କନକ ବ୍ୟୁରୋ : ରାଜଧାନୀରେ ଆତଙ୍କ ଖେଳାଇଥିବା ବ୍ଲାକ ଜ୍ୟାକେଟ ଗ୍ୟାଙ୍ଗକୁ ବାନ୍ଧିଲା କମିସନରେଟ ପୋଲିସ । ବ୍ଲାକ ଜ୍ୟାକେଟ ଗ୍ୟାଙ୍ଗର ୪ ଜଣ ଅଭିଯୁକ୍ତଙ୍କୁ ଗିରଫ କରିଛି ସ୍ପେଶାଲ ସ୍କ୍ୱାର୍ଡ । ଗ୍ୟାଙ୍ଗ ଲିଡର ସନ୍ତୋଷ ନାୟକ ଓ ତାର ତିନି ସହ ଯୋଗୀଙ୍କୁ କାବୁ କରିଛି ପୋଲିସ । ଗିରଫ ଅଭିଯୁକ୍ତଙ୍କ ଠାରୁ ୪ଶହ ଗ୍ରାମ ଓଜନର ୩୦ଟି ସୁନା ଚେନ, ୩ଟି ସ୍ପିଡ ବାଇକ, ଦୁଇଟି ବ୍ଲାକ ଜାକେଟ ସହ କିଛି କାଗଜପତ୍ର ଜବତ କରିଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
କିଛି ଦିନ ହେଲା କଳା କପଡା ପିନ୍ଧି କିଛି ଯୁବକ ଭୁବନେଶ୍ୱରରେ ବୁଲି ବୁଲି ଅପରାଧ କରି ପୋଲିସର ମୁଣ୍ଡବ୍ୟଥା ବଢାଇ ଦେଇଥିଲେ । ମୁଖ୍ୟତଃ ମହିଳାଙ୍କୁ ଏହି ଗ୍ୟାଙ୍ଗ ଟାର୍ଗେଟ କରି ସୁନା ଚେନ ଲୁଟିନେଉଥିଲେ । ପୋଲିସ ୪ ଅଭିଯୁକ୍ତଙ୍କୁ ଗିରଫ କରିବା ପରେ ଏହି ଗ୍ୟାଙ୍ଗର କାରନାମ ସାମ୍ନାକୁ ଆସୁଛି । ରାଜଧାନୀର ବିଭିନ୍ନ ସ୍ଥାନରୁ ସୁନା ଚେନ ଲୁଟ କରିବା ପରେ ସେହି ସୁନାକୁ ଗୋଲଡ ଲୋନ ସଂସ୍ଥାରେ ସୁନା ବନ୍ଧକ ପକାଇ ଟଙ୍କା ଆଣୁଥିଲେ ।
ସଂପର୍କୀୟଙ୍କୁ ଢାଲ କରି ଜାଲକାଗଜପତ୍ର ଦେଇ ଗୋଲଡ ଲୋନ ସଂସ୍ଥାରେ ସୁନା ବନ୍ଧକ ରଖୁଥିଲେ । ପୋଲିସ ଆଗରେ ଅଭିଯୁକ୍ତ ଏହା ସ୍ୱୀକାର କରିବା ପରେ ଗୋଲଡ ଲୋନ ସଂସ୍ଥାରେ ଚଢାଉ କରି ପୋଲିସ ସୁନା ଗହଣା ସିଜ୍ କରିଛି । ଗିରଫ ୩ ଅଭିଯୁକ୍ତଙ୍କ ନାଁରେ ରାଜଧାନୀର ବିଭିନ୍ନ ଥାନାରେ ୧୦ରୁ ଅଧିକ ମାମଲା ଥିବା ଜଣାପଡିଛି ।