ବ୍ରିଜଭୂଷଣଙ୍କ ବିରୋଧରେ ଅଭିଯୋଗକାରୀ ମହିଳା କୁସ୍ତିଯୋଦ୍ଧାଙ୍କୁ ପ୍ରମାଣ ମାଗିଲା ଦିଲ୍ଲୀ ପୋଲିସ, ଫଟୋ, ଭିଡିଓ ଓ ହ୍ୱାଟସପ୍ ଚାଟ୍ ଦାଖଲ କରିବାକୁ ନିର୍ଦ୍ଦେଶ
କନକ ବ୍ୟୁରୋ : ଭାରତୀୟ କୁସ୍ତିସଂଘର ପୂର୍ବତନ ସଭାପତି ବ୍ରିଜଭୂଷଣ ଶରଣ ସିଂ ଏବେ ମହିଳା କୁସ୍ତିଯୋଦ୍ଧାଙ୍କ ଦ୍ୱାରା ଦାଖଲ କରାଯାଇଥିବା ଯୌନ ଉତ୍ପୀଡନ ଅଭିଯୋଗର ସାମ୍ନା କରୁଛନ୍ତି । ଏହାରି ମଧ୍ୟରେ ଖବର ଆସିଛି କି ଦିଲ୍ଲୀ ପୋଲିସ ତରଫରୁ ଅଭିଯୋଗକାରୀ ମହିଳା କୁସ୍ତିଯୋଦ୍ଧାଙ୍କୁ ବ୍ରିଜଭୂଷଣଙ୍କ ବିରୋଧରେ ପ୍ରମାଣ ମାଗାଯାଇଛି । ମହିଳା କୁସ୍ତିଯୋଦ୍ଧାଙ୍କ ଠାରୁ ଦିଲ୍ଲୀ ପୋଲିସ ଫଟୋ, ଭିଡିଓ ଓ ହ୍ୱାଟସପ୍ ଚାଟ୍ ମାଗିଥିବା କୁହାଯାଇଛି । ଏହାସହ ପୋଲିସ ନିଜ ତରଫରୁ ମଧ୍ୟ ପ୍ରମାଣ ଯୋଗାଡ କରିବାକୁ ଚେଷ୍ଟା ଚଳାଇଛି । ଦିଲ୍ଲୀ ପୋଲିସ ତରଫରୁ ସିଆରପିସି ୯୧ ଆଧାରରେ ଏକ ନୋଟିସ ଜାରି କରିଛି । ଏଥିରେ ଯାଂଚ ଅଧିକାରୀଙ୍କୁ ଅଭିଯୋଗ ଉପରେ କୌଣସି ଡକ୍ୟୁମେଣ୍ଟ ମାଗିବାର ଅଧିକାର ରହିଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ସେପଟେ ଗତକାଲି ଅଭିଯୋଗକାରୀ ମହିଳା କୁସ୍ତିଯୋଦ୍ଧା ସାକ୍ଷୀ ମଲ୍ଲିକ ବ୍ରିଜ ଭୂଷଣଙ୍କ ବିରୋଧରେ ମଧ୍ୟ ଏକ ସଂଗୀନ ଅଭିଯୋଗ ଆଣିଛନ୍ତି । ସେ କହିଛନ୍ତି କି ବ୍ରିଜଭୂଷଣଙ୍କ ତରଫରୁ ଅତ୍ୟାଧିକ ଚାପ ପଡିବାର ଅଭିଯୋଗକାରୀ ନାବାଳିକା ମହିଳା କୁସ୍ତିଯୋଦ୍ଧା ଜଣଙ୍କ ତାଙ୍କର ବୟାନ ବଦଳାଇଛନ୍ତି । ଏହାସହ ଅପୋଷ ବୁଝାମଣା ପାଇଁ ପ୍ରଦର୍ଶନକାରୀ କୁସ୍ତିଯୋଦ୍ଧାଙ୍କ ଉପରେ ଚାପ ପକାଯାଉଥିବା ମଧ୍ୟ ସେ ଅଭିଯୋଗ କରିଥିଲେ ।
ଅନ୍ୟପଟେ ସାକ୍ଷୀ ମଲ୍ଲିକ ଦାବି କରିଥିଲେ କି ବ୍ରିଜଭୂଷଣଙ୍କୁ ଗିରଫ କରାନଗଲେ ନିରପେକ୍ଷ ଯାଂଚ ହୋଇପାରିବ ନାହିଁ । ହେଲେ ସମସ୍ତ ପ୍ରକାର ଅଭିଯୋଗକୁ ଖଣ୍ଡନ କରିଛନ୍ତି ବ୍ରିଜଭୂଷଣ ସିଂ ।