୍ୟା ସାଢେ ୫ଟା ସୁଦ୍ଧା ଜବାବ୍ ରଖିବାକୁ ଏହି ନୋଟିସ୍ ଜାରି କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଶିବସେନା ମଧ୍ୟ ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକରେ ସାମିଲ ହୋଇଥିବାରୁ ସମସ୍ତଙ୍କୁ ନୋଟିସ୍ ଜାରି କରିଛି । ପାର୍ଟିର ମୁଖ୍ୟ ହ୍ୱିପ୍ ସୁନୀଲ ପ୍ରଭୁ ୧୬ ବିଦ୍ରୋହୀ ବିଧାୟକଙ୍କୁ ଅଯୋଗ୍ୟ ଘୋଷିତ କରିଥିବା ନୋଟିସ୍ ଜାରି କରିଛନ୍ତି । ତା ସହିତ ଆସନ୍ତା ଜୁନ୍ ୨୭ ତାରିଖ ସନ୍ଧ୍ୟା ୫ଟା ଭିତରେ ସେମାନେ ରାଷ୍ଟ୍ରୀୟ କାର୍ଯ୍ୟକାରିଣୀରେ କାହିଁକି ଅନୁପସ୍ଥିତ ରହିଲେ ସେନେଇ ଜବାବ ରଖିବାକୁ ନିର୍ଦ୍ଦେଶ ଦେଇଛନ୍ତି । ତେବେ ଖାଲି ସେତିକି ନୁହେଁଷ ଏହି ନୋଟିସରେ ଆହୁରି ମଧ୍ୟ ଉଲ୍ଲେଖ କରାଯାଇଛି ଯେ, ଯଦି ବିଧାୟକମାନେ ଜବାବ ଦେବେନି ତେବେ ଏହା ଧରିନିଆଯିବ ଯେ, ସେମାନଙ୍କ ପାଖରେ କହିବାକୁ କିଛି ନାହିଁ । ଏହାପରେ ଆଇନ୍ ଅନୁସାରେ ପ୍ରକ୍ରିୟା ଆରମ୍ଭ ହେବ ବୋଲି ନୋଟିସରେ ଉଲ୍ଲେଖ କରାଯାଇଛି ।
ସେପଟେ,ମହାରାଷ୍ଟ୍ରରେ ଲାଗିରହିଥିବା ରାଜନୈତିକ ସଙ୍କଟ ମଧ୍ୟରେ ବିରୋଧୀଙ୍କୁ କଡା ଜବାବ ଦେଇଛନ୍ତି ମହାରାଷ୍ଟ୍ରର ମୁଖ୍ୟମନ୍ତ୍ରୀ ତଥା ଶିବସେନାର ଅଧ୍ୟକ୍ଷ ଉଦ୍ଧବ ଠାକରେ । ‘ଯେଉଁମାନେ ଯିବାକୁ ଚାହୁଁଛନ୍ତି ସେମାନେ ବିନା ଦ୍ୱିଧାରେ ଯାଇପାରନ୍ତି, ମୁଁ ନୂଆ ଶିବସେନା ଗଢିବି’ ବୋଲି ଉଦ୍ଧବ କହିଛନ୍ତି ।
କର୍ପୋରେଟରଙ୍କୁ ଭିଡିଓ କନଫେରନ୍ସିଙ୍ଗ ଜରିଆରେ ଉଦବୋଧନ ଦେବା ସମୟରେ ବିରୋଧୀଙ୍କ ପ୍ରତି ଏଭଳିି କଥା ମତ ଦେଇଛନ୍ତି ଉଦ୍ଧବ । ଉଦବୋଧନ ଦେବା ସମୟର ସେ ଆହୁୁରି ମଧ୍ୟ କହିଛନ୍ତି ଯେ, ସାଧାରଣ ଶିବାସେନା କର୍ମୀମାନେ ମୋର ସମ୍ପତ୍ତି । ସେମାନେ ଯେପର୍ୟ୍ୟନ୍ତ ମୋ ସାଙ୍ଗରେ ଥିବେ ଅନ୍ୟମାନଙ୍କ ସମାଲୋଚନାକୁ ମୋର ପରବାୟ ନାହିଁ । ଆପଣା ଲୋକେ ଶିବସେନା ପ୍ରତି ବିଶ୍ୱାସଘାତକତା କରିଛନ୍ତି । ଗୌହାଟୀରେ ଡେରା ପକାଇଥିବା ଏକନାଥଙ୍କ ସହ ଅଧିକାଂଶ ବିଧାୟକ ଯୋଗଦେଇଥିବାରୁ ମୋ ସରକାର ସଙ୍କଟରେ ପଡିଛି । ଆପଣମାନଙ୍କ ମଧ୍ୟରୁ ଅନେକ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଆଶାୟୀ ଥିବାବେେଳେ ଆମେ ଉକ୍ତ ବିଦ୍ରୋହୀଙ୍କୁ ଟିକେଟ ଦେଇଥିଲୁ । ଆପଣମାନଙ୍କ କଠିନ ପରିଶ୍ରମ ବଳରେ ବିଜୟୀ ହେବା ପରେ ସେମାନେ ଅସନ୍ତୁଷ୍ଟ ହୋଇ ଏବେ ନିଜ ପତିଆରା ଦେଖାଉଛନ୍ତି । ଏଭଳି ସଙ୍କଟ ସମୟରେ ମଧ୍ୟ ଆପଣମାନେ ଦଳକୁ ସମର୍ଥନ କରୁଛନ୍ତି । ସେଥିପାଇଁ ଯେତେ ପରିମାଣରେ କୃତଜ୍ଞତା ଜ୍ଞାପନ କରିବା କଥା ମୁଁ କରିପାରୁନାହିଁ’ ବୋଲି ଉଦ୍ଧବ କହିଛନ୍ତି ।
ସେ ଆହୁରି ମଧ୍ୟ କହିଛନ୍ତି ଯେ, ଯଦି ଜଣେ ଶିବସେନା କର୍ମୀ ମୁଖ୍ୟମନ୍ତ୍ରୀ ହେବେ ତେବେ ବିଜେପି ସହ ମେଣ୍ଟ କର । କିନ୍ତୁ ଜଣେ ଯଦି ଉପମୁଖ୍ୟମନ୍ତ୍ରୀ ହୁଅନ୍ତି ତେବେ ମୋତେ କହିବାର ଥିଲା । ମୁଁ ତାଙ୍କୁ ଉପମୁଖ୍ୟମନ୍ତ୍ରୀ କରାଇଦେଇଥାନ୍ତି । ବିଜେପି ସହିତ ମେଣ୍ଟ କରିବା ଛଡା ବିଦ୍ରୋହୀ ବିଧାୟକଙ୍କର ଅନ୍ୟ ଉପାୟ ଆଉ ନାହିଁ । ଯଦି ସେମାନେ ସରକାର ଗଢିବାରେ ସଫଳ ହୁଅନ୍ତି ସେ ସରକାର ବେଶି ଦିନ ତିଷ୍ଠିବ ନାହିଁ । କାରଣ ବିଦ୍ରୋହୀ ଗୋଷ୍ଠୀରେ ମଧ୍ୟ ଅନେକ ବିଧାୟକ ବାସ୍ତବରେ ଖୁସି ନାହାଁନ୍ତି’ ବୋଲି ଉଦ୍ଧବ ଠାକରେ କହିଛନ୍ତି ।